COVID-19៖ ឥណ្ឌូណេស៊ី លុបចោលការប្រលងថ្នាក់ជាតិរបស់សិស្សជាង៨លាននាក់

COVID-19

អន្តរជាតិ

COVID-19៖ ឥណ្ឌូណេស៊ី លុបចោលការប្រលងថ្នាក់ជាតិរបស់សិស្សជាង៨លាននាក់

25, Mar 2020 , 9:19 pm

រូបភាព

សិស្សឥណ្ឌូណេស៊ី នៅទីក្រុង ហ្សាការតា ប្រភពរូប៖ AFP

ដោយ:

ប្រទេស ឥណ្ឌូណេស៊ី បានសម្រេចលុបចោលការប្រលងថ្នាក់ជាតិដែលគ្រោងទុក ដោយបារម្ភអំពីការរីករាលដាលនៃជំងឺផ្លូវដង្ហើម COVID-19 ។ ចំណាត់ការបែបនេះ នឹងប៉ះពាល់ដល់សិស្សវិទ្យាល័យជាង៨លាននាក់ ។ រដ្ឋមន្ត្រីអប់រំឥណ្ឌូណេស៊ី Nadiem Makarim លើកឡើងបែបនេះ នៅថ្ងៃអង្គារ ទី២៤ ខែមីនា។

«រឿងដ៏សំខាន់បំផុតនោះគឺ សុវត្ថិភាព និងសុខភាពរបស់សិស្សយើង និងក្រុមគ្រួសារ ជីដូនជីតាពួកគេ»។ លោករដ្ឋមន្ត្រី Nadiem Makarim បញ្ជាក់បែបនេះលើកញ្ចក់ទូរទស្សន៍។ លោក បន្តទៀតថា ការប្រលងដែលរៀបចំដោយសាលាឯកជន ដែលដាច់ដោយឡែកពីការប្រលងថ្នាក់ជាតិនោះ អាចប្រព្រឹត្តទៅបានតាមរយៈប្រព័ន្ធអនឡាញ។

តាមការចុះផ្សាយរបស់ទីភ្នាក់ងារព័ត៌មាន Reuters ការប្រលងថ្នាក់ជាតិរបស់ឥណ្ឌូណេស៊ី គ្រោងរៀបចំឡើងជាពីរដំណាក់កាល ដែលចាប់ផ្ដើមនៅថ្ងៃ ៣០ ខែមីនា និងថ្ងៃ ២០ ខែមេសា។ យ៉ាងណាមិញ រដ្ឋមន្ត្រីអប់រំឥណ្ឌូណេស៊ីរូបនេះ ពុំបានបញ្ជាក់ពីពេលវេលារៀបចំការប្រលងថ្នាក់ជាតិឡើងវិញឡើយ។

ការសម្រេចចិត្តលុបចោលការប្រលងថ្នាក់ជាតិនេះ ធ្វើឡើងខណៈប្រទេសក្នុងតំបន់អាស៊ីអាគ្នេយ៍មួយនេះ បានប្រកាសករណីឆ្លងខ្ពស់បំផុតប្រចាំថ្ងៃចំនួន១០៧ នៅថ្ងៃទី២៤ ខែមីនា ដោយបង្កើនករណីឆ្លងសរុបចំនួន ៦៨៦នាក់ហើយ។ គិតត្រឹមថ្ងៃពុធ ២៥ ខែមីនានេះ អ្នកស្លាប់ដោយសារ COVID-19 មាន៥៥នាក់ ខណៈអ្នកជាសះស្បើយមាន៣០នាក់។

សូមបញ្ជាក់ថា ខេត្តមួយចំនួនក្នុងប្រទេសឥណ្ឌូណេស៊ី បានសម្រេចបិទសាលារៀន ដោយសារការរីករាលដាលនៃជំងឺ COVID-19 ដែលក្នុងនោះមាន ខេត្ត ជ្វាភាគខាងលិច (West Java) ដែលជាខេត្តមានប្រជាជនរស់នៅច្រើនបំផុតរបស់ប្រទេសនេះ (ជិត៥០លាននាក់) ។ ចំណែករដ្ឋធានី ហ្សាការតា បានប្រកាសដាក់ភាពអាសន្ន៕