COVID-19
អន្តរជាតិ
នាយករដ្ឋមន្ត្រីវៀតណាម លើកឡើងពីលទ្ធភាពបិទក្រុងសំខាន់ៗទប់ស្កាត់ COVID-19 លោកនាយករដ្ឋមន្ត្រីវៀតណាម ង្វៀន សួនហ្វុក (សារព័ត៌មានវៀតណាម Nhan Dan)
× នាយករដ្ឋមន្ត្រីវៀតណាម ង្វៀន ស៊ួនហ្វុក បានស្នើសុំឲ្យទីក្រុងសំខាន់ៗត្រៀមលក្ខណៈសម្រាប់លទ្ធភាពនៃការបិទ (lockdown) ក្នុងគោលដៅបញ្ឈប់ការរីករាលដាល COVID-19 ។ ការលើកឡើងពីលទ្ធភាពបិទក្រុងបែបនេះ ធ្វើឡើងខណៈករណីឆ្លង COVID-19 នៅប្រទេសក្នុងតំបន់អាស៊ីអាគ្នេយ៍មួយនេះ ឈានដល់ជិត២០០ករណីហើយ។
«ហាណូយ និងទីក្រុង ហូជីមិញ ត្រូវតែត្រួតពិនិត្យ និងធ្វើបច្ចុប្បន្នភាពផែនការដើម្បីប្រយុទ្ធប្រឆាំងនឹងវីរុស ហើយត្រូវតែត្រៀមលក្ខណៈរួចរាល់សម្រាប់សេណារីយ៉ូបិទទីក្រុង»។ នាយករដ្ឋមន្ត្រីវៀតណាម ង្វៀន ស៊ួនហ្វុក បញ្ជាក់បែបនេះក្នុងសេចក្តីថ្លែងការណ៍មួយនៅថ្ងៃទី៣០ ខែមីនា។
តាមការចុះផ្សាយរបស់ទីភ្នាក់ងារព័ត៌មាន AFP ប្រមុខរដ្ឋាភិបាលរូបនេះ សង្កត់ធ្ងន់ថា វៀតណាមបានឈានដល់ដំណាក់ការកំពូលនៃការឆ្លងរាតត្បាត ហើយដូច្នេះទីក្រុងសំខាន់ៗ ត្រូវតែពន្លឿនក្នុងការដាក់ចេញចំណាត់ការពួកកេ។
រដ្ឋាភិបាលវៀតណាម បានដាក់ចេញបញ្ជាឲ្យបញ្ឈប់ជើងហោះហើរក្នុងស្រុក, កាត់បន្ថយជើងហោះហើរក្នុងស្រុក, ផ្អាកការជួបជុំសាធារណៈ និងបិទសេវាកម្មមិនចាំបាច់ជាបណ្តោះអាសន្នរហូតដល់ថ្ងៃទី១៥ ខែមេសា។ ទន្ទឹមនេះ វៀតណាម ក៏ដាក់ចេញចំណាត់ការធ្វើចត្តាឡីស័កនិងតាមរកម៉ឺនម៉ាត់បំផុត ខណៈករណីឆ្លងភាគច្រើនជាការនាំចូលដោយពលរដ្ឋវៀតណាមមកពីក្រៅប្រទេស និងជនបរទេស។
សូមបញ្ជាក់ថា គិតត្រឹមថ្ងៃចន្ទ ៣០ ខែមីនា វៀតណាម មានករណីឆ្លងសរុប ១៩៤ករណីហើយ ក្នុងនោះ ៥៤នាក់ បានជាសះស្បើយ។ នេះបើតាមក្រសួងសុខាភិបាលវៀតណាម។ យ៉ាងណាមិញ វៀតណាមពុំទាន់មានករណីស្លាប់ដោយសារ COVID-19 នៅឡើយតែ។ ម្យ៉ាងទៀត មនុស្សជាង៧៥០០០នាក់ ត្រូវបានដាក់នៅដាច់ដោយឡែក ខណៈរដ្ឋាភិបាលមានបំណងកម្រិតករណីឆ្លងទាបជាង១០០០ករណី៕
Tag:
វៀតណាម
COVID-19
ង្វៀន សួនហ្វុក
© រក្សាសិទ្ធិដោយ thmeythmey.com