COVID-19
ជាតិ
ខេត្តមួយចំនួន ចាប់ផ្តើមជ្រើសរើសទីតាំង សម្រាប់ពិនិត្យ និងដាក់អ្នកផ្ទុកកូវីដ-១៩
×![]()
រដ្ឋបាលខេត្តមួយចំនួន ចាប់ផ្តើមជ្រើសរើសទីតាំង ដើម្បីពិនិត្យ និងដាក់អ្នកផ្ទុកមេរោគកូវីដ-១៩ ខណៈចំនួនអ្នកឆ្លងនៅកម្ពុជាចេះតែបន្តកើនឡើង។ គិតត្រឹមរសៀលថ្ងៃទី២៣ ខែមីនា ឆ្នាំ២០២០ កម្ពុជារកឃើញអ្នកផ្ទុកកូវីដ-១៩ ចំនួន៨៦នាក់ ក្នុងនោះព្យាបាលជាសះស្បើយចំនួន២នាក់។ 
សម្តេចនាយករដ្ឋមន្ត្រី ហ៊ុន សែន នៅថ្ងៃទី២៣ ខែមីនា ឆ្នាំ២០២០ បានជំរុញឲ្យខេត្តនីមួយៗ ស្វែងរកទីតាំងតាមសាលារៀន សណ្ឋាគារ និង កន្លែងផ្សេងៗ ដើម្បីរៀបចំធ្វើជាទីតាំងសម្រាប់ពិនិត្យ និងដាក់អ្នកផ្ទុកជំងឺកូវីដ-១៩។ ការដាក់ចេញវិធានការបែបនេះរបស់ប្រមុខរាជរដ្ឋាភិបាលកម្ពុជា ធ្វើឡើងក្រោយចំនួនអ្នកផ្ទុកជំងឺកូវីដ-១៩ នៅកម្ពុជា បន្តកើនឡើងជាបន្តបន្ទាប់ក្នុងរយៈពេលប៉ុន្មានថ្ងៃចុងក្រោយនេះ។
ដើម្បីរួមចំណែកបង្ការ និងទប់ស្កាត់ការរីករាលដាលនៃកូវីដ-១៩ និងក្រោយមានបញ្ជាពីប្រមុខរាជរដ្ឋាភិបាល រដ្ឋបាលខេត្តមួយចំនួនបានចុះត្រួតពិនិត្យ និងជ្រើសរើសទីតាំងរួចរាល់ហើយ ហើយក៏មានខេត្តមួយចំនួនទៀតកំពុងស្វែងរក និងពិចារណាក្នុងការជ្រើសរើសទីតាំង។
ខេត្តតាកែវ បានសម្រេចជ្រើសរើសយកមជ្ឈមណ្ឌលគរុកោសល្យភូមិភាគតាកែវ ធ្វើជាទីតាំងសម្រាប់ពិនិត្យ និងដាក់អ្នកសង្ស័យ ឬអ្នកផ្ទុកមេរោគកូវីដ-១៩។ អគារនេះមានកម្ពស់៣ជាន់ មាន៦០បន្ទប់។ ប៉ុន្តែមកទល់ពេលនេះ ខេត្តតាកែវពុំទាន់រកឃើញមានអ្នកផ្ទុកមេរោគកូវីដ-១៩ នៅឡើយទេ។
លោក អ៊ូច ភា អភិបាលខេត្តតាកែវ បញ្ជាក់ថា៖«អគារស្នាក់នៅរបស់គរុសិស្សនេះ មានបន្ទប់នីមួយៗបំពាក់រួចជាស្រេចនូវទឹក ភ្លើង បន្ទប់ទឹក និងកង្ហារជាដើម។ ប៉ុន្តែបន្ទប់នីមួយៗមិនទាន់ស្អាត ដូច្នេះហើយ យើង នឹងសម្អាតអគារនេះឲ្យស្អាត និងមានអនាម័យ។ ពិសេសគឺបាញ់ថ្នាំសម្លាប់មេរោគឲ្យស្អាតល្អសិន ហើយនឹងឲ្យមន្ទីរសុខាភិបាលខេត្តបញ្ជូនគ្រែ ព្រមទាំងសម្ភារ និងបរិក្ខារពេទ្យមួយចំនួនថែមទៀត»។
ខេត្តបាត់ដំបង បានជ្រើសរើសយកវិទ្យាល័យព្រះមុនីវង្ស ធ្វើជាទីតាំងសម្រាប់ពិគ្រោះ និងផ្តល់សេវាត្រួតពិនិត្យអ្នកដែលសង្ស័យមានផ្ទុកជំងឺកូវីដ-១៩។ បច្ចុប្បន្នខេត្តបាត់ដំបង មានអ្នកឆ្លងកូវីដ-១៩ ចំនួន៨នាក់ ដែលអ្នកឆ្លងទាំងនោះ ជាជនជាតិខ្មែរ។
រដ្ឋបាលខេត្តបាត់ដំបង សរសេរលើទំព័រហ្វេសប៊ុកថា៖«រដ្ឋបាលខេត្តបាត់ដំបង បានកំណត់យកផ្នែកអគារខាងលិចជាប់របង និងរៀបចំចំនួន៥បន្ទប់ផ្នែកជាន់ផ្ទាល់ដី ដើម្បីត្រៀមបម្រុងទុក ក្នុងការទទួលពិគ្រោះ និងការផ្តល់សេវាត្រួតពិនិត្យចំពោះបងប្អូន ដែលស្ម័គ្រចិត្តមកធ្វើតេស្ត និងបងប្អូនដែលសង្ស័យថា មានពាក់ព័ន្ធមកពីតំបន់ដែលកំពុងតែកើតជំងឺឆ្លង ដោយនៅទីនោះ មានការថែទាំ និងការផ្តល់សេវាពិគ្រោះ និងត្រួតពិនិត្យយ៉ាងម៉ត់ចត់ ពីក្រុមគ្រូពេទ្យជំនាញប្រចាំការនៅទីនះ»។
