ផ្តើមពីព្រះមហាក្សត្រ សប្បុរសជនកាន់តែច្រើន នាំគ្នាបរិចា្ចគថវិកា សម្រាប់ប្រឆាំងកូវីដ-១៩

ជាតិ

សង្គមជាតិ

ផ្តើមពីព្រះមហាក្សត្រ សប្បុរសជនកាន់តែច្រើន នាំគ្នាបរិចា្ចគថវិកា សម្រាប់ប្រឆាំងកូវីដ-១៩

21, Mar 2020 , 2:59 pm

រូបភាព

ព្រះមហាក្សត្រ និង ព្រះមហាក្សត្រី ត្រៀមយាងឡើងជិះរថភ្លើងជាលើកដំបូង ធ្វើដំណើរពីរាជធានីភ្នំពេញទៅក្រុងព្រះសីហនុ កាលថ្ងៃទី៣០ ខែធ្នូ ឆ្នាំ២០១៦ ដោយមានសម្តេចនាយករដ្ឋមន្រ្តី និង ថ្នាក់ដឹកនាំជាន់ខ្ពស់មួយចំនួនទៀត អមដំណើរ (រូបពី AFP)

ដោយ:

កាលពីថ្ងៃទី១៩ ខែមីនា ឆ្នាំ២០២០ ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ព្រះមហាក្សត្រកម្ពុជា បានប្រោសប្រទានព្រះរាជទ្រព្យ១សែនដុល្លារ ហើយសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ប្រោសប្រទាន២សែនដុល្លារ ដល់រដ្ឋាភិបាល ដើម្បីទុកចំណាយលើការទប់ស្កាត់និងការប្រឆាំងជំងឺកូវីដ-១៩។

ក្រោយព្រះមហាក្សត្រនិងព្រះមហាក្សត្រី ប្រទានព្រះរាជទ្រព្យហើយ សេដ្ឋី ឧកញ៉ា អ្នកមានទ្រព្យ រួមទាំងសប្បុរសជននានា ក៏ចាប់ផ្តើមនាំគ្នាបរិច្ចាគថវិកាជាហូរហែ ជូនដល់រដ្ឋាភិបាល។ ក្នុងចំណោមអ្នកទាំងនោះ មានដូចជា ឧកញ៉ា ហុង ពាវ និង អតិថិជនរបស់គាត់ បរិច្ចាគ២លានដុល្លារ ឧកញ៉ា គិត ម៉េង បរិច្ចាគ៥សែនដុល្លារ ក្រុមហ៊ុន ជីប ម៉ុង បរិច្ចាគ៥សែនដុល្លារ រួមទាំងអ្នកផ្សេងទៀត។

សម្តេចនាយករដ្ឋមន្ត្រី ហ៊ុន សែន បានថ្វាយលិខិតទៅព្រះមហាក្សត្រនិងព្រះមហាក្សត្រី ដើម្បីថ្លែងអំណអរព្រះគុណព្រះអង្គទាំងទ្វេ ដែលបានប្រោសប្រទានព្រះរាជទ្រព្យ ដល់រដ្ឋាភិបាល សម្រាប់ប្រយុទ្ធប្រឆាំងនឹងជំងឺកូវីដ-១៩ និងបានសរសេរលិខិតអរគុណជាបន្តបន្ទាប់ ទៅកាន់សប្បុរសជននានា ចំពោះទឹកចិត្តមនុស្សធម៌របស់ពួកគេ ក្នុងការបរិច្ចាគថវិកាជូនរដ្ឋាភិបាល។

នៅថ្ងៃទី២០ ខែមីនា ឆ្នាំ២០២០ ម្សិលមិញ សម្តេចនាយករដ្ឋមន្ត្រី បានចេញសារមួយ ស្តីពីការកំណត់តាំងពីរកន្លែង សម្រាប់ឲ្យសប្បុរសជនទៅបរិច្ចាគថវិកា។ ទីតាំងទាំងពីរនោះ គឺនៅទីស្តីការក្រសួងសុខាភិបាល និង នៅខុទ្ទកាល័យរបស់នាយករដ្ឋមន្ត្រីផ្ទាល់ ដោយមានលោក សេង ទៀង នាយករងខុទ្ទកាល័យ និងមន្ត្រីមួយចំនួនទៀត រង់ចាំទទួល។

បើមិនបានទៅផ្ទាល់ គេ អាចទាក់ទងទៅមន្ត្រីក្រសួងសុខាភិបាល៤នាក់ ដែលមានភារកិច្ចទទួលថវិកាពីសប្បុរសជន តាមរយៈលេខ ០១២ ៨៤២ ៩៦៦, ០១២ ៨៣៨ ៨៨៥, ០១២ ៧៣១ ៨៨៨, និង០១២ ៧៧៦ ៥៧៨ ឬអាចហៅទូរស័ព្ទទៅលោក សេង ទៀង តាមលេខ ០១២ ៩៦១ ៩៧១។

គិតត្រឹមថ្ងៃទី២០ ខែមីនា ឆ្នាំ២០២០ នៅកម្ពុជា មានមនុស្សលើសពី១ពាន់នាក់ហើយ ដែលឆ្លងកាត់ការធ្វើតេស្តរកវីរុសកូវីដ-១៩ ដោយក្នុងនោះ មាន៥១នាក់ មានលទ្ធផលវិជ្ជមាន។ ការកើនឡើងនៃអ្នកឆ្លងជំងឺកូវីដ-១៩ ជំរុញឲ្យរដ្ឋាភិបាល បង្កើតក្រុមការងារថ្មីមួយ ហៅថា គណៈកម្មការជាតិប្រយុទ្ធនឹងជំងឺកូវីដ-១៩ ដែលមាននាយករដ្ឋមន្ត្រី ជាប្រធាន៕