COVID-19
អន្តរជាតិ
នយោបាយអន្តរជាតិ
COVID-19៖ កូរ៉េខាងត្បូងដាក់អាមេរិក និងប្រទេស២ទៀតជាប្រទេសអាទិភាពទទួលបរិក្ខារពេទ្យ
× កូរ៉េខាងត្បូង សម្រេចដាក់សហរដ្ឋអាមេរិក អេមីរ៉ាអារ៉ាប់រួមត និងឥណ្ឌូណេស៊ី ជាប្រទេសអាទិភាពដែលទទួលសម្ភារវេជ្ជសាស្ត្រដែលក្នុងនោះរួមមានឧបករណ៍ធ្វើតេស្តជំងឺ COVID-19 ផងដែរ។
នៅថ្ងៃសុក្រ ទី ២៧ មីនា ទីភ្នាក់ងារព័ត៍មានកូរ៉េ Yonhap ដោយដកស្រង់សម្តីមន្ត្រីក្រសួងការបរទេសកូរ៉េខាងត្បូង បានឲ្យដឹងថាមានប្រទេសចំនួន១២០ហើយ បានព្យាយាមចង់បានសម្ភារវេជ្ជសាស្ត្រដែលផលិតនៅប្រទេសកូរ៉េខាងត្បូង។ យ៉ាងណាមិញ មន្ត្រី មន្ត្រីរូបនេះ សង្កត់ធ្ងន់ដូច្នេះថា៖««សហរដ្ឋអាមេរិកជាប្រទេសដែលយើងផ្តល់អាទិភាពខ្ពស់ជាងគេ ដោយហេតុថាមានការឆ្លងនៅទីនោះ បន្ថែមពីនេះលោកប្រធានាធិបតី ដូណាល់ត្រាំ បានស្នើសុំពួកយើងដោយផ្ទាល់។ សហរដ្ឋអាមេរិកមិនបានហាមមិនឲ្យពលរដ្ឋកូរ៉េចូលទឹកដីរបស់ខ្លួន មិនតែប៉ុណ្ណោះយើងបានសម្រចកិច្ចព្រមព្រៀងដោះដូររូបិយប័ណ្ណគ្នាទៅវិញមក»។
ការប្រកាសនេះ ធ្វើឡើងបន្ទាប់ពីក្រសួងការបរទេសកូរ៉េខាងត្បូងបានជួបប្រជុំជាមួយ ក្រុមការងារអន្តរភ្នាក់ងារ ដើម្បីស្វែងរកលំនឹងរវាងការប្រើប្រាស់ក្នុងស្រុក និងការនាំចេញឧបករណ៍វេជ្ជសាស្ត្រក្នុងក្របខណ្ឌមនុស្សធម៍។ គិតមកដល់ពេលនេះ មានប្រទេសចំនួន១១៧ហើយដែលព្យាយាម នាំចូលឧបករណ៍ធ្វើតេស្តCOVID-19 ឫសម្ភារៈដទៃទៀតក្នុងក្របខណ្ឌមនុស្សធម៍ តាមរដ្ឋាភិបាល ឫវិស័យឯងជន។
ចំពោះអេមីរ៉ាអារ៉ាប់រួមវិញ ក៏ស្ថិតនៅក្នុងបញ្ជីអាទិភាពដែរ ដោយសារប្រទេសទាំងពីមានកិច្ចសហប្រតិបត្តិការនឹងគ្នាលើវិស័យជាច្រើន ខណៈឥណ្ឌូណេស៊ីវិញ ក៏សម្រេចដាក់ក្នុងបញ្ជីអាទិភាពផងដែរ ដោយហេតុថាប្រទេសនេះជាដៃគូក្នុងគោលនយោបាយទិសខាងត្បូងរបស់ទីក្រុងសេអ៊ូល និងដើម្បីពង្រឹងទំនាក់ទំនងជាមួយអាស៊ាន។
បើតាម Yonhap មន្ត្រីកូរ៉េខាងត្បូងដដែល បានឲ្យដឹងទៀតថា ការសម្រេចចិត្តនាំចេញបរិក្ខារវេជ្ជសាស្ត្រទាំងអស់នោះក្រោយពីមានការធានាថានឹងគ្មានកង្វះខាតក្នុងស្រុកឡើយ។ ក្រុមការងារអន្តរភ្នាក់ងារនេះ ធ្វើសេចក្តីសម្រចចិត្តផ្អែកលើយុទ្ធសាស្ត្ររបស់រដ្ឋាភិបាលក្រុងសេអ៊ូលដែលនេះមានបំណងផលិតឧបករណ៍វេជ្ជសាស្ត្រCOVID-19 ក្នុងស្រុកក៏ដូចជាពង្រឹងផលប្រយោជន៍សេដ្ឋកិច្ច និងការទូតរបស់ខ្លួនផងដែរ។
គួរបញ្ជាក់ផងដែរថា ក្នុងចំណោមប្រទេស១១៧ដែលចង់នាំចូលឧបករណ៍វេជ្ជសាស្ត្រ COVID-19 មាន៣១ ប្រទេសដែលទាក់ទងដោយផ្ទាល់ទៅរដ្ឋាភិបាលកូរ៉េខាងត្បូង និង៣០ប្រទេសទៀតស្នើសុំក្រោមក្របខណ្ឌមនុស្សធម៍។ បន្ថែមពីនេះមាន ប្រទេសចំនួន២០ទៀត ដែលសង្ឃឹមនាំចូលឧបករណ៍ទាំងនោះ និងទទួលជាជំនួយមនុស្សធម៍ ខណៈ៣៦ប្រទេសទៀតតាមរយៈកិច្ចសហប្រតិបត្តិការក្នុងវិស័យស៊ីវិល៕
© រក្សាសិទ្ធិដោយ thmeythmey.com