កម្ពុជាពិនិត្យលទ្ធភាពដាក់ប្រទេស «ស្ថិតក្នុងភាពអាសន្ន» បើការទប់ស្កាត់កូវីដ១៩ គ្មានប្រសិទ្ធភាព

COVID-19

ជាតិ

កម្ពុជាពិនិត្យលទ្ធភាពដាក់ប្រទេស «ស្ថិតក្នុងភាពអាសន្ន» បើការទប់ស្កាត់កូវីដ១៩ គ្មានប្រសិទ្ធភាព

25, Mar 2020 , 10:56 am

រូបភាព

ដោយ: ថ្មីៗ

សម្តេចនាយករដ្ឋមន្ត្រី ហ៊ុន សែន កំពុងឲ្យក្រុមអ្នកច្បាប់ ពិនិត្យលទ្ធភាពនៃការប្រើមាត្រា២២ (ថ្មី) នៃរដ្ឋធម្មនុញ្ញ ដើម្បីទូលថ្វាយព្រះមហាក្សត្រ សុំដាក់ប្រទេសក្នុងគ្រាមានអាសន្ន។

ក្នុងពិធីជួបសំណេះសំណាលជាមួយក្រុមគ្រួពេទ្យស្ម័គ្រចិត្តជាង៤០០នាក់ ដែលចូលរួមប្រយុទ្ធប្រឆាំងនឹងជំងឺកូវីដ-១៩ នាព្រឹកថ្ងៃទី២៥ ខែមីនា ឆ្នាំ២០២០ សម្តេចនាយករដ្ឋមន្ត្រី បានលើកពីមាត្រា២២ (ថ្មី) នៃរដ្ឋធម្មនុញ្ញថា «នៅពេលប្រជាជាតិប្រឈមមុខនឹងគ្រោះថ្នាក់ ព្រះមហាក្សត្រទ្រង់ប្រកាសប្រទានដំណឹងជាសាធារណៈ ដាក់ប្រទេសជាតិស្ថិតនៅក្នុងភាពអាសន្នក្រោយពីបានមតិឯកភាពពី នាយករដ្ឋមន្ត្រី ប្រធានរដ្ឋសភា និង ប្រធានព្រឹទ្ធសភា»។

សំឡេង

លើកពីមាត្រា២២(ថ្មី) នៃរដ្ឋធម្មនុញ្ញរួចហើយ ប្រមុខរដ្ឋាភិបាល ក៏ប្រកាសថា៖«ដូច្នេះ ខ្ញុំ ក៏អាចសុំការឯកភាពពីប្រធានរដ្ឋសភា ប្រធានព្រឹទ្ធសភា និង ស្នើសុំព្រះមហាក្សត្រ ចេញព្រះរាជក្រឹត្យ ដាក់ប្រទេសក្នុងគ្រាមានសអាសន្ន»។

យ៉ាងណា ប្រមុខរដ្ឋាភិបាល អះអាងថា មិនចង់ប្រើមាត្រា២២ (ថ្មី) នេះឡើយ ប៉ុន្តែ បើការអំពាវនាវរបស់លោក ក្នុងការទប់ស្កាត់កូវីដ-១៩ គ្មានប្រសិទ្ធភាព លោក នឹងប្រើមាត្រានេះជាចាំបាច់។

បច្ចុប្បន្ន កម្ពូជា រកឃើញមនុស្ស៩៣នាក់ហើយ ដែលឆ្លងកូវីដ-១៩ ដោយក្នុងនោះ មាន៦នាក់ បានជាសះស្បើយវិញ៕