ម៉ាឡេស៊ី ជំរុញឲ្យប្រជាជនសែនឆេងម៉េងនៅផ្ទះ ដើម្បីទប់ស្កាត់ COVID-19

COVID-19

អន្តរជាតិ

ម៉ាឡេស៊ី ជំរុញឲ្យប្រជាជនសែនឆេងម៉េងនៅផ្ទះ ដើម្បីទប់ស្កាត់ COVID-19

31, Mar 2020 , 7:59 am

រូបភាព

រូបភាព៖ The Star

ដោយ: ធៀន ភារិន្ទ

ខណៈពេលថ្ងៃសែនឆេងម៉េង ខិតជិតមកដល់នាថ្ងៃទី៤ ខែមេសាខាងមុខ អាជ្ញាធរម៉ាឡេស៊ី បានជំរុញឲ្យប្រជាជនរបស់ខ្លួន គោរពប្រពៃណីដូនតា និងសែនឆេងម៉េងនៅផ្ទះ ដើម្បីជៀសវាងកុំឲ្យល្មើសបទបញ្ជាបទប្រទេសរបស់ម៉ាឡេស៊ី។ ម្យ៉ាងវិញទៀត ការទទូចឲ្យប្រជាជនប្រារព្ធពិធីនៅផ្ទះបែបនេះ គឺដើម្បីទប់ស្កាត់ និងបង្ការករណីឆ្លង នៃជំងឺរលាកសួត ដែលបង្កដោយកូរ៉ូណាវីរុស (COVID-19) ។

តាមរយៈការសរសេរលើបណ្តាញសង្គម Facebook នាថ្ងៃទី២៩ ខែមីនា លោករដ្ឋមន្ត្រីដឹកជញ្ជូន Wee Ka Siong បានបញ្ជាក់ថា ពិធីសែនឆេងម៉េង ដែលគ្រោងនឹងប្រារព្ធនាថ្ងៃទី៤ ខែមេសាខាងមុន ម៉ាឡេស៊ីស្នើឲ្យប្រជាជនទាំងអស់ ដែលមានខ្សែស្រឡាយចិន ប្រារព្ធពិធីសែននៅផ្ទះ ជាជាងទៅខាងក្រៅ ដែលខុសនឹងបទបញ្ជារឹតត្បិតការធ្វើដំណើរ (MCO)។

បន្ថែមពីលើនេះ លោករដ្ឋមន្ត្រីដឹកជញ្ជូន បានបន្តទៀតថា ការប្រតិបត្តិនៅផ្ទះ គឺវាល្អនៅក្នុងកាលៈទេសៈបែបនេះ ព្រោះប្រជាជនមួយចំនួន អាចជៀសវាងពីការឆ្លង COVID-19 ដោយប្រការណាមួយ និងអាចកាត់ផ្តាច់ប្រភពចម្លងបាន។ រដ្ឋាភិបាល ជឿថាប្រជាជនម៉ាឡេស៊ី ដែលមានខ្សែស្រឡាយចិន នឹងប្រារព្ធពិធីសែនឆេងម៉េងនៅផ្ទះតាមបែបបទប្រពៃណីរបស់ខ្លួន។

បើតាមសំណេរលើបណ្តាញសង្គមដដែលនេះ លោករដ្ឋមន្ត្រី ក៏បានសូមទោស និងឲ្យមានការយោគយល់ ពីសំណាក់សហព័ន្ធសមាគមចិនម៉ាឡេស៊ី និងអង្គការសាសនាផ្សេងផងដែរ ចំពោះការមិនអនុញ្ញាតឲ្យមានការប្រារព្ធពិធីសែនឆេងម៉េងនៅថ្ងៃទី៤ ខែមេសាខាងមុខ។ ជាមួយគ្នានេះ លោក Wee បានអះអាងថា ដោយមិនមានប្រកាសពូជសាសន៍ ឬសាសនា ប្រជាជនម៉ាឡេស៊ីទាំងអស់ ត្រូវតែរួមគ្នាជាមួយរដ្ឋាភិបាល ក្នុងអំឡុងពេលដ៏ពិបាកនេះ ដើម្បីប្រយុទ្ធជាមួយCOVID-19 និងរហូតដល់អស់ជំងឺឆ្លងនេះចេញពីប្រទេស។

បន្ទាប់ពីម៉ាឡេស៊ី បានរកឃើញ COVID-19 ដល់ជាង ១ពាន់ករណី នាយករដ្ឋមន្ត្រី មូហ៊ីឌីន យ៉ាស៊ីន បានប្រកាសបិទប្រទេសទាំងមូលតាមរយៈ បទបញ្ជារឹតត្បិតការធ្វើដំណើរ (MCO) ចាប់តាំងពីថ្ងៃទី១៨ ខែមីនា រហូតដល់ថ្ងៃទី១៤ ខែមីនា។ បើនរណាហានបំពានបទបញ្ជាថ្មីនេះ អ្នកទាំងនោះនឹងត្រូវជាប់ពន្ធនាគាររហូតដល់ ៦ខែ និងពិន័យជាប្រាក់ប្រមាណជា ២២៥ ដុល្លារថែមទៀត។

សូមបញ្ជាក់ថា គិតត្រឹមរសៀលថ្ងៃទី២៥ ខែមីនា ម៉ាឡេស៊ីរកឃើញCOVID-19 សរុបចំនួន ២៤៧០ករណី និងអ្នកស្លាប់ ៣៥ករណី។ ចំណែកអ្នកជាសះស្បើយនៅម៉ាឡេស៊ីមានចំនួន ៣៨៨ករណី៕