COVID-19
អន្តរជាតិ
នយោបាយអន្តរជាតិ
លោកស្រីប្រធានសភាតំណាងអាមេរិក ណាន់ស៊ី ផេឡុស៊ី (កណ្ដាល) ក្រោយសភាអនុម័តកញ្ចប់ជំនួយ COVID-19 ទំហំ២,២ទ្រីលានដុល្លារ កាលពីថ្ងៃ២៧ ខែមីនា ២០២០ - រូប៖ Reuters
×![]()
សភាតំណាងអាមេរិក នៅថ្ងៃសុក្រ ២៧ ខែមីនា បានសម្រេចអនុម័តកញ្ចប់ជំនួយប្រមាណ ២,២ទ្រីលានដុល្លារ ដែលធំបំផុតក្នុងប្រវត្តិសាស្ត្រងាមេរិក ។ គោលដៅនៃសំណើច្បាប់នេះ គឺដើម្បីជួយប្រជាជន និងអាជីវកម្មទប់ទល់នឹងការដាំក្បាលចុះនៃសេដ្ឋកិច្ច បង្កឡើងដោយជំងឺរាតត្បាតសាកល COVID-19 ។ ទន្ទឹមនេះ លុយរាប់ពាន់លានដុល្លារ ក៏នឹងផ្ដល់សម្រាប់វិស័យសុខាភិបាលដែលនៅជួរមុខទប់ទល់នឹងការរីករាលដាលវីរុសនេះផងដែរ។ 
ថ្លែងអំឡុងការតស៊ូមតិបិទទ្វាររយៈពេល៣ម៉ោង នៅសភាតំណាង លោកស្រី ណាន់ស៊ី ផេឡូស៊ី ប្រធានសភាតំណាង បញ្ជាក់ដូច្នេះថា៖«ប្រជាជាតិយើង ប្រឈមនឹងអាសន្នសុខាភិបាលនិងសេដ្ឋកិច្ច ដោយសារជំងឺរាតត្បាតសាកល COVID-19 ដែលជាជំងឺរាតត្បាតសាកលអាក្រក់បំផុតក្នុងរយៈពេល ១០០ចុងក្រោយ»។
តាមការចុះផ្សាយរបស់ទីភ្នាក់ងារព័ត៌មាន Reuters កញ្ចប់ជំនួយ ២,២ ទ្រីលានដុល្លារនេះ គឺរាប់បញ្ចូល លុយ៥០០ពាន់លានដុល្លារដែលនឹងប្រើជួយដល់ឧស្សាហកម្មរងគ្រោះបំផុត និងលុយ២៩០ពាន់លានដុល្លារទៀត ដែលនឹងប្រើជាជំនួយសាច់ប្រាក់រហូតដល់៣០០០ដុល្លារសម្រាប់ប្រជាជនអាមេរិករាប់លានគ្រួសារ។
បន្ថែមពីនេះ លុយ ៣៥០ពាន់លានដុល្លារ ផ្សេងទៀត នឹងប្រើជាលុយកម្ចីសម្រាប់អាជីវកម្មខ្នាតតូច។ លុយ ២៥០ពាន់លានដុល្លារ នឹងប្រើជាលុយជំនួយសម្រាប់អ្នកអត់ការងារធ្វើ ហើយយ៉ាងតិចណាស់ ១០០ពាន់លានដុល្លារ នឹងផ្ដល់ជូនដល់មន្ទីរពេទ្យ និងប្រព័ន្ធសុខាភិបាលដែលពាក់ព័ន្ធ។
ប្រធានាធិបតីអាមេរិក ដូណាល់ ត្រាំ ត្រូវបានគេរំពឹងថានឹងចុះហត្ថលេខាទៅជាច្បាប់ដោយគ្មានបង្អង់យូរឡើយ។ ព្រឹទ្ធសភាអាមេរិក បានអនុវត្តសំណើច្បាប់ជំនួយ COVID-19 ចំនួន២,២ ទ្រីលានដុល្លារ ដោយឯកច្ឆ័ន្ទកាលពីល្ងាចថ្ងៃពុធសប្តាហ៍នេះ។
សូមបញ្ជាក់ថា គិតមកត្រឹមថ្ងៃសៅរ៍ ទី២៨ ខែមីនា សហរដ្ឋអាមេរិក មានករណីឆ្លងCOVID-19 ចំនួន ជាង១០ម៉ឺនករណីហើយ ក្នុងនោះអ្នកជំងឺជិត២៥០០នាក់ស្ថិតក្នុងស្ថានភាពធ្ងន់ធរ។ ចំណែក អ្នកស្លាប់ មាន ១៧០៤នាក់ ហើយជាសះស្បើយមាន២៥២៥នាក់ ។ ហើយយ៉ាងហោចណាស់ សមាជិកសភាអាមេរិក ៣នាក់ មានលទ្ធផលតេស្ត COVID-19 វិជ្ជមាន ហើយមួយចំនួនទៀត បានធ្វើចត្តាឡីស័កខ្លួនឯងដើម្បីបន្ថយការរាលដាល៕
Tag:
សហរដ្ឋអាមេរិក
COVID-19
កញ្ចប់ជំនួយ
© រក្សាសិទ្ធិដោយ thmeythmey.com
