COVID-19
ជាតិ
មន្ទីរសុខាភិបាលខេត្តសៀមរាប ហាមគ្រូថ្នាំយកឱសថបុរាណព្យាបាលជំងឺកូវីដ១៩
× សៀមរាប៖ ការស្នើសុំប្រើប្រាស់ឱសថបុរាណ ដើម្បីព្យាបាលជំងឺកូវីដ១៩ ត្រូវបានមន្ទីរសុខាភិបាលខេត្តសៀមរាបបដិសេធ។ មន្ទីរសុខាភិបាលខេត្តសៀមរាបពន្យល់ថា ការជ្រើសរើសការព្យាបាលបែបនេះ គ្មានបច្ចេកទេស និងលក្ខណៈវិទ្យាសាស្ដ្រត្រឹមត្រូវ។
ក្នុងលិខិតមួយច្បាប់ចុះ ថ្ងៃទី១៧ មីនា ប្រធានមន្ទីរសុខាភិបាលខេត្តសៀមរាប លោក ក្រុស សារ៉ាត់ បានឆ្លើយតបទៅនឹងសំណើរបស់គ្រូឱសថបុរាណ ដែលសុំយកឱសថខ្លួន ដើម្បីព្យាបាលអ្នកជំងឺកូវីដ១៩។ មន្ទីរសុខាភិបាលបានបដិសេធ និងពន្យល់ថា ជំងឺនេះជាជំងឺឆ្លងសកល និងឆ្លងពីមនុស្សម្នាក់ទៅមនុស្សម្នាក់ ពីសហគមន៍ទៅសហគមន៍ និងពីតំបន់ទៅតំបន់ ដូច្នេះការព្យាបាលត្រូវដាក់ឱ្យនៅដាច់ដោយឡែកក្នុងមន្ទីរពេទ្យ និងទទួលការព្យាបាលបែបវិទ្យាសាស្ដ្រត្រឹមត្រូវ។
លោក ក្រុស សារ៉ាត់ ពន្យល់ទៀតថា ថ្នាក់ដឹកនាំមន្ទីរសុខាភិបាល មិនអនុញ្ញាតចំពោះការព្យាបាលដោយប្រើឱសថបុរាណឡើយ និងបានជំរុញឱ្យអ្នកជំងឺដែលសង្ស័យ ប្រញាប់រាយការណ៍ទៅភ្នាក់ងារសុខាភិបាល ឬទាក់ទងទៅលេខ ១១៥។ ករណីមិនអនុវត្តន៍តាមការណែនាំ មន្ទីរសុខាភិបាលខេត្តនឹងមានវិធានការតាមផ្លូវច្បាប់៕
© រក្សាសិទ្ធិដោយ thmeythmey.com