COVID-19
ជាតិ
សង្គមជាតិ
លោក ឡាយ គឹមឆេន លះបង់ចំណូលដោយផ្តល់សណ្ឋាគារសម្រាប់ដាក់អ្នកសង្ស័យផ្ទុកកូវីដ-១៩
លោក ឡាយ គឹមឆេន និងសណ្ឋាគារ 7 Days In ដែលលោកផ្តល់ទីតាំងឲ្យរដ្ឋបាលខេត្តតាកែវ, រូបភាពពីហ្វេសប៊ុកលោក គឹមឆេន
×![]()
លោក ឡាយ គឹមឆេន ម្ចាស់សណ្ឋាគារសេវេនដេអ៊ិន (7 Days In) សុខចិត្តលះបង់ប្រាក់ចំណូលខ្ទង់ម៉ឺនដុល្លារក្នុងមួយខែ ផ្តល់ទីតាំងសណ្ឋាគារឲ្យរដ្ឋបាលខេត្តតាកែវ ធ្វើជាកន្លែងដាក់អ្នកសង្ស័យ និងផ្ទុកជំងឺកូវីដ-១៩ (COVID-19)។ ការផ្តល់នេះ មិនកំណត់ពេលវេលានោះទេ ពោលគឺរហូតការរីករាលដាលនៃជំងឺកូវីដ-១៩ នៅកម្ពុជា មានស្ថានភាពធូរស្បើយ។ 
ដើម្បីរួមចំណែកជាមួយរាជរដ្ឋាភិបាលកម្ពុជា ក៏ដូចជារដ្ឋបាលខេត្តតាកែវក្នុងការបង្ការ និងការទប់ស្កាត់ការរីករាលដាលនៃជំងឺកូវីដ-១៩ លោក ឡាយ គឹមឆេន ម្ចាស់សណ្ឋាគារ 7 Days In បានផ្តល់ទីតាំងសណ្ឋាគារ ដែលអាចរកចំណូលប្រមាណ២ម៉ឺនដុល្លារក្នុង១ខែ ដល់រដ្ឋបាលខេត្តតាកែវ ដើម្បីរៀបចំធ្វើជាកន្លែងដាក់អ្នកសង្ស័យ និងផ្ទុកជំងឺកូវីដ-១៩។ សណ្ឋាគារនេះ មាន៦៤បន្ទប់ និងសាលប្រជុំធំមួយ ដែលអាចផ្ទុកមនុស្សបានប្រមាណ៣០០នាក់។
លោក ចាត់ទុកការផ្តល់សណ្ឋាគារនេះ ថាជាការបម្រើឲ្យសកម្មភាពសប្បុរសធម៌សង្គម។ ក្នុងកិច្ចសម្ភាសជាមួយសារព័ត៌មានថ្មីៗ តាមទូរស័ព្ទ នៅថ្ងៃទី២៦ ខែមីនា ឆ្នាំ២០២០ លោក និយាយថា៖«យើងជាជនជាតិខ្មែរ រស់នៅលើទឹកដីតែមួយ ត្រូវចេះសហការ និងជួយគ្នាក្នុងគ្រាមានអាសន្ន យើងចង់រត់ទៅណាក៏មិនរួចដែរ ទាំងបងទាំងខ្ញុំ»។
ពាក់ព័ន្ធនឹងប្រាក់ចំណូល លោក គឺមឆេន បានបញ្ជាក់យ៉ាងដូច្នេះថា៖«ជាមធ្យមយើងអាចរកចំណូលបានចន្លោះពី១,៥ម៉ឺនដុល្លារទៅ២ម៉ឺនដុល្លារក្នុង១ខែ ក្រោយយើងទូទាត់ការចំណាយរួច។ ប៉ុន្តែនៅពេលមានការរីករាលដាលនៃជំងឺកូវីដ-១៩ វាក៏ធ្លាក់ដែរ វានៅសល់តែ៨ទៅ៩ពាន់ដុល្លារប៉ុណ្ណោះ»។
លោក បន្តថា ការផ្តល់ទីតាំងសណ្ឋាគារឲ្យខាងរដ្ឋបាលខេត្តតាកែវនេះ មិនកំណត់ពីពេលវេលានោះទេ ពោលគឺរហូតស្ថានភាពនៃការរីករាលដាលជំងឺកូវីដ-១៩ នៅកម្ពុជាមានភាពធូរស្បើយ។ លោក ថ្លែថា៖«ខ្ញុំផ្តល់សណ្ឋាគារហ្នឹង ខ្ញុំបើកចំហឲ្យខាងខេត្ត គឺយើងធ្វើសម្បទានរួមគ្នា។ យើងបានជជែកគ្នា គឺពេលណាខាងខេត្តជូនដំណឹងមកខ្ញុំថា OK ឈប់ត្រូវការសណ្ឋាគារខ្ញុំហើយ យើងនឹងឈប់។ តាមពិតខាងខេត្ត សំណូមពរខ្ញុំសុំតែ៣ខែទេ ដោយសារគាត់ខ្លាចចិត្តខ្ញុំអ្នករកស៊ី»។
លោក អះអាងទៀតថា លោក គ្មានការសោកស្តាយនោះទេ សម្រាប់ប្រាក់ចំណូលបានមកពីសណ្ឋាគារនេះ។ ប៉ុន្តែអ្វីដែល លោក សោកស្តាយនោះគឺ ការបាត់បង់ការងាររបស់បុគ្គលិក ដែលធ្វើការនៅទីនោះ ព្រោះពួកគេ ត្រូវសម្រាកមួយរយៈទម្រាំស្ថានភាពនៃការរាតត្បាតវីរុសកូវីដ-១៩ មានភាពល្អប្រសើរឡើងវិញ។
សម្តេចនាយករដ្ឋមន្ត្រី ហ៊ុន សែន កាលពីពេលកន្លងទៅថ្មីៗ បានបញ្ជាឲ្យអភិបាលរាជធានី-ខេត្តទាំងអស់ ស្វែងរកទីតាំងតាមសាលារៀន ផ្ទះសំណាក់ សណ្ឋាគារ និងកន្លែងផ្សេងៗ ដើម្បីរៀបចំធ្វើជាទីតាំងសម្រាប់ត្រៀមពិនិត្យ និងដាក់អ្នកសង្ស័យ ឬអ្នកផ្ទុកកូវីដ-១៩។ បញ្ជារបស់សម្តេច ធ្វើឡើងក្រោយចំនួនអ្នកផ្ទុកវីរុសកូវីដ-១៩ នៅកម្ពុជាមានការកើនឡើងជាបន្តបន្ទាប់។
គិតត្រឹមយប់ថ្ងៃទី២៦ ខែមីនា ឆ្នាំ២០២០ កម្ពុជា មានអ្នកផ្ទុកវីរុសកូវីដ-១៩ ចំនួន៩៨នាក់ និងព្យាបាលជាសះស្បើយចំនួន១១នាក់។ សម្រាប់ខេត្តតាកែវ មកដល់ពេលនេះ ពុំទាន់រកឃើញអ្នកឆ្លងវីរុសកូវីដ-១៩ នៅឡើយទេ៕
Tag:
COVID-19
ឡាយ គឹមឆេន
© រក្សាសិទ្ធិដោយ thmeythmey.com
