COVID-19
ជាតិ
លេបថ្នាំទៀងទាត់ ហាត់ប្រាណ...ធ្វើឲ្យអ្នកជំងឺនៅកោះកុងសះស្បើយពី COVID-19 មុនពេលកំណត់ ទិដ្ឋភាពគ្រូពេទ្យថែទាំអ្នកជំងឺនៅមន្ទីរពេទ្យកោះកុង
× «ស្តាប់តាមការណែនាំរបស់គ្រូពេទ្យ»។ នេះជាប្រការដ៏សំខាន់ដែលនាំឲ្យបុរសជនជាតិខ្មែរវ័យ៥៧ឆ្នាំ នៅមន្ទីរពេទ្យបង្អែកខេត្តកោះកុងជាសះស្បើយពីជំងឺ COVID-19 មុនពេលកំណត់។ តាមរយៈសារព័ត៌មានថ្មីៗ បុរសរូបនេះ បានបញ្ជាក់ថា ក្រៅពីការលេបថ្នាំតាមពេលកំណត់ ការហាត់ប្រាណជាប្រចាំ កាន់តែមានប្រសិទ្ធភាពបន្ថែមទៀត។ បើទោះបីជាជំងឺរាលត្បាតមួយនេះ មិនទាន់មានថ្នាំព្យាបាល ឬវ៉ាក់សាំងច្បាស់លាស់នៅឡើយក៏ដោយ។
បុរសដែលស្ថិតក្នុងចំណោមមនុស្សជាង២០នាក់ដែលបានសះស្បើយពីជំងឺ COVID-19 បានចែករំលែកបទពិសោធន៍របស់ខ្លួន ដែលស្ថិតនៅក្នុងព្យាបាលពីក្រុមគ្រូពេទ្យជំនាញត្រឹមតែ១០ថ្ងៃប៉ុណ្ណោះ ខណៈដែលគ្រូពេទ្យបានកំណត់ការព្យាបាលជាសះស្បើយ ក្នុងរយៈពេល១៤ថ្ងៃ។
បុរសដែលទើបនឹងជាសះស្បើយ បាននិយាយថា ទន្ទឹមនឹងលោកទទួលការណែនាំ និងលេបថ្នាំទៀងទាត់ដែលគ្រូពេទ្យរៀបចំទុកស្រាប់នៅក្នុងបន្ទប់ព្យាបាលនោះ លោកក៏ព្យាយាមហាត់ប្រាណ សមាធិ ពិសាទឹកក្តៅ និងឧស្សាហ៍ងូតទឹកជាប្រចាំ ក្នុងអំឡុងពេលមេរោគកូវីដ-១៩ ធ្វើទុក្ខបណ្តាលឲ្យរូបលោកឈឺសព្វរាងកាយ។ លោកបាននិយាយដូច្នេះ៖«ជំងឺនេះឈឺមួយរយមុខ។ បើយើងទន់ជ្រាយនឹងវា វាកាន់តែធ្វើទុក្ខយើង»។
អ្នកជំងឺកូវីដ-១៩ ក្រៅពីមានអាការក្អក ឈឺក ឡើងស្លេស និងថប់ដង្ហើម មេរោគនេះក៏ធ្វើឲ្យអ្នកជំងឺឈឺចាប់គ្រប់កន្លែងក្នុងរាងកាយ។ ពិសេសគឺឈឺខ្លាំងនៅគន្លាក់កដៃ-កជើង ឈឺក្បាល វិលមុខ និងអស់កម្លាំង។ នេះជាបទពិសោធន៍របស់បុរសដែលឆ្លងផុតនិងជាសះស្បើយពីកូវីដ-១៩ នៅខេត្តកោះកុង ដោយលោកបានបន្តថា ដើម្បីជម្នះនឹងការធ្វើទុក្ខក្នុងខ្លួនពីមេរោគកូវីដ-១៩ និងដើម្បីឲ្យខ្លួនឆាប់ជាសះស្បើយនោះ ក្រៅពីអនុវត្តតាមការណែនាំ និងព្យាបាលពីក្រុមគ្រូពេទ្យជំនាញ លោកក៏ព្យាយាមជួយខ្លួនឯងតាមរយៈការហាត់ប្រាណដោយលើកដៃ-លើកជើង រត់ជុំវិញបន្ទប់ឬជុំវិញទីធ្លាខាងក្រៅបន្ទប់ដែលមានការអនុញ្ញាត ដើម្បីឲ្យរាងកាយបែកញើសផងដែរ។ ក្រៅពីហាត់ប្រាណជាប្រចាំ លោកក៏ ពិសាទឹកក្តៅ និងឧស្សាហ៍ងូតទឹកដើម្បីធ្វើឲ្យស្មារតីស្រស់ថ្លា និងស្រឡះខ្លួនពីការធ្វើទុក្ខនៃជំងឺនោះ ហើយធ្វើឲ្យស្ថានភាពជំងឺក្នុងខ្លួនបានធូរស្រាល និងល្អប្រសើរពីមួយថ្ងៃទៅមួយថ្ងៃ ឈានដល់ការជាសះស្បើយមុនថ្ងៃពេទ្យកំណត់។
លោកបានបន្ថែមថា មុននឹងគ្រូពេទ្យអនុញ្ញាតឲ្យលោកវិលត្រឡប់ទៅស្រុកកំណើតវិញកាលពីថ្ងៃទី២៧មីនា ឆ្នាំ២០២០ គ្រូពេទ្យទាំងនោះក៏បានណែនាំលោក កុំឲ្យស្និទស្នាលជាមួយក្រុមគ្រួសារ ឬព្យាយាមនៅឲ្យឆ្ងាយពីគេក្នុងរយៈពេល១៤ថ្ងៃទៀត និងកុំចេញក្រៅផ្ទះបើគ្មានការចំបាច់ ដើម្បីចៀសវាងការឆ្លង មេរោគកូវីដ-១៩នេះទៀត ក្នុងករណីណាមួយដោយមិនដឹងខ្លួន។
គិតត្រឹមថ្ងៃទី៣០មីនា ឆ្នាំ២០២០ កម្ពុជាព្យាបាលអ្នកជំងឺកូវីដ-១៩ ជាសះស្បើយចំនួន២៣នាក់ ខណៈដែលមានជំងឺចំនួន១០៧នាក់៕
© រក្សាសិទ្ធិដោយ thmeythmey.com