COVID-19
ជាតិ
COVID-19៖ នៅពេលដែលមនុស្សខ្លាចលុយ… តែនៅត្រូវការវាដដែល!
×
លិខិតមិត្តអ្នកអាន
ចាប់តាំងពីមេរោគកូវីដ១៩វាយលុយគ្រប់ប្រទេស និងកម្ពុជាមក របៀបរស់នៅរបស់មនុស្ស សកម្មភាពជំនួញ ប្រពៃណី ត្រូវបានផ្លាស់ប្តូរឲ្យស្របទៅនឹងការវិវត្តនៃមេរោគមួយនេះដែរ។ ដោយគេគិតថា លុយ ដែលជាក្រដាសប្រាក់ចរាចរពីមនុស្សម្នាក់ទៅមនុស្សម្នាក់ទៀត អាចជាភ្នាក់ងារចម្លងមេរោគដ៏សំខាន់ដែរនោះ អ្នកផ្តល់លុយ និងអ្នកទទួលលុយសុទ្ធតែបានប្រយ័ត្នរៀងៗខ្លួន។
ប្រយ័ត្ន និងបង្ការ គឺជារឿង ល្អ និងត្រឹមត្រូវ។ អ្នករាប់លុយខ្លះ រាប់លុយហើយភ្លាម ក៏បាច់ទឹកអាកុលលើបាតដៃសម្លាប់មេរោគភ្លាម។ នេះ គឺជាវិធីមួយដែរ!។
នៅតាមផ្សារខ្លះនៅរាជធានីភ្នំពេញ អ្នកលក់ពាក់ស្រោមដៃខ្លួនឯង តែមិនទទួលយកលុយពីអ្នកទិញឡើយ គាត់ដាក់ថង់ប្លាស្ទិកនៅពីមុខគាត់ រួចគាត់ឲ្យអ្នកទិញទម្លាក់លុយចូលក្នុងថង់ ហើយបើត្រូវអាប់វិញ អ្នកទិញខ្លួនឯងអាចអាប់ដោយខ្លួនឯងបាន។ នេះ គឺជាវិធីបង្ការផ្សេងមួយទៀតដែរ។
វិធីខ្លះទៀត អ្នកទទួលយកលុយពាក់ស្រោមដៃ ហើយទទួលលុយទៅវិញទៅមកជាមួយអតិថិជន។ ចុះអតិថិជន(អ្នកទទួលលុយអាប់ត្រឡប់មកវិញ)? អតិថិជនខ្លះ ទទួលយកលុយអាប់មក រួចដាក់ចូលក្នុងកាបូប រួចលាងដៃជាមួយទឹកអាកុលភ្លាម។ ពេលមកដល់ផ្ទះ គេក៏ដកលុយចេញពីកាបូប រួចយកលុយទៅហាលថ្ងៃដើម្បីសម្លាប់មេរោគ មុននឹងលាងដៃជាមួយទឹកអាកុលម្តងទៀត។ គេហាលជាច្រើនម៉ោងទើបគេយកលុយនោះមកប្រើប្រាស់ឡើងវិញ។ នេះ ក៏ជាវិធីកំចាត់មេរោគម្យ៉ាងដែរ។ មានប្រសិទ្ធិភាព ឬមិនមាន គ្មាននរណាដឹងទេ តែជាវិធីបង្ការរបស់ពលរដ្ឋ។ អ្នកខ្លះទៀត ដូរលុយគ្រប់ប្រភេទទុកចំណាយ ដូច្នេះ ពេលចំណាយ គេមានលុយគ្រប់កម្រិតតែម្តង ព្រោះ គេមិនចង់ទទួលយកលុយអាប់ត្រឡប់មកវិញ។ ម្យ៉ាងដែរ!
វិធីម្យ៉ាងទៀតដែលខ្ញុំឃើញ គឺថា គេទូទាត់លុយតាមប្រព័ន្ធអេឡិចត្រូនិក ប្រព័ន្ធនេះល្អមែន ហើយវារឹតតែល្អ ក្នុងសម័យកាលកូវីដនេះតែម្តង! អ្នកទិញ និងអ្នកលក់មិនចាំបាច់ជួបគ្នា មិនចាំបាច់ហុចលុយឲ្យគ្នាទៅវិញទៅមកទេ។ គិតសព្វៗទៅ មានតែពេលនេះទេដែលមនុស្សខ្លាចលុយ តែនៅត្រូវការវាដដែល។ ពេលនេះ កូវីដ-១៩ កំពុងផ្លាស់ប្តូរការគិត និងទម្លាប់របស់ពលរដ្ឋ៕
(លោក លឹម រតនា ពលរដ្ឋភ្នំពេញ)
© រក្សាសិទ្ធិដោយ thmeythmey.com