COVID-19
ជាតិ
COVID-19 ៖ កម្ពុជារកឃើញ៤នាក់ទៀត កើនឡើង១០៧នាក់ ខណៈអ្នកជាសះស្បើយឡើង២៣នាក់
× ភ្នំពេញ៖ ក្រសួងសុខាភិបាល បានរកឃើញអ្នកឆ្លងវីរុសCOVID-19 ថែម៤នាក់ទៀត នៅថ្ងៃទី៣០មីនានេះ ខណៈអ្នកជាសះស្បើយមានចំនួន២នាក់ដែរ។ សរុបមកអ្នកជំងឺCOVID-19 មានចំនួន១០៧នាក់ហើយ។ ចំណែកអ្នកជាសះស្បើយ បានកើនឡើងដល់ ២៣នាក់។ នេះបើតាមសេចក្តីប្រកាសរបស់ក្រសួងសុខាភិបាល។
សេចក្តីជូនព័ត៌មានដដែល បញ្ជាក់ថា អ្នកដែលរកឃើញឆ្លងជំងឺCOVID-19 គឺជាបុរសជនជាតិខ្មែរ អាយុ៣០ឆ្នាំ មានទីលំនៅនៅសង្កាត់ផ្សារកណ្តាល ក្រុងប៉ោយប៉ែត ជាបុគ្គលិកបម្រើការងារនៅកាស៊ីណូ និងខារ៉ាអូខេមួយនៅច្រកប៉ោយប៉ែត។ បច្ចុប្បន្នបុរសរូបនេះ ត្រូវបានដាក់ឲ្យព្យាបាលនៅមន្ទីរសុខាភិបាលខេត្តបន្ទាយមានជ័យ។ ករណីមួយទៀត គឺជាបុរសជនជាតិខ្មែរ អាយុ៣៦ឆ្នាំ នៅឃុំតាអុង ស្រុកចំការលើ ខេត្តកំពង់ចាម ដែលជាអ្នកដំណើរត្រឡប់មកពីប្រទេសជប៉ុន មកដល់កម្ពុជា នៅថ្ងៃទី ២៨ មីនា ឆ្នាំ២០២០។ បច្ចុប្បន្នបុរសរូបនេះ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ចំណែកស្ត្រីខ្មែរអាយុ២០ឆ្នាំម្នាក់ទៀត នៅសង្កាត់អូរឫស្សី១ ខណ្ឌ៧មករា រាជធានីភ្នំពេញក៏មានឆ្លងជំងឺCOVID-19ដែរ។ ស្ត្រីរូបនេះ ជានិស្សិតដែលបានវិលត្រឡប់មកពីប្រទេសអង់គ្លេស ដែលមកដល់កម្ពុជា នៅថ្ងៃទី២៨ មីនា។ បច្ចុប្បន្ន និស្សិតរូបនេះ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។ ករណីទី៤ ដែលរកឃើញឆ្លង COVID-19 គឺជាបុរសជនជាតិបារាំង អាយុ៦១ឆ្នាំ នៅទួលទំពូង ដែលមានប្រវត្តិធ្វើដំណើរទៅប្រទេស ហ្គុយយ៉ាណា មកដល់ប្រទេសកម្ពុជា ២២ ខែមីនា។ បច្ចុប្បន្ន បុរសជនជាតិបារាំងរូបនេះ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ដោយឡែកអ្នកជំងឺCOVID-19 ចំនួន២នាក់ទៀត នៅខេត្តសៀមរាប និងបន្ទាយមានជ័យ បានជាសះស្បើយ ហើយពួកគេត្រូវបានអនុញ្ញាតឱ្យចាកចេញទៅផ្ទះវិញ។ សរុបមកដល់ពេលនេះ មានអ្នកជាសះស្បើយ ចំនួន២៣នាក់ហើយ។
© រក្សាសិទ្ធិដោយ thmeythmey.com