ពីនេះ ពីនោះ
រូបត្លុក
×![]()
ដោយ: ថ្មីៗ
សុធីរ និងសំណាង ជជែកគ្នាលើប្រធានរកស៊ីនៅក្នុងសម័យកូវីដ១៩។ ក្នុងសម័យនេះ ជំនួញជាច្រើនបានដួលបះជើង តែក៏មានជំនួញមួយចំនួនតូចរីកចម្រើនដែរ។ តើជំនួញរីកចម្រើនក្នុងគ្រាអាសន្នទាំងនេះមានអ្វីខ្លះ? 
សំណាង៖ អា សុធីរ! អញឃើញគេលក់ថ្នាំពេទ្យ លក់ទឹកអាកុលលាងដៃ លក់ម៉ាស់ លក់អាហារបម្រុងផ្សេងៗបានលុយច្រើនណាស់។ អ្ហែងមិនទៅរកស៊ីមុខរបរហ្នឹងដូចគេដែរទៅ?
សុធីរ៖ អា សំណាង! អូហ៍ អញអត់ចេះរកស៊ីរបរហ្នឹងទេ។ អញអត់ចេះលក់ដំឡើងថ្លៃហួសហេតុពេកទេ។ អញអត់ជំនាញហ្នឹងទេ។ គេកំពុងតែពិបាក ហើយអញលក់យកចំណេញ អញអត់ចេះទេ។ បើអញលក់របស់ហ្នឹង មានតែអញឲ្យគេតែម្តង។
សំណាង៖ តែអញឃើញគេលក់ដាច់ណាស់ ហើយចំណេញច្រើនទៀត។
សុធីរ៖ គេលក់ដាច់ វាជារឿងរបស់គេ។ គេចំណេញជារឿងរបស់គេ តែអញធ្វើមិនបានទេ អា សំណាង។
សំណាង៖ បើតាមអ្ហែង មានន័យថា អ្នកលក់របស់ទាំងអស់ហ្នឹងខុសមែនឬ?
សុធីរ៖ គេលក់មិនខុសទេ។ គេលក់យកចំណេញល្មមក៏មិនខុសដែរ។ តែបើគេលក់កេងចំណេញពីព្រឹត្តិការណ៍អាសន្នរបស់មនុស្សគ្រប់គ្នា គឺជារឿងអសីលធម៌ និងអមនុស្សធម៌។ ចូរកុំកេងប្រវ័ញ្ចគេ ពេលគេមានអាសន្ន។ ដំណាក់កាលនេះ គឺជាដំណាក់កាលចែកគ្នារស់ មិនមែនដណ្តើមគ្នារស់ទេណា៎ អា សំណាង។
សំណាង៖ អើ អ្ហែងនិយាយដូចជាត្រឹមត្រូវ។ អ្នកជំនួញខ្លះ លក់កេងចំណេញកប់ក្តោង។ បើលក់យកចំណេញក្នុងក្របខ័ណ្ឌធម្មតា មិនអីទេ។ គួរតែជួយគ្នា ក្នុងគ្រាអាសន្ន មិនមែនបន់ឲ្យគេមានអាសន្ន ហើយយើងលក់កេងនោះទេ។ បន្ទាប់ពីអញស្តាប់អ្ហែងហើយ អញគិតថា ទាំងអ្ហែង ទាំងអញ មិនគួររកស៊ីរបរហ្នឹងទេ។ អ្នកផ្សេងគេអាចរកស៊ីបាន តែចូរកុំកេងប្រវ័ញ្ចគេក្នុងគ្រាប្រឈម៕
© រក្សាសិទ្ធិដោយ thmeythmey.com
