កីឡាករ Bayern និង Dortmund សុខចិត្ត​កាត់​ប្រាក់ខែ អំឡុង COVID-19 រាតត្បាត​
COVID-19
កីឡាអន្តរជាតិ
អន្តរជាតិ
កីឡាករ Bayern និង Dortmund សុខចិត្ត​កាត់​ប្រាក់ខែ អំឡុង COVID-19 រាតត្បាត​
26, Mar 2020 , 5:06 pm        
រូបភាព
​កីឡាករ និង​នាយក​ក្លិប Bayern Munich និង Borussia Dortmund សុទ្ធតែ​យល់ព្រម​កាត់បន្ថយ​ប្រាក់​ឈ្នួល​បណ្តោះអាសន្ន អំឡុងពេល COVID-19 រាតត្បាត​។ ដោយសារ​ជី​ងឺ​ឆ្លង​ដ៏​កាច​សាហាវ​នេះ លី​គ​បាល់ទាត់​ធំៗ​នៅ​អឺរ៉ុប​ត្រូវ​ផ្អាក​ការប្រកួត​មួយរយៈ​ដែល​នាំ​ឲ្យ​ក្លិប​បាត់​ចំណូល​ផង​។​


 
​ក្លិប​យក្ស​នៃ​លី​គ​កំពូល​អាល្លឺម៉ង់ Bundesliga ទាំងពីរ​អះអាងថា ការធ្វើ​បែបនេះ​គឺ​ដើម្បី​ជួយ​ដល់​បុគ្គលិក​ផ្សេងទៀត​ដែល​ស្ថិតក្រោម​ការចំណាយ​រប​ស់​ក្លិប ស្របពេល​ពេល​មាន​វិបត្តិ COVID-19 កំពុង​រាលដាល​កាន់តែខ្លាំង​។​
 
​កីឡាករ​របស់ Bayern Munich នឹង​កាត់​ប្រាក់​ឈ្នួល​រៀងៗ​ខ្លួន​ចំនួន ២០​ភាគរយ ខណៈដែល​កីឡាករ Dortmund នឹង​បន្ថយ​ប្រាក់​ឈ្នួល​របស់​ពួកគេ​ឲ្យ​តិចជាង​សព្វដង​។ ការសម្រេច​កាត់​ប្រាក់​ឈ្នួល​នេះ ក៏​ព្រោះតែ​ការប្រកួត​ក្នុង​ក្របខណ្ឌ Bundesliga និង​កម្មវិធី​ផ្សេងទៀត​បាន​ផ្អាក​ចាប់តាំងពី​ថ្ងៃទី​៨ ខែមីនា រហូត​បច្ចុប្បន្ន និង​បន្ត​ទៅមុខ​រាប់​ខែ​ទៀត​។​
 
​ដោយឡែក ជម្រើស​១១​នាក់​ដំបូង​របស់​ក្រុម Union Berlin នៃ​លី​គ​កំពូល​អាល្លឺម៉ង់​នេះដែរ អះអាងថា​ពួកគេ​នឹងមិន​យកប្រាក់​ឈ្នួល​ពី​ក្លិប​ឡើយ អំឡុងពេល​ស្ថានភាព​ដ៏​លំបាក ដែល​បង្កឡើង​ដោយ​ជំងឺ​រលាក​សួត​បង្កដោយ​កូ​រ៉ូ​ណា​ប្រភេទ​ថ្មី​ដ៏​កាច​សាហាវ​។ តែ​យ៉ាងណាក៏ដោយ កីឡាករ​ទាំង​១១​នាក់​នេះ មិនទាន់​បញ្ជាក់​ពី​រយៈ​ពេលដែល​ពួកគេ​នឹងមិន​យកប្រាក់​ឈ្នួល​នៅឡើយ​។​
 
​ស្របពេល​គ្នា​នេះដែរ អ្នកគ្រប់គ្រង និង​បុគ្គលិក​របស់​ក្លិប​ក៏បាន​យល់ព្រម​លើ​ការរៀបចំ​ការងារ​ក្រៅ​ម៉ោង ដើម្បី​កាត់​ប្រាក់ខែ​ពួកគេ​ផងដែរ​។ ការធ្វើ​បែបនេះ គឺ​ដើម្បី​រួបរួមគ្នា​ជួយ​ដល់​ក្លិប​ដែល​គ្មាន​ចំណូល និង​ត្រៀមខ្លួន​សម្រាប់​ការបន្ត​ប្រតិបត្តិការ​នៅ Bundesliga ឲ្យ​បាន​ពេញ​ម៉ោង​ដូច​ធម្មតា​នាពេលខាងមុខ​។​
 
​រហូតមក​ដល់ពេល អាល្លឺម៉ង់​មាន​ចំនួន​អ្នកស្លាប់ ២០៦​នាក់ ឆ្លង ៣៧៣២៣​ករណី និង​សះស្បើយ ៣៥៤៧​ករណី​៕

Tag:
 COVID-19
  Bundesliga
  Bayern Munich
  Borussia Dortmund
© រក្សាសិទ្ធិដោយ thmeythmey.com