COVID-19
កីឡាអន្តរជាតិ
អន្តរជាតិ
ក្រោយឪពុកស្លាប់ដោយសារ COVID-19 អ្នកប្រដាល់អង់គ្លេសម្នាក់ស្នើឲ្យពលរដ្ឋនៅក្នុងផ្ទះ
×![]()
ដោយ: ទេព ពិទូរ្យ
Anthony Yarde អ្នកប្រដាល់សញ្ជាតិអង់គ្លេស អះអាងថា ឪពុករបស់ខ្លួនបានស្លាប់ដោយសារឆ្លងជំងឺ COVID-19។ ក្រោយមរណភាពឪពុក Yarde ស្នើឲ្យប្រជាពលរដ្ឋផ្សេងទៀតស្នាក់នៅក្នុងផ្ទះដើម្បីគេចផុតពីជំងឺរាតត្បាតនេះ។
«ខ្ញុំនៅតែតក់ស្លុត ប៉ុន្តែមរណភាពនេះអាចជាសារជួយដល់អ្នករាល់គ្នាបន្តស្នាក់នៅក្នុងផ្ទះ»។ Yarde បង្ហោះសារលើបណ្តាញសង្គមរបស់ខ្លួនបែបនេះ ដោយបន្ថែមថាមនុស្សកាន់តែច្រើនចេញទៅក្រៅនឹងធ្វើឲ្យមានភាពច្របូកច្របល់កាន់តែខ្លាំង ប៉ុន្តែការដាក់ខ្លួនឯងឲ្យនៅឆ្ងាយដាច់ពីគេទើបអាចកាត់បន្ថយការរាលដាល។
អ្នកប្រដាល់ទម្ងន់មធ្យមវ័យ ២៨ ឆ្នាំរូបនេះជំរុញឲ្យប្រជាជនស្នាក់នៅផ្ទះដោយលើកហេតុផលថា ឪពុករបស់ខ្លួនមិនមានបញ្ហាសុខភាពអ្វីនោះទេ មុនពេលធ្លាក់ខ្លួនឈឺដោយជំងឺ COVID-19 រហូតដល់ស្លាប់នោះ។
ចំនួនអ្នកឆ្លងជំងឺរលាកសួតបង្កដោយកូរ៉ូណាវីរុសប្រភេទថ្មីនៅចក្រភពអង់គ្លេស គិតត្រឹមថ្ងៃទី៣០ មីនានេះបានកើនឡើងដល់ជិតពីរម៉ឺននាក់ រីឯអ្នកស្លាប់កើនជាងមួយពាន់នាក់ និងសះស្បើយជាង១០០នាក់។
ក្រោយការស្នើរបស់អ្នកប្រដាល់សញ្ជាតិអង់គ្លេសដែលមានប្រវត្តិប្រកួត២០លើក ឈ្នះ១៩ ចាញ់ម្តង និងផ្តួលឲ្យដៃគូបោះបង់ការប្រកួត១៨លើកនោះ អ្នកគ្រប់គ្រងរបស់គេលោក Frank Warren សង្ឃឹមថា ពលរដ្ឋទាំងអស់នឹងទទួលយកការជំរុញរបស់ Yarde ។
«COVID-19 ជាបញ្ហាមួយដែលជះឥទ្ធិពលដល់យើងទាំងអស់។ យើងសង្ឃឹមថាអ្នកគាំទ្រនឹងស្តាប់ការអង្វរដ៏ស្មោះរបស់ Yarde និងទទួលយកដំបូន្មានរបស់រដ្ឋាភិបាល ដូច្នេះយើងអាចនឹងគេចផុតពីជំងឺនេះ»។ នេះជាការបញ្ជាក់របស់លោក Warren។
ប្រកួតបន្ទាប់របស់ Yarde នឹងត្រូវប៉ះមិត្តរួមជាតិអង់គ្លេសកីឡាករ Lyndon Arthur នៅថ្ងៃទី១១ ខែមេសា ប៉ុន្តែជំនួបនេះត្រូវបានពន្យារពេលវិញរហូតដល់ថ្ងៃទី១១ ខែកក្កដា ដោយសារបារម្ភពីជំងឺរាតត្បាត COVID-19៕
Tag:
COVID-19
Anthony Yarde
Boxing
© រក្សាសិទ្ធិដោយ thmeythmey.com
