COVID-19
អន្តរជាតិ
COVID-19៖ លោក ត្រាំ ថា អត្រាអ្នកស្លាប់ទំនងឡើងដល់ចំណុចកំពូលនៅពីរសប្ដាហ៍ទៀត
× ប្រធានាធិបតីអាមេរិក ដូណាល់ ត្រាំ នៅថ្ងៃទី២៩ ខែមីនា និយាយថា អត្រាអ្នកស្លាប់ដោយសារជំងឺCOVID-19 ទំនងនឹងឡើងដល់ចំណុចកំពូលនៅពីរសប្ដាហ៍ទៀត មុននឹងចាប់ផ្ដើមធ្លាក់ចុះវិញ។ ដើម្បីទប់ស្កាត់ការរាលដាលកាន់តែខ្លាំង លោក ត្រាំ ក៏ពន្យារគោលការណ៍គម្លាតសង្គមរហូតដល់ដំណាច់ខែមេសាខាងមុខ។ ទាក់ទងនឹងអត្រាមរណភាពនេះ អ្នកជំនាញជំងឺឆ្លងអាមេរិកប៉ាន់ស្មានថា អាចមានដល់ទៅបីសែននាក់ឯណោះ។
សហរដ្ឋអាមេរិក ជាប្រទេសរងគ្រោះខ្លាំងជាងគេមួយដោយសារជំងឺ COVID-19 ។ គិតត្រឹមថ្ងៃទី២៩ ខែមីនា ករណីឆ្លងនៅអាមេរិកមាន១៤២០០០នាក់ និងមានអ្នកស្លាប់ចំនួនជិត២៥០០នាក់។ តួលេខអ្នកសះស្បើយ៤៥៥០នាក់។ តួលេខឆ្លងដ៏ច្រើននេះ ធ្វើឲ្យអាមេរិកឈរលេខមួយជាប្រទេសមានករណីឆ្លងច្រើនជាងគេ ច្រើនជាងទាំងចិនដែលជាប្រទេសផ្ទុះ COVID-19 ទៅទៀត។
លើតួលេខអ្នកស្លាប់នេះ ប្រធានាធិបតីអាមេរិក ដូណាល់ ត្រាំ លើកឡើងថា នឹងឡើងដល់ចំណុចកំពូលនៅអំឡុងពីរសប្ដាហ៍ខាងមុខ។ ក្នុងសន្និសីទសារព័ត៌មានថ្ងៃទី២៩ ខែមីនានៅសេតវិមាន លោក ត្រាំ និយាយថា ពិធីបុណ្យ Easter គួរតែជាពេលកំពូល។ ឆ្នាំ២០២០ ពិធីបុណ្យដ៏ធំមួយនេះ ធ្វើនៅថ្ងៃទី១២ ខែមេសាខាងមុខ។
«គំរូប៉ាន់ស្មានវាយតម្លៃថា ចំណុចកំពូលនៃអត្រាមរណភាព នឹងមាននៅអំឡុងពេលពីរសប្ដាហ៍។ វាគួរចាប់ផ្ដើមធ្លាក់ចុះចាប់ពីពេលនោះ។» នេះជាការបញ្ជាក់របស់លោក ត្រាំ ។ ជាមួយគ្នានោះ ប្រធានាធិបតីអាមេរិករូបនេះបញ្ជាក់ថា គោលការណ៍គម្លាតសង្គមដែលរដ្ឋាភិបាលលោកដាក់ចេញ នឹងបន្តអនុវត្តដល់ថ្ងៃទី៣០ ខែមេសាដើម្បីពន្យឺតល្បឿនវីរុសរាលដាល។ លោក ត្រាំ ស្នើឲ្យពលរដ្ឋគោរពគោលការណ៍នេះឲ្យខ្ជាប់ខ្ជួន។
ដោយឡែកអ្នកជំនាញជំងឺឆ្លងអាមេរិក លោក Anthony Fauci ព្រមានថា តួលេខអ្នកស្លាប់ដោយសារ COVID-19 អាចមានដល់ទៅពីរសែននាក់ឯណោះ ហើយឆ្លងលើមនុស្សរាប់សែននាក់ទៀត។ លោក Fauci ដែលជានាយកវិទ្យាស្ថានអាលែកស៊ី និងជំងឺឆ្លង ប្រាប់ទូរទស្សន៍ CNN ថា តួលេខស្លាប់ទាបមានពីមួយសែននាក់ ហើយខ្ពស់បំផុតអាចមានពីរសែននាក់។
លោក Fauci ក៏ព្រមានទៀតថា រដ្ឋមួយចំនួនដូចជា New Orleans, New York និងទីក្រុងច្រើនទៀត ប្រឈមមុខនឹងការខ្វះខាតគ្រឿងបរិក្ខារវេជ្ជសាស្ត្រមិនខាន។ ដោះស្រាយបញ្ហានេះ រដ្ឋបាលក្រុងវ៉ាស៊ីនតោន ក៏បានស្វះស្វែងរកការផ្គត់ផ្គង់ពីបរទេសដូចជាកូរ៉េខាងត្បូងជាដើម ដើម្បីបំពេញការខ្វះខាតនៅដែលនឹងកើតឡើង៕
Tag:
អាមេរិក
COVID-19
ដូណាល់ ត្រាំ
© រក្សាសិទ្ធិដោយ thmeythmey.com