COVID-19
អន្តរជាតិ
COVID-19៖ នាយករដ្ឋមន្ត្រីសិង្ហបុរី ទទូចឲ្យពលរដ្ឋមកពីបរទេស ដាក់ចត្តាឡីស័កខ្លួនឯង
នាយករដ្ឋមន្រ្តីសិង្ហបុរី លោក លី សៀនឡុង។ រូបភាព៖ LIANHE ZAOBAO
×![]()
ដោយ: ធៀន ភារិន្ទ
នាថ្ងៃទី២៥ ខែមីនា នាយករដ្ឋមន្ត្រីសិង្ហបុរី លីសៀន ឡុង បានអំពាវនាវឲ្យពលរដ្ឋសិង្ហបុរីទាំងអស់ ដែលទើបត្រលប់មកពីបរទេស ដាក់ចត្តាឡីស័កខ្លួនឯងសិន ដើម្បីការពារក្រុមគ្រួសារ អ្នកដទៃពីការឆ្លងជំងឺរលាកសួត ដែលបង្កដោយកូរ៉ូណាវីរុស (COVID-19)។ ចំណែកប្រជាជនក្នុងស្រុក ក៏ត្រូវស្នាក់នៅផ្ទះបណ្តោះអាសន្នដែរ ដើម្បីជៀសវាងការឆ្លង COVID-19។ 
តាមការសរសេរនៅលើបណ្តាញសង្គម Facebook លោកលី សៀនឡុង នាយករដ្ឋមន្ត្រីសិង្ហបុរី បានស្នើឲ្យប្រជាពលរដ្ឋទាំងអស់ ដែលទើបត្រលប់មកពីបរទេស ស្នាក់នៅផ្ទះ ឬដាក់ចត្តាឡីស័ករបស់ខ្លួនសិន ដើម្បីការពារកុំឲ្យឆ្លងទៅអ្នកដទៃ ឬក្រុមគ្រួសាររបស់ខ្លួន។ នេះជាវិធានការថ្មី ដើម្បីដោះស្រាយការកើនឡើងករណីឆ្លងនៅសិង្ហបុរីដែលភាគច្រើនបណ្ដាលមកពីពលរដ្ឋត្រឡប់ចូលប្រទេសវិញ។
«អ្នកត្រូវតែការពារគ្រួសាររបស់អ្នក និងអ្នកដទៃទៀត។ បើសិនបើអ្នកទៅក្រៅ ហើយឆ្លង COVID-19 ពេលត្រលប់មកផ្ទះវិញ មនុស្សមួយចំនួន នឹងឆ្លងជំងឺមួយនេះ»។ នេះជាសំណេរលើ Facebook របស់លោក លី ។
ជាមួយគ្នា លោក លី ក៏សរសើរប្រជាពលរដ្ឋមួយចំនួន ដែលទើបតែត្រលប់មកពីបរទេស និងចេះដាក់ចត្តាឡីស័ករបស់ខ្លួនដែរ ដែលនេះ គឺជាកាយវិការនៃការទទួលខុសត្រូវរបស់ប្រជាពលរដ្ឋ។ យ៉ាងណាក៏ដោយ លោកនៅតែទទូចឲ្យប្រជាពលរដ្ឋសិង្ហបុរីទាំងអស់ ស្នាក់នៅផ្ទះ ឬដាក់ចត្តាឡីស័ក ក្នុងអំឡុងពេលប្រទេសមានបញ្ហាអាសន្ន បើមិនដូច្នោះទេ អ្នកទាំងនោះ នឹងត្រូវប្រឈមមុខច្បាប់។
ដើម្បីទប់ស្កាត់ការរាតត្បាតCOVID-19 សិង្ហបុរី បានចាត់វិធានការយ៉ាងតឹងរ៉ឹង ដូចជាឲ្យប្រជាជនស្នាក់នៅផ្ទះក្នុងរយៈពេល ១៤ថ្ងៃ និងរឹតត្បិតការធ្វើដំណើរនៅក្នុងប្រទេសជាដើម។ ប្រសិនបើមាននរណាបំពានបទបញ្ជានេះ អ្នកទាំងនោះនឹងត្រូវពិន័យជាប្រាក់រហូតដល់ជិត ៧ពាន់ដុល្លារ និងអាចប្រឈមនឹងជាប់ពន្ធនាគាររហូតដល់ ៦ខែ។
សូមបញ្ជាក់ថា គិតត្រឹមថ្ងៃទី២៥ ខែមីនា សិង្ហបុរី បានរកឃើញ COVID-19 សរុប ៦៣១ករណី។ ក្នុងចំនួនជាង ៦០០ករណីនេះ សិង្ហបុរី មានអ្នកស្លាប់ ២ករណី និងអ្នកជាសះស្បើយ ១៦០ករណី៕
Tag:
សិង្ហបុរី
COVID-19
© រក្សាសិទ្ធិដោយ thmeythmey.com
