វៀតណាម ស្នើឲ្យពលរដ្ឋប្រកាន់ស្មារតី «ប្រយុទ្ធប្រឆាំងវីរុសរាតត្បាត ដូចប្រយុទ្ធប្រឆាំងសត្រូវរួម

COVID-19

អន្តរជាតិ

វៀតណាម ស្នើឲ្យពលរដ្ឋប្រកាន់ស្មារតី «ប្រយុទ្ធប្រឆាំងវីរុសរាតត្បាត ដូចប្រយុទ្ធប្រឆាំងសត្រូវរួម

22, Mar 2020 , 7:39 pm

រូបភាព

អគ្គលេខាធិការបក្សកុម្មុយនីស្តវៀតណាម Nguyễn Phú Trọng (រូបភាព៖ AFP)

ដោយ:

បក្សកុម្មុយនីស្តវៀតណាម បានវាយតម្លៃខ្ពស់ពីការអនុវត្តការងារប្រកបដោយប្រសិទ្ធភាព និងទាន់ពេលរបស់មន្ត្រីពាក់ព័ន្ធក្នុងការការពារ និងទប់ស្កាត់វីរុស Covid-19។ បក្សកុម្មុយនីស្តជាមួយគ្នានេះ ក៏បានក្រើនរម្លឹកដល់អ្នកពាក់ព័ន្ធកុំមានការត្រេកត្រអាល និងជឿជាក់ពេក ដ្បិតវិបត្តិនៃវីរុស Covid-19 នៅតែបន្តគំរាមកំហែង និងពិបាកក្នុងការព្យាករពីការរីករាលដាល។

តាមរយៈកិច្ចប្រជុំបន្ទាន់មួយ ដឹកនាំដោយអគ្គលេខាធិការបក្ស និងជាប្រធានាធិបតីវៀតណាម លោក Nguyen Phu Trong និងមានចូលរួមដោយនាយករដ្ឋមន្ត្រី ប្រធានសភាជាដើមនោះ វៀតណាម បានក្រើនរម្លឹកដល់ភាគីពាក់ព័ន្ធរបស់ប្រទេសទាំងអស់ ឲ្យមានការចាប់អារម្មណ៍ពីស្ថានភាពនៃវីរុស Covid-19 ដោយមិនត្រូវមើលស្រាលលើស្ថានភាពឡើយ។

តាមការចុះផ្សាយរបស់ភ្នាក់ងារព័ត៌មាន Vietnam News មេបក្សកុម្មុនីស្តវៀតណាមរូបនេះ បានស្នើឲ្យមានការអនុវត្តទូទាំងប្រទេសដោយបន្ត គ្រប់គ្រងស្ថានភាពនិងលំហូររបស់ប្រជាជនដែលមកពីតំបន់មានឆ្លងវីរុសនេះច្រើន ក៏ដូចជាពិនិត្យ វាយតម្លៃ និងដាក់ឲ្យនៅដាច់ឡែកលើអ្នកដែលមានរោគសញ្ញាសង្ស័យ ។ វៀតណាម មានជំនឿថាប្រទេសខ្លួន អាចធ្វើបានជោគជ័យដូចករណីជំងឺ SARS-CoV-២ផងដែរ។

ក្នុងវេទិកាដដែលនោះ លោក Phu Trong បានកោតសរសើរក្រុមជួរមុខរបស់ខ្លួន ក៏ប៉ុន្តែក៏បានភ្ជាប់ជាមួយនឹងការដាស់តឿនបន្ថែមដោយមិនត្រូវត្រេកត្រអាល និងជឿជាក់ជ្រុលលើស្ថានភាពឡើយ។ ក្នុងជំហររបស់វៀតណាម វីរុសប្រភេទរាតត្បាត Covid-19 នេះ នឹងនៅតែជាបញ្ហាស្មុគស្មាញ និងពិបាកព្យាករ ហើយអាចប៉ះពាល់ធ្ងន់ធ្ងរលើសុខភាព និងការអភិវឌ្ឍសង្គម-សេដ្ឋកិច្ចរបស់ប្រជាជនផងដែរ។

ដោយសារតែឆ្នាំ២០២០នេះ វៀតណាម ត្រូវអង្គុយកៅអីពីរសំខាន់ក្នុងឆាកអន្តរជាតិ គឺកៅអីជាសមាជិកមិនអចិន្ត្រៃយ៍ក្រុមប្រឹក្សាសន្តិសុខអង្គការសហប្រជាជាតិ និងកៅអីប្រធានវិលជុំអាស៊ានផងនោះ ដែលតម្រូវឲ្យវៀតណាម រៀបចំប្រជុំច្រើននោះ ប្រមុខដឹកនាំកំពូលវៀតណាម បានទទូចឲ្យគ្រប់ភាគីពាក់ព័ន្ធបង្ហាញការរួបរួមជាតិមួយដើម្បីប្រឆាំងនឹងវីរុសនេះ ក្រោមស្មារតី «ប្រយុទ្ធប្រឆាំងវីរុសរាតត្បាត ដូចប្រយុទ្ធប្រឆាំងសត្រូវរបស់យើង»។

គួរជម្រាបផងដែរ វៀតណាម ក៏ដូចជាប្រទេសប្រាំពីរផ្សេងទៀតរបស់អាស៊ាន លើកលែងឡាវ និងមីយ៉ាន់ម៉ា បានទទួលរងការគំរាមកំហែងពីវីរុស Covid-19។ ក៏ប៉ុន្តែមិនទាន់មានករណីស្តាប់ដោយសារការឆ្លងវីរុស នេះនៅឡើយនោះទេក្នុងប្រទេសវៀតណាម៕