អឺរ៉ុបត្រូវបានគេជឿជាក់ថាជាប្រទេសមានឥទ្ធិពលខាងហិរញ្ញវត្ថុក្នុងវិស័យកីឡាបាល់ទាត់។ ប៉ុន្តែផលប៉ះពាល់សេដ្ឋកិច្ចដោយសារជំងឺរាតត្បាត COVID-19 កំពុងបង្កឲ្យមានផលប៉ះពាល់ និងមហន្តរាយដល់ក្លិបនានាទូទាំងទ្វីបមួយនេះ។
កីឡាករ Bayern Munich នៃលីគកីឡាបាល់ទាត់កំពូលអាល្លឺម៉ង់ដែលជាក្លិបមានឈ្មោះល្បីមួយលើលោក ត្រូវបានគេរាយការណ៍ថា យល់ព្រមកាត់បន្ថយប្រាក់ខែរៀងៗខ្លួនក្រោយវិបត្តិ COVID-19 ។ ការកាត់ប្រាក់ឈ្នួលនេះ ប្រហែលជាមិនប៉ះពាល់ខ្លាំងដល់កីឡាករប៉ុន្មាននោះទេ ប៉ុន្តែបញ្ហាចោទគឺចំណូល។ យើងអាចស្រមៃមើលថានៅក្នុងហាងសម្ភារកីឡាធំមួយបែរជាលែងដំណើរការសោះ។
ក្លិបជាច្រើនខ្វះទុនបម្រុងដើម្បីឲ្យពួកគេឆ្លងកាត់អំឡុងពេលមានវិបត្តិ ខណៈមិនមានប្រាក់ចំណូលចូលទាល់តែសោះ។ ឧទាហរណ៍ ក្លិបបាល់ទាត់នៅស្កុតឡែន គឺពឹងផ្អែកយ៉ាងខ្លាំងលើការលក់សំបុត្រចូលទស្សនាការប្រកួត ដូច្នេះពេលនេះពួកគេមិនមាននិរន្តរភាពនៃប្រាក់ចំណូលឡើយ ក្រោយផ្អាកការប្រកួតបណ្តោះអាសន្ន។
លីគកីឡាបាល់ទាត់នៅអឺរ៉ុប និងលីគក្នុងតំបន់ផ្សេងទៀត ត្រូវបានប្រកាសឲ្យពន្យារពេលប្រកូតជាច្រើនខែ ដោយសារការផ្ទុះឡើងខ្លាំងនៃជំងឺរលាកសួតបង្កដោយកូរ៉ូណាប្រភេទថ្មី ដែលសម្លាប់មនុស្សជាង២ម៉ឺននាក់ និងឆ្លងជាងបួនសែននាក់នាពេលបច្ចុប្បន្ននេះ។
លោក Dave Cormack ប្រធានក្លិប Aberdeen នៃលីគកំពូលស្កុតឡែន បានព្យាករណ៍ថាក្លិបលោកនឹងប្រឈមការចំណាយដល់ទៅ៦លានដុល្លារអាមេរិក ក្នុងរយៈពេលប៉ុន្មានខែខាងមុខ ស្របពេលគ្មានចំណូល។
សូម្បីតែលីគគ្រប់កម្រិតនៅអាល្លឺម៉ង់ (DFL) ក្នុងនោះរួមទាំង Bundesliga ផង ដែលរកប្រាក់ចំណេញប្រចាំឆ្នាំជាង៤ពាន់លានដុល្លារអាមេរិក ក៏រអានឹងគ្រោះមហន្តរាយដែលបង្កដោយជំងឺឆ្លង COVID-19 នេះដែរ។
«ប្រសិនបើយើងមិនមានការប្រកួតដោយបិទទ្វារកីឡដ្ឋានឲ្យបានឆាប់ទេនោះ គ្មានអ្វីគួរឲ្យឆ្ងល់ឡើយថាតើលីគដែលមាន ១៨ក្រុម ឬ ២០ក្រុមនឹងទៅជាយ៉ាងណា។ ពិតណាស់ នឹងមិនមានក្លិបអាជីពដែលមាន ១៨ ឬ ២០ក្រុមនោះទៀតទេ»។ នេះជាការរៀបរាប់របស់លោក Christian Seifert នាយកប្រតិបត្តិ DFL ដោយលោកសង្កត់ធ្ងន់ថាបើគ្មានដំណោះស្រាយទេ នឹងមានក្លិបក្ស័យធនមិនខាន។
រហូតមកទល់ពេលនេះ មិនមែនមានតែកីឡាបាល់ទាត់ទេដែលរងគ្រោះដោយសារ COVID-19។ កម្មវិធីកីឡាធំៗជុំវិញពិភពលោកសុទ្ធតែត្រូវបានផ្អាកទាំងស្រុង ហើយកីឡាលំដាប់ពិភពលោកអូឡាំពិក ក្រុងតូក្យូ ឆ្នាំ២០២០ ដែលរៀបចំរៀងរាល់៤ឆ្នាំម្តងក៏ត្រូវពន្យារពេលទៅឆ្នាំក្រោយដែរ។
គិតត្រឹមថ្ងៃទី២៦ ខែមីនានេះ COVID-19 បានសម្លាប់មនុស្សចំនួនជាងពីរម៉ឺននាក់ ឆ្លង ៤៧១៣១១ករណី និងសះស្បើយ ១១៤៦៤២ករណី។ អ៊ីតាលី និងអេស្ប៉ាញមានអ្នកស្លាប់ច្រើនជាងគេ ពោលគឺលើសចិនដែលជាកន្លែងផ្ទុះជំងឺមុនគេទៅទៀត៕