ខេត្តកំពត ដែលមានអ្នកឆ្លងជំងឺកូវីដ-១៩ ២នាក់ ជាជនជាតិម៉ាឡេស៊ី បានសម្រេចជ្រើសរើសយកវិទ្យាល័យចំណេះទូទៅ និងបច្ចេកទេសព្រះរាជសម្ភារ ធ្វើជាទីតាំងពិនិត្យ និងដាក់អ្នកផ្ទុកកូវីដ-១៩។ ខេត្តនៅជាប់មាត់សមុទ្រមួយនេះ អះអាងថា កំពុងតែពិនិត្យមើលលទ្ធភាព ក្នុងការជួលសណ្ឋាគារ ធ្វើជាទីតាំងបន្ថែមទៀត។
ខេត្តកណ្តាល បានជ្រើសរើសយកវិទ្យាល័យ ហ៊ុន សែន តាខ្មៅ ធ្វើជាកន្លែងពិនិត្យ និងព្យាបាលអ្នកផ្ទុកទៀត។ បច្ចុប្បន្នខេត្តជាប់រាជធានីភ្នំពេញមួយនេះ បានរកឃើញអ្នកផ្ទុកមេរោគកូវីដ-១៩ ចំនួន១នាក់ជាជនជាតិខ្មែរ។
ខេត្តកំពង់ស្ពឺ ជ្រើសរើសយកមជ្ឈមណ្ឌលអភិវឌ្ឍន៍ជនបទកម្ពុជា-កូរ៉េ។ លោក វ៉ី សំណាង អភិបាលខេត្តកំពង់ស្ពឺ ជំរុញឲ្យប្រជាពលរដ្ឋ ដែលទើបត្រឡប់មកពីធ្វើការនៅក្រៅប្រទេស ត្រូវទៅពិនិត្យស្វែងរក ជំងឺកូវីដ-១៩ ទាំងអស់គ្នា។ បន្ថែមលើនេះ លោក ដាស់តឿនឲ្យប្រជាពលរដ្ឋ បង្កើនការប្រុងប្រយ័ត្ន និងរក្សាអនាម័យឲ្យបានខ្ជាប់ខ្ជួន តាមរយៈការលាងដៃសម្អាតជាប្រចាំជាមួយសាប៊ូ អាល់កុល ឬជែល។ មកដល់ពេលនេះ ខេត្តកំពង់ស្ពឺ ពុំទាន់មានករណីឆ្លងកូវីដ-១៩ នៅឡើយទេ។
ខេត្តព្រៃវែង សម្រេចជ្រើសរើសយកសណ្ឋាគារចុងប៉ម, ផ្ទះសំណាក់គ្រូបង្រៀន និងសាលាបឋមសិក្សាសម្តេចតេជោ ហ៊ុន សែន ខេត្តព្រៃវែង ធ្វើជាទីតាំងពិនិត្យ ព្យាបាល និង ដាក់អ្នកផ្ទុកជំងឺកូវីដ-១៩។ ទីតាំងទាំងបីនេះ មានបន្ទប់សរុប១០៣បន្ទប់។ ខេត្តព្រៃវែង ពុំទាន់មានករណីឆ្លងនោះទេ។
ទីតាំងពិនិត្យ ព្យាបាល និងដាក់អ្នកផ្ទុកមេរោគកូវីដ-១៩ នៅខេត្តត្បូងឃ្មុំ គឺសណ្ឋាគារឆៃណាមេមត់។ បច្ចប្បន្នខេត្តនេះ រកឃើញអ្នកផ្ទុកជំងឺកូវីដ-១៩ ចំនួន៤នាក់ ជាជនជាតិខ្មែរ។
សៀមរាប ដែលជាខេត្តមានករណីឆ្លងកូវីដ-១៩ លើបុរសជនជាតិខ្មែរដំបូងគេ មិនជ្រើសរើសយកសាលារៀននោះទេ គឺកំពុងពិចារណាជួលសណ្ឋាគារ ធ្វើជាទីតាំងពិនិត្យ និងដាក់អ្នកសង្ស័យ និងអ្នកផ្ទុកមេរោគកូវីដ-១៩។ បច្ចុប្បន្នខេត្តសៀមរាប មានករណីឆ្លងកូវីដ-១៩ ២ករណីលើជនជាតិខ្មែរ។
ក្រៅពីខេត្តខាងលើ ក៏មានខេត្តមួយចំនួនទៀត កំពុងពិនិត្យនិងស្វែងរកទីតាំង ដើម្បីរៀបចំធ្វើជាកន្លែងសម្រាប់ពិនិត្យ និងដាក់អ្នកផ្ទុក និងអ្នកសង្ស័យឆ្លងកូវីដ-១៩។ គិតត្រឹមរសៀលថ្ងៃទី២៣ ខែមីនា ឆ្នាំ២០២០ កម្ពុជា រកឃើញអ្នកផ្ទុកជំងឺកូវីដ-១៩ ចំនួន៨៦នាក់ ក្នុងនោះព្យាបាលជាសះស្បើយចំនួន២នាក់ គឺបុរសជនជាតិចិន និងស្ត្រីជនជាតិអង់គ្លេស៕
Tag:
COVID-19
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
