រាជធានីភ្នំពេញ ថ្ងៃទី៣០ ខែមីនា ឆ្នាំ២០២០៖ ក្រុមហ៊ុន ស្មាត អាស្យាតា ខូ អិលធីឌី បានប្រកាសមូលនិធិដែលមានទឹកប្រាក់ចំនួន មួយលានដុល្លារអាមេរិក ក្នុងការចូលរួមចំណែកជួយទៅដល់រាជរដ្ឋាភិបាលកម្ពុជា ដើម្បីដោះស្រាយ ការរាតត្បាតនៃជំងឺកូវីដ-១៩។ ចំនួនទឹកប្រាក់នៃមូលនិធិនេះ គឺជាទឹកប្រាក់បន្ថែម ក្រៅអំពីចំនួនទឹកប្រាក់សរុបចំនួន ១% (មួយភាគរយ) នៃចំណូលដុលប្រចាំឆ្នាំ ដែលក្រុមហ៊ុនប្រើប្រាស់ សម្រាប់ចំណាយលើកម្មវីធីទំនួលខុសត្រូវ សង្គម (CSR) របស់ខ្លួន។ មូលនិធិនេះ គឺនឹងត្រូវយកទៅប្រើប្រាស់សម្រាប់ជាជំនួយផ្នែកហិរញ្ញវត្ថុ ដល់សកម្មភាពទាំងឡាយណា ដែលមានសមត្ថភាពចូលរួមជួយដោះស្រាយបញ្ហាប្រឈមនានា ដែលមាននៅកម្ពុជា ទាំងក្នុងអំឡុងពេលកំពុងកើតមាន និងក្រោយពេលបញ្ចប់បញ្ហាផងដែរ។
ការផ្តល់ជូនបន្ថែមនេះ គឺត្រូវបានធ្វើឡើងបន្ទាប់ពីក្រុមហ៊ុន ស្មាត រួមជាមួយក្រុមហ៊ុន Huawei បានដំឡើងជាស្ថាពរនូវស្ថានីយបណ្តោះអាសន្ន សម្រាប់ជួយទ្រទ្រង់ សម្របសម្រួល និងតាមដានបញ្ហាជំងឺកូវីដ-១៩ ជូនដល់ក្រសួងសុខាភិបាលកម្ពុជា។ កាលពីថ្ងៃទី២៧ ខែមីនា ឆ្នាំ២០២០ មន្ទីរពេទ្យមិត្តភាពកម្ពុជា-សូវៀត និងមណ្ឌលសុខភាពចាក់អង្រែ បានតភ្ជាប់បណ្តាញជាស្ថាពរ ទៅកាន់ក្រសួងសុខាភិបាល សម្រាប់ប្រព័ន្ធទំនាក់ទំនងវីដេអូ (Video Conference) ដោយប្រើប្រាស់ហ្វ្រេកង់ស៍វិទ្យុ សាកល្បងបច្ចេកវិទ្យាជំនាន់ទី៥ (5G) ដើម្បីធានាឲ្យបាននូវល្បឿនលឿន និងមានសមត្ថភាពខ្ពស់បំផុត។ ការរៀបចំដំឡើងជាបណ្តោះអាសន្ននេះ គឺបានក្លាយជាករណីប្រើប្រាស់ដោយផ្ទាល់ លើបច្ចេកវិទ្យាជំនាន់ទី៥ (5G) ដំបូងបង្អស់នៅកម្ពុជា។
លោក ថូម៉ាស ហ៊ុន នាយកប្រតិបត្តិនៃក្រុមហ៊ុន ស្មាត បានឱ្យដឹងថា៖«បើទោះបីជាយើងខ្ញុំបានវិនិយោគជាច្រើន រយពាន់ដុល្លារអាមេរិក ក្នុងអំឡុងពេលប៉ុន្មានសប្តាហ៍មកនេះក្តី យើងខ្ញុំក៏នៅតែពិនិត្យឃើញថា មានចំណុចជាច្រើនទៀត ដែលយើងទាំងអស់គ្នា ត្រូវរួមគ្នាចូលរួមគាំទ្រ និងដោះស្រាយ។ មូលនិធិមួយលានដុល្លារអាមេរិកនេះ គឺនឹងត្រូវផ្តោតជាសំខាន់ ទៅលើគំនិតផ្តួចផ្តើមទាំងឡាយ ចំពោះវិស័យទាំងបួន រួមមាន៖ បច្ចេកវិទ្យា,ទូរគមនាគមន៍, គមនាគមន៍ និងព័ត៌មានសម្រាប់វិស័យអប់រំ, ការគ្រប់គ្រងគ្រោះមហន្តរាយ,ការក្សាចម្ងាយពីគ្នា និងការរក្សាអនាម័យផ្ទាល់ខ្លួន។ វិស័យឯកជន រួមទាំងវិស័យសហប្រតិបត្តិការសាធារណៈទាំងអស់ ដែលមានចំណាប់អារម្មណ៍ សូមមេត្តារៀបចំគម្រោងការរបស់ខ្លួន ដើម្បីទទួលបាននូវកញ្ចប់មូលនិធិ ក្នុងទំហំទឹកប្រាក់រហូតដល់ ២០០,០០០ (ម្ភៃម៉ឺននដុល្លារអាមេរិក) យកទៅអនុវត្តគម្រោងរបស់ខ្លួន»។
បើតាមលោក លោក ថូម៉ាស ហ៊ុន ក្រុមហ៊ុន ស្មាត អាស្យាតា នឹងចាប់ផ្តើមទទួលពាក្យ ពីថ្ងៃទី៨ ខែមេសា ឆ្នាំ២០២០ តទៅ។ លោក ថូម៉ាស ហ៊ុន បន្តថា៖«សូមលោកអ្នកដែលមានចំណាប់អារម្មណ៍ រៀបចំគម្រោងការរបស់ខ្លួន មកកាន់យើងខ្ញុំ ទៅតាមប្រភេទវិស័យនីមួយៗ។ យើងខ្ញុំ នឹងពិនិត្យជម្រុះ ក្នុងក្របខណ្ឌផ្ទៃក្នុង របស់ក្រុមហ៊ុនជាមុនសិន មុននឹងដាក់ជូនទៅពិនិត្យសម្រេច ពីសំណាក់គណៈកម្មាធិការ ដែលមានសមាសភាពមកពីក្រុមហ៊ុន ស្មាត អាស្យាតា ក្រុមហ៊ុនមេរបស់ក្រុមហ៊ុន ស្មាត (Axiata Group) និងតំណាងពីស្ថាប័នឯករាជ្យផ្សេងៗដទៃទៀត»។
សម្រាប់ព័ត៌មានលម្អិត ស្តីពីមូលនិធិនេះ សូមលោកអ្នកចូលទៅកាន់បណ្តាញទំនាក់ទំនងសង្គម របស់ក្រុមហ៊ុន Smart Axiata និង Smart For Cambodia ក្នុងរយៈពេលប៉ុន្មានថ្ងៃខាងមុខនេះ។
លោក ថូម៉ាស ហ៊ុន នាយកប្រតិបត្តិនៃក្រុមហ៊ុន ស្មាត អាស្យាតា ក៏បានឲ្យដឹងបន្ថែមទៀតថា ក្រៅតែអំពីការតភ្ជាប់បណ្តាញទំនាក់ទំនង ទៅកាន់មជ្ឍមណ្ឌលមេ របស់ក្រសួងសុខាភិបាល តាមរយៈការប្រើប្រាស់ហ្វ្រេកង់ស៍វិទ្យុបច្ចេកវិទ្យាជំនាន់ ទី៥ ក្រុមហ៊ុន ស្មាត អាស្សាតា ទទួលបានអាជ្ញាបណ្ណសាកល្បងនោះ ក្រុមហ៊ុន ក៏បានផ្តល់ជូននូវសេវាទិន្នន័យបន្ថែមជូនដល់អតិថិជន រាល់ពេលនៃការបញ្ចូលទឹកប្រាក់តាមរយៈ (e-top ups) , Smart @Home និងអតិថិជនជាលក្ខណៈក្រុមហ៊ុនទាំងអស់។
