សេដ្ឋកិច្ច
អន្តរជាតិ
ពលរដ្ឋថៃ៩លាននាក់ដែលរងគ្រោះដោយសារ COVID-19 នឹងបានលុយម្នាក់១៥០ដុល្លារ លោកនាយករដ្ឋមន្ត្រីថៃ ប្រាយុទ្ធ ចន្ទអូចា (AFP)
× ប្រជាជនថៃ៩លាននាក់ក្នុងចំណោម ២១,៧លាននាក់ដែលបានចុះឈ្មោះ នឹងមានសិទ្ធិសម្រាប់ទទួលជំនួយជាសាច់ប្រាក់៥ពាន់បាត (ប្រមាណ១៥២ដុល្លារ) ដែលផ្ដល់ជូនដោយរដ្ឋាភិបាល។ អ្នកនាំពាក្យរដ្ឋាភិបាលថៃ បញ្ជាក់បែបនេះ នៅថ្ងៃ៣១ ខែមីនា ដោយបន្ថែមថា ការផ្ដល់ឲ្យនេះ គឺមានគោលដៅជួយបន្ធូរបន្ថយឥទ្ធិពល COVID-19 លើជីវភាពពលរដ្ឋរងគ្រោះ។
តាមការចុះផ្សាយរបស់កាសែតបាងកកប៉ុស្តិ៍ អ្នកនាំពាក្យរដ្ឋាភិបាលថៃ អ្នកស្រី Narumon Pinyosinwat គូសបញ្ជាក់ថា គណៈរដ្ឋមន្ត្រីថៃ កាលពីថ្ងៃអង្គារ បានអនុម័តផែនការផ្ដល់ជំនួយសម្រាប់មនុស្សទាំង៩លាននាក់នេះ។ បើតាមអ្នកស្រី កញ្ចប់ថវិកាសរុបដែលរដ្ឋាភិបាលថៃត្រូវចំណាយលើកម្មវិធីជំនួយនេះ ស្មើនឹង៤,១១ពាន់លានដុល្លារ។
អ្នកស្រី Pinyosinwat អះអាងទៀតថា ពលរដ្ឋថៃ៣លាននាក់ដំបូង នឹងអាចទទួលប្រាក់ជំនួយពីរដ្ឋាភិបាលថៃនេះក្នុងពេលឆាប់ៗខាងមុខក្នុងខែមេសានេះ។ បើតាមប្រភពរដ្ឋាភិបាលថៃម្នាក់ ថវិកាជំនួយដល់ពលរដ្ឋរងគ្រោះដោយសារ COVID-19 នេះ នឹងត្រូវដកចេញពីកញ្ចប់ថវិការបស់បណ្ដាក្រសួង។
ត្រង់ចំណុចនេះ ក្រសួងថៃនីមួយៗ នឹងត្រូវកាត់ខ្ទង់ចំណាយរបស់ខ្លួនប្រមាណ១០ភាគរយ ក្នុងគោលដៅយកទៅប្រើជាកញ្ចប់ជំនួយ ហើយក៏ជួយដល់កិច្ចប្រឹងប្រែងទប់ស្កាត់ការរីករាលដាល COVID-19 ផងដែរ។ នេះបើតាមកាសែត បាងកកប៉ុស្តិ៍ ដោយដកស្រង់ពីប្រភពរដ្ឋាភិបាលថៃ ដែលបន្ថែមថា ធនាគារសន្សំរបស់រដ្ឋាភិបាលថៃ និងធនាគារកិច្ចសហប្រតិបត្តិការកសិកម្មថៃ ក៏នឹងផ្ដល់កម្ចីជាសាច់ប្រាក់រហូតដល់ជាង៤៨,៧លានដុល្លារជូនដល់អាជីវករថៃដែលរងគ្រោះធ្ងន់ធ្ងរដោយសារ COVID-19 ផងដែរ។
សូមបញ្ជាក់ថា គិតត្រឹមព្រឹកថ្ងៃទី១ ខែមេសា ប្រទេសថៃ បានរកឃើញករណីឆ្លង COVID-19 សរុប ១៦៥១ករណីហើយ ខណៈអ្នកស្លាប់មាន១០នាក់។ អ្នកជាសះស្បើយមាន ៣៤២នាក់ ចំណែក អ្នកស្ថិតក្នុងស្ថានភាពធ្ងន់ធ្ងរមាន ២៣នាក់។ នេះបើតាមក្រសួងសុខាភិបាលថៃ៕
Tag:
ថៃ
ប្រាយុទ្ធចន្ទអូចា
COVID-19
សេដ្ឋកិច្ច
© រក្សាសិទ្ធិដោយ thmeythmey.com