ពីនេះ ពីនោះ
រូបត្លុក
×![]()
ដោយ: ថ្មីៗ
ស្រឡាញ់គ្នាក្នុងគ្រាក្រ ស្គាល់មិត្តល្អក្នងគ្រាលំបាក។ នេះ គឺជាអ្វីដែលនាយករដ្ឋមន្ត្រីកម្ពុជា និងប្រធានាធិបតីនៃប្រទេសចិនតែងតែប្រកាន់ខ្ជាប់។ ជាសក្ខីកម្ម កាលពីព្រឹកមិញនេះ ប្រទេសចិនបានបញ្ជូនវេជ្ជបណ្ឌិតរបស់ខ្លួនចំនួន៧នាក់ និងសម្ភារមួយចំនួនមកប្រទេសកម្ពុជាក្នុងគោលបំណងចែករំលែកបទពិសោធន៍ប្រឆាំងនឹងមេរោគ កូវីដ១៩។ ស្របពេលដែលចិនបញ្ជូនវេជ្ជបណ្ឌិត និងសម្ភារមកប្រទេសកម្ពុជា សំណាង និងសុធីរ ចាប់ផ្តើមជជែកគ្នាជុំវិញតួនាទី និងទំនាក់ទំនងរវាងកម្ពុជា និងចិន។ 
សំណាង៖ សុធីរ! មានបុគ្គលមួយចំនួនចេះតែរិះគន់ទំនាក់ទំនងកម្ពុជា និងចិន ចុះឪឥឡូវចិនជួយកម្ពុជាប្រឆាំងនឹងកូវីដ១៩ តើអ្ហែងគិតយ៉ាងម៉េចវិញ?
សុធីរ៖ អ្នករិះគន់ចេះតែរិះគន់ហើយ។ តែសូមកុំភ្លេចថា ចិន គឺជាមហាមិត្ត ហើយប្រទេសទាំងពីរបានចាត់ទុកទំនាក់ទំនងរបស់ពួកគេថា ជាទំនាក់ទំនង«ដែកថែប»។ ចិន និងកម្ពុជាតែងតែនិយាយពាក្យមួយឃ្លាថា ស្រឡាញ់គ្នាក្នុងគ្រាក្រ ស្គាល់មិត្តល្អក្នងគ្រាលំបាក។ ទំនាក់ទំនងការទូតនៃប្រទេសកម្ពុជា និងចិន គឺស្ថិតក្នុងកម្រិតដៃគូយុទ្ធសាស្ត្រគ្រប់ជ្រុងជ្រោយ។ ដូចអ្ហែងឃើញហើយថា កាលពីព្រឹកមិញនេះ ចិនបានបញ្ជូនទាំងពេទ្យ ទាំងសម្ភារមកជួយកម្ពុជាបន្ថែមទៀត។ នេះហើយ គឺជាមហាមិត្តដែលត្រូវជួយគ្នាក្នុងគ្រាលំបាក។ កម្ពុជាស្ថិតក្នុងចំណោមប្រទេសតែបី ឬបួនប៉ុណ្ណោះដែលចិនបញ្ជូនគ្រូពេទ្យទៅជួយប្រឆាំងកូវីដ។
សំណាង៖ តែនៅតែមានអ្នកខ្លះថា ចិនជាប្រទេសកុំម្មុយនីស ដូច្នេះ កម្ពុជាមិនគួរស្និទ្ធពេកទេ អ្ហែងយល់យ៉ាងម៉េច?
សុធីរ៖ អា សំណាង! នៅក្នុងទំនាក់ទំនងការទូត គ្មានឡើយមិត្ត គ្មានឡើយសត្រូវ មានតែផលប្រយោជន៍រួមគ្នាទេ។ ត្រង់នេះ អញចង់និយាយប្រាប់អ្ហែងថា កុំគិតអារឿងគេថាច្រើនពេក។ បើចិនជួយយើង យើងត្រូវគិតថា ចិនល្អ គឺចប់។ អ្ហែងនៅចាំបានទេថា សម្តេច ហ៊ុន សែន គឺជាបុគ្គលទី១ដែលបានធ្វើដំណើរទៅប្រទេសចិនមុនគេ ខណៈពេលដែលប្រទេសចិនផ្ទុះមេរោកូវីដ១៩។ កាយវិការរបស់សម្តេច ហ៊ុន សេន គឺជាការលើកទឹកចិត្តចំពោះថ្នាក់ដឹកនាំ និងប្រជាជនចិន។ ឥឡូវនេះ ចិនបញ្ជូនគ្រូពេទ្យ និងសម្ភារមួយចំនួនមកជួយកម្ពុជាវិញ។ ចំណុចនេះហើយដែលកម្ពុជា និងចិនតែងតែចាត់ទុកគ្នាទៅវិញទៅមកថា«ជាមហាមិត្តស្រឡាញ់គ្នាក្នុងគ្រាលំបាក!»
សំណាង៖ ចុះប្រទេសដទៃមានជួយកម្ពុជាប្រឆាំងនឹងកូវីដដែរឬទេ?
សុធីរ៖ តាមពិត ជប៉ុនក៏ជួយសម្ភារមកកម្ពុជាដែរ ហើយអាមេរិកក៏បានប្រកាសជួយផ្តល់ទឹកប្រាក់២លានដុល្លារដល់កម្ពុជាដើម្បីប្រឆាំងនឹងកូវីដ១៩ផងដែរ។
សំណាង៖ អ៊ីចឹង មានន័យថា ទាំងចិន អាមេរិក ជប៉ុន សុទ្ធតែជាមិត្តរបស់កម្ពុជាទាំងអស់ហ្នឹង?
សុធីរ៖ តាមពិត វាអ៊ីចឹងឯង។ អា សំណាង! ពេលខ្លះ អ្ហែងត្រូវគិតថា នរណាក៏ជាមិត្តរបស់យើងដែរ។ កុំបែងចែកថា ចិនអាក្រក់ជាងអាមេរិក ឬអាមេរិកល្អជាងចិន ឬជប៉ុនល្អជាងចិន។ យើងជាខ្មែរ ចូរប្រកាន់នូវគំនិតមួយថា«នរណាក៏ដោយ ក៏ជាមិត្តរបស់យើងដែរ»៕
© រក្សាសិទ្ធិដោយ thmeythmey.com
