COVID-19
អន្តរជាតិ
ប្រេសិតចិន ទាមទារឲ្យលោក ត្រាំ ឈប់ហៅ COVID-19 ជា «វីរុសរបស់ចិន» លោក Cui Tiankai អគ្គរដ្ឋទូតចិនប្រចាំនៅអាមេរិក
× តាមរយៈកិច្ចសម្ភាសជាមួយទូរទស្សន៍ HBO នាថ្ងៃទី២២ ខែមីនា លោកអគ្គរដ្ឋទូតចិនប្រចាំនៅអាមេរិក Cui Tiankai បានទាមទារឲ្យប្រធានាធិបតីអាមេរិក ដូណាល់ ត្រាំ បញ្ឈប់ការហៅកូរ៉ូណាវីរុស (COVID-19) ថាជា«វីរុសរបស់ចិន»។ អគ្គរដ្ឋទូតចិន សំអាងថា អាមេរិក គួរតែគោរពតាមការអនុវត្តរបស់អង្គការសុខភាពពិភពលោក (WHO) ដែលមិនបានទាញកូរ៉ូណាវីរុសទៅភ្ជាប់ជាមួយប្រទេសណាមួយ។
ជម្លោះរវាងអាមេរិក មិនត្រឹមតែកើតលើសេដ្ឋកិច្ចប៉ុណ្ណោះទេ ប៉ុន្តែពេលនេះក៏រាលដាលដល់រឿងហៅឈ្មោះកូរ៉ូណាវីរុស ថាជារបស់ប្រទេសណាមួយវិញម្តង។ តាមរយៈការសរសេរលើបណ្តាញសង្គម Twitter កន្លងមក ប្រធានាធិបតីអាមេរិក ដូណាល់ ត្រាំ បានហៅកូរ៉ូណាវីរុសថ្មី ថាជា «វីរុសរបស់ចិន»។ ការណ៍នេះ បានធ្វើឲ្យចិនក្តៅស្លឹកត្រចៀកយ៉ាងខ្លាំង និងថាការអះអាងរបស់លោកត្រាំ គឺជាការ «បង្ខូចកេរ្តិ៍ឈ្មោះរបស់ចិន»។ ក្រោយមកទៀត តាមរយៈសន្និសីទកាសែតស្តីពី COVID-19 នាថ្ងៃទី១៩ ខែមីនា លោក ត្រាំ បានហៅកូរ៉ូណាវីរុសថាជា «វីរុសរបស់ចិន» ម្តងទៀត។
ពាក់ព័ន្ធនឹងបញ្ហានេះ លោក Cui Tiankai អគ្គរដ្ឋទូតចិនប្រចាំនៅអាមេរិក បានបញ្ជាក់ថា លោកត្រាំ បានហៅកូរ៉ូណាវីរុស ដែលបង្កទៅជាជំងឺរលាកសួត (COVID-19) ថាជាវីរុសរបស់ចិន ម្តងហើយម្តងទៀត។ បើតាមលោកCui អាមេរិកគួរតែគោរពតាមច្បាប់របស់អង្គការសុខភាពពិភពលោក។ ក្នុងនេះន័យនេះ លោក អគ្គរដ្ឋទូតចិនប្រចាំនៅអាមេរិក បានបញ្ជាក់ថា នៅពេល WHO ហៅឈ្មោះវីរុសមួយ អង្គការមួយនេះ មិនដែលទាញភ្ជាប់វីរុសប្រភេទនោះ ទៅនឹងតំបន់ ប្រជាជន ប្រទេស ឬសូម្បីតែប្រភេទសត្វណាមួយឡើយ ហើយនេះគឺជាច្បាប់របស់អង្គការសុខភាពពិភពលោក។
មិនត្រឹមតែទទូចឲ្យប្រមុខរដ្ឋអាមេរិក ឈប់ហៅឈ្មោះមួយបែបនេះទេ លោកក៏បានអំពាវនាវឲ្យកាសែតមួយចំនួន មិនគួរទាញវីរុសណាមួយ ទៅភ្ជាប់ជាមួយដែនដីណាមួយឡើយ។
ក្រៅពីប្រតិកម្មទៅនឹងពាក្យសម្តីរបស់ប្រធានាធិបតីអាមេរិក លោក Cui ក៏បានលើកឡើងពីករណីផ្ទុះឡើង COVID-19 នៅចិននាពេលដំបូងផងដែរ។ បើតាមលោកអង្គរដ្ឋទូត ចិនមិនអាចមើលឃើញថាវាជាវីរុស ដែលកាចសាហាវនាពេលដំបូងបានឡើយ ខណៈពេលអ្នកជំងឺដំបូងមានត្រឹមតែ ៣ឬ៤នាក់ ដែលចេញរោគសញ្ញា ក្អក គ្រុនក្តៅ និងហៀរសម្បោរតែប៉ុណ្ណោះ៕
© រក្សាសិទ្ធិដោយ thmeythmey.com