ស្របពេលជាមួយគ្នានេះផងដែរ ក្រុមហ៊ុន ស្មាត អាស្យាតា ក៏បាន និងកំពុងចាត់វិធានចាំបាច់នានាចំពោះមុខ ក្នុងទិសដៅធានាឲ្យបាន នូវសុខុមាលភាពជូនដល់បុគ្គលិកនិយោជិតទាំងអស់ ក៏ដូចជាដៃគូប្រតិបត្តិការ និងអតិថិជនទាំងអស់ តាមរយៈនិយាមនៃការគ្រប់គ្រងនិរន្តរភាពអាជីវកម្មរបស់ខ្លួន។ សកម្មភាពមួយចំនួនដែលបាន និងកំពុងអនុវត្តរួមមាន៖ ការវាស់ស្ទង់កម្រិតសីតុណ្ហភាពកំដៅ ការរៀបចំឲ្យមាននូវជែលលាងសំអាតដៃ នីតិវិធីសំអាតអនាម័យ តម្រូវឲ្យបុគ្គលិកនិយោជិត ដែលបម្រើការផ្ទាល់ជាមួយអតិថិជន ត្រូវពាក់ម៉ាស់ការពារ ធ្វើការងារពីផ្ទះ លើកពេលវេលា ចំពោះកម្មវិធីរបស់ក្រុមហ៊ុន ដែលបានគ្រោងទុកពីមុនមក និងប្រជុំតាមរយៈកម្មវិធីឌីជីថល (Virtual) នានា។
លោក ថូម៉ាស ហ៊ុន ក៏បានមានប្រសាសន៍បន្ថែមទៀតផងដែរថា សេវាទំនាក់ទំនងទូរគមនាគមន៍ គឺត្រូវបានកំណត់ជាសេវាកម្ម ដែលមានភាពចាំបាច់បំផុត ដូចទៅនឹងសេវាអគ្គិសនី និងសេវាទឹកស្អាតផងដែរ សម្រាប់ប្រទេសជាតិនីមួយៗ។ «ខណៈពេលដែលយើងខ្ញុំ កំពុងបន្តតាមដានយ៉ាងយកចិត្តទុកដាក់បំផុតនោះ យើងខ្ញុំក៏យល់យ៉ាងច្បាស់ ពីភាពចាំបាច់ និងតម្រូវការរបស់អតិថិជនជាច្រើនលាននាក់ ដែលពួកគាត់ទាំងអស់ មានការជឿជាក់ និងត្រូវការការតភ្ជាប់ជានិច្ច។ អាស្រ័យហេតុនេះ យើងខ្ញុំ នឹងអនុវត្តគ្រប់មធ្យោបាយ ដើម្បីផ្តល់សេវាកម្មជូនដល់អតិថិជនទាំងអស់ ដោយមានការគាំទ្រពីរាជរដ្ឋាភិបាលកម្ពុជា ពិសេសក្នុងអំឡុងពេលនៃវិបត្តិ ដែលយើងទាំងអស់គ្នា បាន និងកំពុងប្រឈមនាពេលបច្ចុប្បន្ន»។ លោក ថូម៉ាស ហ៊ុន បន្ថែមដូច្នេះ។
សម្រាប់ព័ត៌មានបន្ថែម និងព័ត៌មានថ្មីៗ ពីកម្មវិធីទំនួលខុសត្រូវសង្គម និងនិរន្ដរភាព នៃក្រុមហ៊ុន Smart សូមចូលទៅកាន់ទំព័រហ្វេសប៊ុករបស់ «Smart for Cambodia» តាមរយៈ
www.facebook.com/SmartForCambodia ឬចូលទៅកាន់គេហទំព័រ
www.smart.com.kh៕
(អត្ថបទពាណិជ្ជកម្ម)