ជាតិ
សង្គមជាតិ
កូវីដ-១៩ បង្ខំឲ្យព្រឹត្តិការណ៍សង្ក្រាន្តវត្តភ្នំ និងនៅបណ្តាខេត្តផ្សេងទៀតត្រូវផ្អាក
ព្រឹត្តិការណ៍សៀមរាបសង្ក្រាន្ត កាលពីឆ្នាំ២០១៩ រូបភាពពីផេកហ្វេសប៊ុករបស់ ព្រឹត្តិការណ៍អង្គរសង្រ្កាន្ត
×![]()
ភ្នំពេញ៖ ព្រឹត្តិការណ៍សង្ក្រាន្តនៅរាជធានីភ្នំពេញ និងតាមបណ្តាខេត្តផ្សេង ត្រូវបានប្រកាសផ្អាកជាបន្តបន្ទាប់ ដើម្បីទប់ស្កាត់ការរាលដាលជំងឺកូវីដ-១៩។ ដ្បិតខេត្តខ្លះ កំពុងពិចារណាជុំវិញការផ្អាកនេះក៏ដោយ ប៉ុន្តែសម្តេចហ៊ុន សែន នាយករដ្ឋមន្ត្រី បានប្រកាសនៅក្នុងពិធីជួបសំណេះសំណាលជាមួយនឹងគ្រូពេទ្យស្ម័គ្រចិត្ត ជាង៤០០នាក់ នៅថ្ងៃទី២៥ ខែមីនាថា នឹងមិនមានការរៀបចំព្រឹត្តិការណ៍សង្ក្រាន្តតាមខេត្តនោះទេ។
ដំបូងឡើយ មានតែព្រឹត្តិការណ៍សង្រា្កន្តសៀមរាបមួយទេ ដែលត្រូវបានប្រមុខរដ្ឋាភិបាលសម្រេចផ្អាក ដោយសារខេត្តនេះ មានជនជាតិខ្មែរម្នាក់ឆ្លងកូវីដ-១៩។ បន្តបន្ទាប់មកមានបណ្តាខេត្តផ្សេងៗ ដូចជា ខេត្តបន្ទាយមានជ័យ ព្រៃវែង ស្វាយរៀង កំពង់ធំ ត្បូងឃ្មុំ កំពត កណ្តាល តាកែវ រតនគីរី កំពង់ស្ពឺ បាត់ដំបង និងរាជធានីភ្នំពេញ ក៏សម្រេចផ្អាកព្រឹត្តិការណ៍សង្ក្រាន្តនេះដែរ ដោយសារតែកម្ពុជាមានករណីឆ្លងកាន់តែច្រើន ជំងឺកូវីដ-១៩។
កាលពីថ្ងៃទី៧ ខែមីនា ខេត្តបន្ទាយមានជ័យ ព្រៃវែង ស្វាយរៀង កំពង់ធំ ត្បូងឃ្មុំ កំពត កណ្តាល តាកែវ រតនគីរី កំពង់ស្ពឺ បាត់ដំបង និងភ្នំពេញ ក៏ផ្អាករៀបចំព្រឹត្តិការណ៍សង្ក្រាន្តតាមភូមិ ឃុំ ស្រុក និងទីវត្តអារាមដែរ។ នេះបើយោងតាមសេចក្តីជូនដំណឹងរបស់រដ្ឋបាលតាមខេត្តនីមួយៗ ដែលបានចេញផ្សាយតាមទំព័រហ្វេសប៊ុករៀងៗខ្លួនកន្លងមក។ ផ្អាកសង្ក្រាន្ត ក៏ប៉ុន្តែពិធីបុណ្យចូលឆ្នាំប្រពៃណីជាតិខ្មែរ នៅតែរៀបចំដដែល ដោយមានការរៀបចំសែនព្រេនតាមប្រពៃណី ប៉ុន្តែមិនអនុញ្ញាតឲ្យមានការជួបជុំគ្នាច្រើននោះទេ។
កាលពីថ្ងៃទី១៧ ខែមីនា ដែលកម្ពុជាបានរកឃើញអ្នកផ្ទុកកូវីដ-១៩ ដល់ទៅ១២នាក់ ដែលជាខ្មែរអ៊ិស្លាម១១ នាក់ និងខ្មែរម្នាក់ ជាតួលេខដែលកម្ពុជារកឃើញច្រើនជាងគេលើកដំបូង លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ដែលបានធ្វើតាមសំណើរបស់នាយករដ្ឋមន្ត្រីកម្ពុជា ប្រកាសឲ្យបិទKTV រោងភាពយន្ត សារមន្ទីរជាតិ ក្លិបកម្សាន្ត បិទការប្រគំតន្ត្រី គឺដើម្បីទប់ស្កាត់កុំឲ្យជំងឺកូវីដ-១៩ឆ្លងទៅមនុស្សកាន់តែច្រើនឡើងទៀត។
គិតត្រឹមថ្ងៃទី២៥ ខែមីនានេះ កម្ពុជាមានអ្នកឆ្លងកូវីដ-១៩ ចំនួន៩៦នាក់ ក្នុងនោះមាន១០នាក់ បានជាសះស្បើយវិញ៕
Tag:
សង្ក្រាន្ត
COVID-19
© រក្សាសិទ្ធិដោយ thmeythmey.com
