ឥណ្ឌូណេស៊ី មានករណីស្លាប់ប្រចាំថ្ងៃច្រើនបំផុត ចាប់តាំងពីផ្ទុះCOVID-19 ក្នុងប្រទេស

COVID-19

អន្តរជាតិ

ឥណ្ឌូណេស៊ី មានករណីស្លាប់ប្រចាំថ្ងៃច្រើនបំផុត ចាប់តាំងពីផ្ទុះCOVID-19 ក្នុងប្រទេស

27, Mar 2020 , 9:53 am

រូបភាព

អ្នកនាំពាក្យរដ្ឋាភិបាលឥណ្ឌូណេស៊ីទទួលបន្ទុក COVID-19 លោក Achmad Yurianto។ រូបភាព៖ Antara

ដោយ: ធៀន ភារិន្ទ

ឥណ្ឌូណេស៊ី នាថ្ងៃទី២៦ ខែមីនា នៅតែបន្តមានអ្នកស្លាប់ដោយសារជំងឺរលាកសួត ដែលបង្កដោយកូរ៉ូណាវីរុស (COVID-19) ខណៈអ្នកឆ្លងថ្មីមានចំនួនរហូតដល់ជាង ១០០ករណី។ ករណីស្លាប់នេះ គឹជាតួលេខដ៏ខ្ពស់បំផុតចាប់ពីរកឃើញ COVID-19 នៅក្នុងប្រទេស។

នាសន្និសីទកាសែតស្តីពីCOVID-19 ក្នុងទីក្រុងហ្សាការតា លោកAchmad Yurianto អ្នកនាំពាក្យរដ្ឋាភិបាលទទួលបន្ទុកCOVID-19 បានបញ្ជាក់ថា ឥណ្ឌូណេស៊ី មានករណីស្លាប់ ២០ករណីបន្ថែមទៀត នាថ្ងៃទី២៦ ខែមីនា។ ការណ៍នេះ បានធ្វើឲ្យអ្នកស្លាប់សរុបដោយសារCOVID-19 កើនដល់ ៧៨ករណី។

ចំណែកអ្នកឆ្លងវិញ ឥណ្ឌូណេស៊ី ក៏បានរកឃើញច្រើនដែរ ក្នុងថ្ងៃដដែលនេះ ពោលគឺរហូតដល់ទៅ ១០៣ករណី។ ឥណ្ឌូណេស៊ី បានរកឃើញCOVID-19សរុប ៨៩៣ករណី។ នេះបើតាមការចុះផ្សាយរបស់សារព័ត៌មាន CNN Indonesia។

គិតមកត្រឹមថ្ងៃនេះ ឥណ្ឌូណេស៊ី បានព្យាបាលអ្នកជំងឺឲ្យជាសះស្បើយបានចំនួន ៣៥ករណី៕