COVID-19
បទសម្ភាសន៍
សង្គមជាតិ
អ្នកពិការភ្នែក ចង់ឲ្យមានសារអប់រំពីវិធីការពារខ្លួនពីការឆ្លងកូវីដ-១៩ ឲ្យច្រើន
×![]()
ភ្នំពេញ៖ យុវជន សូ សៀមសុខឃីម ជាជនពិការភ្នែកទាំងសងខាង ស្នើឲ្យប្រជាពលរដ្ឋ និងអ្នកពាក់ព័ន្ធចែករំលែកព័ត៌មានពិត និងបង្ហាញពីរបៀបប្រើប្រាស់សម្ភារការពារខ្លួនឲ្យបានច្រើន សម្រាប់ជនពិការភ្នែក។ ការស្នើសុំនេះ គឺស្របពេលដែលកម្ពុជារកឃើញករណីឆ្លងជំងឺកូវីដ-១៩ កាន់តែច្រើន ដោយគិតត្រឹមព្រឹកថ្ងៃទី២៦ មីនា មានមនុស្សចំនួន ៩៦នាក់ បានឆ្លងជំងឺកូវីដ-១៩។ ដើម្បីទប់ស្កាត់ការឆ្លងរាលដាលជំងឺកូវីដ-១៩ ក្រសួងសុខាភិបាល បានណែនាំឲ្យមានការប្រុងប្រយ័ត្នខ្ពស់ ដោយអនុវត្តឲ្យបានខ្ជាប់ខ្ជួនការរក្សាអនាម័យ និងពាក់ម៉ាស់នៅពេលចាំបាច់។
សូមអញ្ជើញស្ដាប់កិច្ចសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មានថ្មីៗ ជាមួយយុវជន សូ សៀមសុខឃីម ជនពិការភ្នែកដូចតទៅ៖
យុវជន សូ សៀមសុខឃីម ជនពិការភ្នែកទាំងសងខាង និយាយថាបញ្ហាសម្រាប់ជនពិការ គឺការជួបមនុស្សដែលមិនស្គាល់ ដែលអាចចម្លងមេរោគ ហើយជនពិការភ្នែកក៏ប្រើប្រាស់ដៃសម្រាប់ស្ទាប និងកាន់វត្ថុអ្វីមួយ។ ដូច្នេះការយល់ដឹងពីវិធីបង្ការការឆ្លងជំងឺកូវីដ-១៩ និងការទទួលព័ត៌មានពិតជុំវិញជំងឺរាតត្បាតជាសកលនេះ ពិតជាសំខាន់ណាស់សម្រាប់ជនពិការភ្នែក។ នេះជាការលើកឡើងរបស់ យុវជន សូ សៀមសុខឃីម ជនពិការភ្នែកទាំងសងខាង។ យុវជន សុខឃីម បានប្រាប់សារព័ត៌មានថ្មីៗតាមទូរសព្ទយ៉ាងដូច្នេះ៖«ក្នុងនាមខ្ញុំ ជាអ្នកពិការភ្នែកម្នាក់ ខ្ញុំគ្រាន់មានសំណូមពរមួយចំនួន។ ទី១ មនុស្សជុំវិញខ្លួនគាត់ (អ្នកពិការ) គួរតែចែករំលែកព័ត៌មានពិត ព្រោះអ្នកពិការភ្នែក ចាំបាច់ណាស់ ដើម្បីទទួលយកព័ត៌មាន។ ទី២ គួរតែបង្ហាត់បង្ហាញពីរបៀបការប្រើប្រាស់សម្ភារនៅក្នុងការការពារខ្លួន ដូចជាការលាងដៃ ការប្រើប្រាស់អាល់កុល សាប៊ូ ការប្រើប្រាស់ម៉ាស់ជាដើម»។ ក្រៅពីនេះ យុវជន សុខឃីម ក៏ស្នើឲ្យអ្នកដែលមានពិការភាពភ្នែក តាមដានព័ត៌មានពីជំងឺកូវីដ -១៩ ឲ្យបានជាប់លាប់ផងដែរ។
«ក្នុងស្ថានភាពកូវីដ១៩នេះ សម្រាប់ជនពិការភាពផ្នែកភ្នែក ត្រូវមានកិច្ចការពារគឺការធ្វើអនាម័យ។ សម្រាប់ខ្ញុំផ្ទាល់ ខ្ញុំលាងដៃនៅពេលដែលខ្ញុំកាន់ទូរសព្ទ និងកាន់វត្ថុផ្សេង។ ខ្ញុំពាក់ម៉ាស់នៅពេលដែលខ្ញុំចេញក្រៅ ហើយបើមិនចាំបាច់ខ្ញុំមិនចេញក្រៅទេ»។ នេះជាការរៀបរាប់ពីវិធីបង្ការការឆ្លងជំងឺកូវីដ-១៩ របស់ យុវជន សូ សៀមសុខឃីម។
គិតត្រឹមព្រឹកថ្ងៃទី២៦ ខែមីនា កម្ពុជា បានរកឃើញអ្នកឆ្លងមេរោគកូវីដ១៩ ចំនួន៩៦នាក់ហើយ ក្នុងនោះមាន១០នាក់ បានជាសះស្បើយ៕
Tag:
ពិការភ្នែក
COVID19
© រក្សាសិទ្ធិដោយ thmeythmey.com
