នាយករដ្ឋមន្ត្រីឥណ្ឌា សុំទោសពលរដ្ឋក្រីក្រដែលរងទុក្ខព្រោះបិទប្រទេស

COVID-19

អន្តរជាតិ

នាយករដ្ឋមន្ត្រីឥណ្ឌា សុំទោសពលរដ្ឋក្រីក្រដែលរងទុក្ខព្រោះបិទប្រទេស

30, Mar 2020 , 10:29 am

រូបភាព

លោកនាយករដ្ឋមន្ត្រីឥណ្ឌា នារិន្ទ្រា ម៉ូឌី (ប្រភពរូប៖ Outlock India)

ដោយ:

នាយករដ្ឋមន្ត្រី នារិន្ទ្រា ម៉ូឌី បានស្នើសុំការអត់ឱនពីសំណាក់ពលរដ្ឋឥណ្ឌាក្រីក្រ ដែលរងទុក្ខដោយសារចំណាត់ការបិទប្រទេស៣សប្តាហ៍ទប់ទល់ COVID-19 របស់រដ្ឋាភិបាលលោក។ មេដឹកនាំរូបនេះ បន្តនិយាយការពារចំណាត់ការនេះ ដោយអះអាងថា វានឹងជួយឥណ្ឌាយកឈ្នះ COVID-19 ដែលកំពុងអុកឡុកពិភពលោក។

តាមរយៈវិទ្យុជាតិក្នុងការថ្លែងទៅកាន់ប្រជាជាតិប្រចាំខែ លោកនាយករដ្ឋមន្ត្រី ម៉ូឌី និយាយដូច្នេះថា៖«ខ្ញុំសុំទោសសម្រាប់ការដាក់ចេញវិធានការក្តៅទាំងនេះ ដែលបង្កការលំបាកក្នុងការប្រកបរបរចិញ្ចឹមជីវិតប្រចាំថ្ងៃរបស់អ្នក ជាពិសេស ពលរដ្ឋក្រីក្រ»។ តាមការចុះផ្សាយរបស់ទូរទស្សន៍កាតា Aljazeera លោក ម៉ូឌី បញ្ជាក់ទៀតថា៖«ខ្ញុំដឹងថា អ្នកខ្លះ ប្រាកដជាខឹងខ្ញុំ។ ក៏ប៉ុន្តែ ចំណាត់ការរឹងត្អឹងទាំងនេះ ទាមទារដាក់ចេញចាំបាច់ដើម្បីយកឈ្នះសមរភូមិមួយនេះ»។

កាលពីសប្តាហ៍មុន ប្រមុខរដ្ឋាភិបាលឥណ្ឌារូបនេះ បានប្រកាសពីចំណាត់ការបិទប្រទេសចំនួន២១ថ្ងៃ ដែលបានចូលជាធរមានរហូតដល់ថ្ងៃ២៥ ខែមីនា ។ គោលដៅគឺដើម្បីទប់ស្កាត់ការរីករាលដាលនៃជំងឺរាតត្បាតសាកល COVID-19 ដែលសម្លាប់មនុស្សជាង៣,៣ម៉ឺននាក់ និងឆ្លងជាង៧២ម៉ឺននាក់។ ក៏ប៉ុន្តែការសម្រេចចិត្តបែបនេះ បានធ្វើឲ្យប្រជាជនក្រីក្រឥណ្ឌារាប់លាននាក់រងទុក្ខវេទនា ដូចជា អត់ឃ្លាន និងបាត់បង់ការងារធ្វើ ជាដើម។

ទាក់ទិនរឿងនេះ នាយករដ្ឋមន្ត្រីឥណ្ឌាវ័យ៦៨ឆ្នាំរូបនេះ លើកឡើងថា ពលរដ្ឋក្រីក្រ ច្បាស់ជាគិតថា តើលោកជានាយករដ្ឋមន្ត្រីប្រភេទណាទើបដាច់ចិត្តដាក់ពលរដ្ឋខ្លួនឯងក្នុងស្ថានភាពលំបាកលំបិនបែបនេះ។ ត្រង់ចំណុចនេះ លោក ម៉ូឌី ទទូចឲ្យប្រជាជនយល់ដឹងរឿងមួយថា លោកគ្មានជម្រើសអ្វីផ្សេងទៀតឡើយ ហើយលោកសង្កត់ធ្ងន់ដូច្នេះថា៖«ចំណាត់ការទាំងនេះ នឹងផ្ដល់ឱកាសឲ្យឥណ្ឌាយកជ័យជម្នះលើ COVID-19»។

សូមបញ្ជាក់ថា គិតត្រឹមព្រឹកថ្ងៃចន្ទ ៣០ ខែមីនា ប្រទេស ឥណ្ឌា បានរកឃើញករណីឆ្លង COVID-19 សរុប ១០២៤ករណី ក្នុងនោះករណីថ្មី ៣៧នាក់។ ចំណែកអ្នកស្លាប់មាន ២៧នាក់ ហើយអ្នកជាសះស្បើយសរុប មាន៩៥នាក់។ នេះបើតាមវេបសាយ worldometers.info ដែលតាមដានករណី COVID-19 នៅទូទាំងពិភពលោក៕