ពីនេះ ពីនោះ
សង្គមជាតិ
×![]()
ដោយ: ថ្មីៗ
អស់រយៈពេលប៉ុន្មានសប្តាហ៍ចុងក្រោយនេះ សុធីរ និងសំណាង និយាយច្រើនរឿងរ៉ាវជុំវិញប្រធានបទផលបះពាល់ដែលបណ្តាលមកពីមេរោគកូវីដ១៩។ ប្រធានដែល សុធីរ និងសំណាង ជជែកគ្នានៅថ្ងៃនេះ គឺទង្វើសប្បុរសធម៌ ឬវប្បធម៌ចែករំលែកកំពុងចាក់ឫសនៅក្នុងសង្គមខ្មែរ។ 
សុធីរ៖ អា សំណាង! អញឃើញមានចលនាកាន់តែច្រើនឡើងរួមគ្នាចូលលុយដើម្បីប្រយុទ្ធប្រឆាំងនឹងមេរោគកូវីដ១៩។ សកម្មភាពនេះផុសឡើងច្រើនណាស់ណា៎! អ្ហែងមានសង្កេតឃើញដូចអញអត់?
សំណាង៖ អើ! ទាំងឧកញ៉ា ទាំងអ្នកមានមធ្យម ទាំងអ្នកធម្មតា បាននាំគ្នាធ្វើវិភាគទានជួយផ្តល់លុយកាក់ដើម្បីប្រឆាំងនឹងមេរោគកូវីដ១៩ហ្នឹង។ អ្នកខ្លះជួយជាលុយ អ្នកខ្លះជួយជាសម្ភារ អ្នកខ្លះជួយជាម្ហូបអាហារដល់គ្រូពេទ្យ។ អញឃើញទង្វើរសប្បុរធម៌ ឬវប្បធម៌ចែលរំលែកនេះកើតឡើង និងចាក់ឫសកាន់តែជ្រៅនៅក្នុងសង្គមខ្មែរយើងឥឡូវនេះ។
សុធីរ៖ អា សំណាង! ចុះអ្ហែងមានបានជួយគេខ្លះហើយឬនៅ?
សំណាង៖ អញមិនបានជួយអ្វីធំដុំទេ។ តែអញបានទិញទឹកអាកុលចែកអ្នកក្រខ្សត់មួយចំនួន។ អញបានចែករំលែកពងមាន់ ពងទា ត្រីងៀត ទៅឲ្យអ្នកខ្វះខាតជាងអញខ្លះហើយ។ មានតិចជួយតិច មានច្រើនជួយច្រើន។ កុំគិតថា ចាំដល់តែមានច្រើន ទើបជួយ វាអាចហួសពេលណា៎!។ ក្នុងគ្រានេះ ចែកគ្នារស់ទៅ វាប្រសើរជាង។ កុំដណ្តើមគ្នារស់។ កុំចង់រស់តែឯង!។
សុធីរ៖ អញសួរឯងមួយទៀត មានមនុស្សមួយក្តាប់តូច មានលុយគួរសមដែរ តែអត់ចែករំលែកទេ ហើយគិតតែពីសរសេរក្នុងហ្វេសប៊ុកថា «អ្នកមាន»ត្រូវតែជួយធ្វើទានឲ្យអ្នកក្រ។ ត្រូវតែឲ្យអ្នកនេះ ឬឲ្យអ្នកនោះ។ តែខ្លួនឯងអត់ជួយគេទេ។ អ្ហែងយល់ម៉េចដែរ?
សំណាង៖ ក្រុមមនុស្សប្រភេទនេះ ពិតជាមាន។ ខ្លួនឯងអាត្មានិយម តែដើរចង្អុលឲ្យគេជួយអ្នកនេះ ឬជួយអ្នកនោះ។ ក្រុមអាត្មានិយមចង់រកសេចក្តីសុខតែខ្លួនឯងទេ។ ដូចអញនិយាយខាងលើអ៊ីចឹង មិនចាំបាច់មានច្រើនទេ មានប៉ុន្មានធ្វើទានប៉ុណ្ណឹងទៅ វាស្រេចទៅហើយ។ មានតិចជួយតិច មានច្រើនជួយគេច្រើនទៅ។ អានេះហើយទើបគេថា មនុស្សល្អ។ អ្នកខ្លះ ខ្លួនឯងអាត្មានិយម អត់ជួយគេសោះ ដោយយកលេសគិតថា ខ្លួនឯងមិនទាន់មាន (តាមពិតធូធារហើយ) ដូច្នេះ អត់ធ្វើទានទេ ហើយគិតតែពីអំពាវនាវឲ្យអ្នកផ្សេងធ្វើទានទៅវិញ។ អញនិយាយត្រូវអត់ អា សុធីរ?
សុធីរ៖ អ្ហែងនិយាយត្រូវហើយ។ បើយើងមានចិត្តបរិសុទ្ធជ្រះថ្លា អ្វីៗត្រូវផ្តើមចេញពីខ្លួនឯងជាមុនសិន ទោះមានតិច ឬច្រើនក្តី។ ចូរកុំបញ្ជាឲ្យតែគេធ្វើ ហើយខ្លួនឯងអត់ធ្វើអីសោះនោះ៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
