ជាតិ
វីដេអូ
×![]()
ភ្នំពេញ៖ កញ្ញា នួន បុប្ផា ជាជនរងគ្រោះដោយគ្រាប់មីនមួយរូប ក្នុងចំណោមជនរងគ្រោះជាច្រើនទៀតនៅកម្ពុជា។ បុប្ផា បានបាត់បង់ជើងស្តាំ តាំងពីនាងនៅក្មេងម្ល៉េះ គឺនៅក្នុងឆ្នាំ២០០៤។ បច្ចុប្បន្ន នាងមានវ័យ២៧ឆ្នាំ កំពុងប្រកបការងារកាត់ដេរសម្លៀកបំពាក់យ៉ាងរីករាយ នៅហាងកាត់ដេរមួយកន្លែងនៅរាជធានីភ្នំពេញ។ ការងារកាត់ដេរ ដែលបានផ្តល់ចំណូលសមរម្យឲ្យនាង អាចជួយជួយផ្គត់ផ្គង់ជីវភាពគ្រួសារនៅឯស្រុកកំណើត។ 
ដើម្បីជ្រាបច្បាស់ សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey.com ជាមួយកញ្ញា បុប្ផា ស្ត្រីពិការជើងជាជាងកាត់ដេរដូចតទៅ៖
ជាកូនទី៥ ក្នុងចំណោមបងប្អូន ៩នាក់ កញ្ញា នួន បុប្ផា បានបាត់បង់ជើងខាងស្ដាំត្រឹមជង្គង់ ដោយសាររត់ជាន់គ្រាប់មីន កាលពីឆ្នាំ២០០៤។ កាលនៅវ័យក្មេង ការពិការជើងនេះ មិនបានធ្វើឲ្យកញ្ញា បុប្ផា បាក់ទឹកចិត្តឡើយ ប៉ុន្តែនៅពេលវ័យវិវត្តន៍ បានធ្វើឲ្យ បុប្ផា តូចចិត្តនឹងខ្លួនឯង ដែលជាបន្ទុករបស់គ្រួសារ។
ក្នុងបទសម្ភាសជាមួយសារព័ត៌មានថ្មីៗ ស្ត្រីវ័យ២៧ឆ្នាំរូបនេះ អះអាងថា ធ្លាប់ចង់សម្លាប់ខ្លួនចំនួន ៣លើកផងដែរ។ កញ្ញា នួន បុប្ផា រៀបរាប់ដូច្នេះ៖ «ខ្ញុំលួចសម្លាប់ខ្លួន៣ដង។ ពេលក្រោយៗទៀត បន្ទាប់ពីចេញពីផ្ទះ មកខាងក្រៅ ទើបខ្ញុំឃើញថា មានអ្នកផ្សេង គេពិបាកឬពិបាកជាងយើងទៀត។ ពេលនោះ ធ្វើឲ្យខ្ញុំមានទឹកចិត្តខំប្រឹងរើបម្រាសខ្លួនឯងឲ្យដូចសព្វថ្ងៃ តាំងពីពេលនោះមក ខ្ញុំក៏បានសុំអ្នកមានគុណ ដើម្បីមករៀនជំនាញមួយ នៅអង្គការជនពិការ»។
ក្រុមគ្រួសារជាផ្នែកមួយដ៏ធំ ដែលជំរុញទឹកចិត្ត បុប្ផា ឲ្យខំប្រឹងតទៅមុខទៀត បើទោះបីជានាងពិការក៏ដោយ។ ក្រោយមានការងារល្អ និងសង្គមឲ្យតម្លៃ កញ្ញា បុប្ផា លែងមានគំនិតចង់សម្លាប់ខ្លួន និងប្រឹងប្រែង ដើម្បីជីវិត និងគ្រួសារ។ កញ្ញា បុប្ផា ដែលមានស្រុកកំណើតនៅខេត្តកំពង់ចាមរូបនេះ បញ្ជាក់ថា៖ «ខ្ញុំមានមោទនភាពចំពោះខ្លួនឯង ព្រោះសព្វថ្ងៃ ខ្ញុំបានធ្វើការរកលុយជូនដល់គ្រួសារខ្លះ និងសម្រាប់ផ្គត់ផ្គង់ខ្លួនឯង ដូច្នេះធ្វើឲ្យខ្ញុំមានមោទនភាពនឹងខ្លួនឯង»។
«សព្វថ្ងៃនេះ ខ្ញុំគិតថាខ្ញុំពិការ មិនមែនរឿងអីសំខាន់ទេ ព្រោះវាជាធម្មជាតិរបស់ខ្ញុំយូរហើយ ខ្ញុំអាចទទួលយកវាបាន។ ទោះបីអ្នកផ្សេងមើលមក ថាយើងពិការ ប៉ុន្តែខ្ញុំមានអារម្មណ៍ថា គេជាសិទ្ធិរបស់គេ គេគិតក្នុងចិត្តគេ យើងពិការមែន ប៉ុន្តែបេះដូងយើងមិនពិការទេ។ យើងត្រូវតែខំប្រឹង ដើម្បីជីវិតយើង និងគ្រួសាររបស់យើង យើងកុំគិតពីអ្នកផ្សេង បើគេមើលងាយយើង ឲ្យគេមើលចុះ តែយើងកុំមើលងាយខ្លួនឯង»។ នេះជាការលើកឡើងរបស់កញ្ញា នួន បុប្ផា។
ការងារជាជាងកាត់ដេរនេះ បានធ្វើឲ្យកញ្ញា នួន បុប្ផា មានក្ដីសុខ បន្ទាប់ពីរៀនជំនាញនៅក្នុងអង្គការជនពិការ និងបានធ្វើការងារនៅក្នុងហាងកាត់ដេរសម្លៀកបំពាក់បុរាណ និងសម័យមួយកន្លែងនៅក្នុងរាជធានីភ្នំពេញ។ កញ្ញា បុប្ផា បង្ហាញក្ដីរំភើបយ៉ាងដូច្នេះ៖ «ខ្ញុំស្រឡាញ់ការងារនេះ។ ពីដំបូង ខ្ញុំមិនគិតថា ខ្ញុំរៀនជំនាញខាងកាត់ដេរនេះទេ ប៉ុន្តែពេលដែលខ្ញុំចូលទៅរៀន វាផ្ដល់ក្ដីសុខ និងក្ដីសង្ឃឹមឲ្យយើងគិតដល់អនាគត»។
ជាងកាត់ដេររូបនេះ ក៏បានលើកទឹកចិត្តដល់អ្នកពិការទាំងអស់ មិនត្រូវអស់សង្ឃឹមនឹងពាក្យសម្ដីអ្នកដទៃ និងត្រូវផ្ដល់ស្នាមញញឹមឲ្យខ្លួនឯង៕
Tag:
ពិការជើង
កាត់ដេរ
តស៊ូ
© រក្សាសិទ្ធិដោយ thmeythmey.com
