ប្រមុខ WHO ព្រមានថា បើមិនការពារសុវត្ថិភាពគ្រូពេទ្យ មនុស្សច្រើននាក់នឹងស្លាប់

COVID-19

អន្តរជាតិ

ប្រមុខ WHO ព្រមានថា បើមិនការពារសុវត្ថិភាពគ្រូពេទ្យ មនុស្សច្រើននាក់នឹងស្លាប់

25, Mar 2020 , 8:19 am

រូបភាព

អគ្គនាយកអង្គការសុខភាពពិភពលោក លោក Tedros Adhanom Ghebreyesus (AFP)

ដោយ:

អគ្គនាយកអង្គការសុខភាពពិភពលោក លោក Tedros Adhanom Ghebreyesus មានការភ្ញាក់ផ្អើលនឹងរបាយការណ៍ជាច្រើននៅជុំវិញពិភពលោកដែលរកឃើញថា បុគ្គលិកសុខាភិបាលមួយចំនួនធំបានឆ្លងជំងឺផ្លូវដង្ហើម COVID-19 និងស្លាប់ដោយសារជំងឺនេះ។ ត្រងចំណុចនេះ ប្រមុខអង្គការអន្តរជាតិរូបនេះ ក៏បានបញ្ជាក់ពីហេតុផលនៃករណីនេះផងដែរ ដែលបង្កឡើងពីកង្វះខាតបរិក្ខាការពារផ្ទាល់ខ្លួនចាំបាច់។

ក្នុងសន្និសីទព័ត៌មាននាថ្ងៃទី២៣ ខែមីនា លោកអគ្គនាយក Tedros Adhanom Ghebreyesus គូសបញ្ជាក់ថា ក្រុមគ្រូពេទ្យ អាចអនុវត្តការងារពួកគេដោយមានប្រសិទ្ធភាពបាន លុះត្រាតែពួកគេអាចធ្វើការងារពួកគេដោយសុវត្ថិភាព។ លោក សង្កត់ធ្ងន់ទៀតថា៖«ប្រសិនបើយើងពុំយកចិត្តទុកដាក់ការពារគ្រូពេទ្យទេនោះ មនុស្សកាន់តែច្រើននឹងបាត់បង់ជីវិត ព្រោះថា គ្រូពេទ្យដែលអាចជួយសង្គ្រោះជីវិតអ្នកទាំងនោះ ធ្លាក់ខ្លួនឈឺ»។

តាមទីភ្នាក់ងារព័ត៌មាន AFP ប្រមុខដឹកនាំ WHO រូបនេះ លើកឡើងទៀតថា អង្គការលោក កំពុងធ្វើការយ៉ាងជិតស្និទ្ធជាមួយប្រទេសពាក់ព័ន្ធដើម្បីពន្យល់ពីសារសំខាន់នៃសម្ភារការពារ និងដោះស្រាយបញ្ហាខ្វះខាតការផ្គត់ផ្គង់ជាសកលនៃគ្រឿងបរិក្ខារពេទ្យដ៏សំខាន់មួយនេះ។

ក្រៅពីលើកឡើងពីបញ្ហាសុវត្ថិភាពគ្រូពេទ្យនិងកង្វះខាតសម្ភារការពារ លោក Tedros ក៏បានព្រមានថា ជំងឺរាតត្បាតសាកល COVID-19 នេះ កំពុងឆ្លងរាលដាលយ៉ាងលឿនរហ័ស ដោយជាង៣៨ម៉ឺនករណីហើយ បានរកឃើញ គិតត្រឹមថ្ងៃអង្គារ ទី២៤ ខែមីនា។ ត្រង់នេះ លោក បកស្រាយថា បើគិតចាប់ពីករណី COVID-19 ដំបូងត្រូវបានគេរកឃើញ វាត្រូវការពេល៦៧ថ្ងៃ សម្រាប់ករណីឆ្លងឈានដល់១០ម៉ឺនករណី ដំបូង, ១១ថ្ងៃឈានដល់២០ម៉ឺន និងត្រឹម៤ថ្ងៃប៉ុណ្ណោះឈានដល់៣០ម៉ឺន។

ទោះជាកំណើនឆ្លងដ៏ឆាប់រហ័សបែបនេះ លោកអគ្គនាយក Tedros នៅតែបង្ហាញក្តីសង្ឃឹមក្នុងការបញ្ឈប់ជំងឺនេះបាន ដោយទទូចឲ្យបណ្ដាប្រទេសទាំងអស់អនុវត្តការធ្វើតេស្តរក COVID-19 ដ៏ត្រឹមត្រូវ និងយុទ្ធសាស្ត្រតាមរកអ្នកស្និទ្ធនឹងអ្នកជំងឺ (contact-tracing) ផងដែរ។

ម្យ៉ាងវិញទៀត លោក Tedros បានអះអាងថា ការស្នើសុំមនុស្សឲ្យស្នាក់នៅផ្ទះ និងចំណាត់ការគម្លាតពីគ្នាផ្សេងទៀត គឺពិតជាវិធីសាស្ត្រដ៏សំខាន់បំផុតក្នុងការកាត់បន្ថយការរីករាលដាលវីរុសនេះ។ ក៏ប៉ុន្តែលោក ចាត់ទុកចំណាត់ការបែបនេះថាជា «ចំណាត់ការការពារ ដែលនឹងមិនអាចឲ្យយកឈ្នះ COVID-19 ឡើយ»។

លោកសង្កត់ធ្ងន់ថា ៖«ដើម្បីយកឈ្នះ យើងត្រូវវាយប្រហារវីរុសនេះ ដោយប្រើបច្ចេកទេសខ្លាំងៗ និងចំៗគោលដៅ ដូចជា ការធ្វើតេស្តករណីសង្ស័យទាំងអស់, ដាក់នៅដាច់ដោយឡែក និងមើលថែរាល់ករណីបញ្ជាក់ទាំងអស់ និងតាមរក ព្រមទាំងធ្វើចត្តាឡីស័កអ្នកដែលសិទ្ធិនឹងអ្នកជំងឺ»។

សូមបញ្ជាក់ថា គិតត្រឹមថ្ងៃអង្គារ ទី ២៤ ខែមីនា នេះ ករណីឆ្លង COVID-19 នៅទូទាំងពិភពលោក ដែលបានរកឃើញ មាន៣៨ម៉ឺនករណី, អ្នកស្លាប់មាន ១៦៥៦៥នាក់ ខណៈជាសះស្បើយមានជាង១០ម៉ឺននាក់៕