COVID-19
ជាតិ
ក្រុមល្បាត និងអភិរក្សធនធានធម្មជាតិមានសារសំខាន់ណាស់ ក្នុងពេលជំងឺ កូវីដ-១៩ កំពុងរាតត្បាត រូបភាពដោយ៖ វង្ស សាវឿន និងឈួន ឆន
×
ដោយ៖ ជា សីលា USAID / Wonders of the Mekong
ក្នុងពេលនៃការរីករាលដាលជំងឺរាតត្បាតជាសាកល កូវីដ-១៩ ក្រុមល្បាតរបស់សហគមន៍នេសាទ និងមន្ត្រីឧទ្យានុរក្ស ក្រោមការដឹកនាំរបស់មន្ត្រីខណ្ឌរដ្ឋបាលជលផលស្ទឹងត្រែង និងមន្ត្រីមន្ទីរបរិស្ថានខេត្តស្ទឹងត្រែង នៅតែបន្តអនុវត្តភារកិច្ចចុះល្បាតតាមដងទន្លេមេគង្គ ក្នុងតំបន់រ៉ាមសារ និងច្រករបៀងអភិរក្សជីវៈចម្រុះ ដែលជាដែនជម្រកសត្វព្រៃ មច្ឆជាតិ និងសត្វស្លាបជាច្រើនប្រភេទ យ៉ាងសស្រាក់សស្រាំ។
លោក វង្ស សាវឿន នាយរងខណ្ឌជលផលខេត្តស្ទឹងត្រែង បានលើកឡើងថា «ទោះបីជា វីរុសកូវីដ-១៩ កំពុងតែធ្វើឲ្យមានការភ្ញាក់ផ្អើលយ៉ាងណាក៏ដោយ ក៏ក្រុមការងារចម្រុះអភិរក្សធនធានជលផល នៅតែបន្តបង្ក្រាបបទល្មើសជលផល ក្នុងដែនសមត្ថកិច្ចរបស់ខ្លួនប្រកបដោយលទ្ធផលជាផ្លែផ្កាដែរ»។
ជនទុច្ចរិតតែងឆ្លៀតឱកាសលួចប្រព្រឹត្តបទល្មើស គ្រប់ពេលវេលា និងគ្រប់រូបភាពតាមតែពួកគេអាចធ្វើបាន ដូចជា ឆក់ត្រី គប់គ្រាប់បែក ឆ្លុះបាញ់ត្រី លួចចាប់សត្វ និងកាប់ទន្ទ្រានព្រៃយកដីធ្វើកសិកម្ម នៅក្នុងតំបន់ការពារជាដើម។ ដូច្នេះ ក្រុមល្បាតត្រូវតែចុះល្បាតជាប្រចាំ ដើម្បីទប់ស្កាត់បទល្មើសទាំងអស់នេះ។
ស្របពេលនេះ នៅក្នុងស្ថានភាពរីករាលដាលនៃជំងឺរាតត្បាតកូវីដ-១៩ ពួកគាត់ក៏មិនភ្លេចរក្សាអនាម័យឡើយ ដោយអនុវត្តនូវការលាងដៃឲ្យបានញឹកញាប់ ជាមួយសាប៊ូ ប្រើក្រមាខ្ទប់មាត់ និងច្រមុះ ពេលកណ្តាស់ ឬក្អក មិនប៉ះពាល់មុខ ភ្នែក ច្រមុះ មាត់ និងព្រមទាំងញ៉ាំតែអាហារណាដែលចម្អិនបានល្អ។
លោក ឈួន ឆន នាយករងតំបន់រ៉ាមសារខេត្តស្ទឹងត្រែង បានអំពាវនាវដល់បងប្អូនជនរួមជាតិថា៖ «សូមចូលរួមថែរក្សាសម្បត្តិធម្មជាតិ របស់ដូនតាយើងទាំងអស់គ្នា ពិសេសតំបន់រ៉ាមសារស្ទឹងត្រែង ដែលមានប្រភេទត្រីប្រមាណ១៣០ប្រភេទ សត្វស្លាបជាង៩០ប្រភេទ មានអន្លង់អភិរក្សត្រីមេពូជសំខាន់ៗ ៩២ អន្លង់»។
ក្នុងអំឡុងពេលចុះបំពេញភារកិច្ច លោកទាំងពីរតែងរំលឹកដល់ក្រុមការងារ ក៏ដូចជាប្រជាជនក្នុងមូលដ្ឋាន ខេត្តស្ទឹងត្រែង ឲ្យចូលរួមអនុវត្តអនាម័យ ដោយលាងដៃឲ្យបានញឹកញាប់ក្នុងពេលបំពេញភារកិច្ច ក៏ដូចជាក្នុងជីវភាពប្រចាំថ្ងៃ ដើម្បីការពារខ្លួនពីជំងឺរាតត្បាតកូវីត-១៩។ សូមថ្លែងអំណរគុណដល់បុគ្គលឆ្នើមទាំងអស់នេះ ដែលបន្តភារកិច្ចរបស់ខ្លួនយ៉ាងអង់អាចក្លាហាន ដើម្បីការពារធនធានធម្មជាតិ នៅក្នុងប្រទេសកម្ពុជាយើង៕
រូបភាពដោយ៖ វង្ស សាវឿន និងឈួន ឆន
© រក្សាសិទ្ធិដោយ thmeythmey.com