រដ្ឋាភិបាលអាមេរិកកំពុងប្រញាប់ប្រញាល់ រៀបចំមន្ទីរពេទ្យបណ្តោះអាសន្នដើម្បីជួយបន្ធូរប្រព័ន្ធសុខាភិបាលដែលកំពុងពេញបន្ទុក ខណៈកាលពីថ្ងៃទី ៣១ មីនាចំនួនអ្នកស្លាប់មានដល់ ៧០០ ក្នុងមួយថ្ងៃ។ ចំនួនអ្នកស្លាប់ទាំងអស់ឡើងលើសបួនពាន់នាក់ហើយ។ នេះយោងតាមទីភ្នាក់ងារព័ត៍មាន Reuters ។
បើតាមតួលេខរបស់សាកលវិទ្យាល័យ John Hopkins ចំនួនករណីឆ្លងនៅអាមេរិកមានជាង១៨៩០០០នាក់នៅត្រឹមព្រឹកថ្ងៃទី១ ខែមេសា។ ថ្ងៃទី៣១ ខែមីនា ជាថ្ងៃមានករណីស្លាប់ច្រើនជាងគេ។ ចំនួនអ្នកស្លាប់ ៧០០នាក់នេះក្នុងមួយថ្ងៃនេះ គឺស្មើនឹងការស្លាប់រៀងរាល់២នាទី។ ចំនួនជាងពាក់កណ្តាលនៃអ្នកស្លាប់ មកពីទីក្រុង ញ៉ូវយ៉ក ដែលជាចំនុចក្តៅនៃការឆ្លងជំងឺ COVID-19។
អភិបាលក្រុង ញូវយ៉ក លោក Bill de Blasio បានស្នើសុំជំនួយពីរដ្ឋការលោកប្រធានាធិបតី ដូណាល់ ត្រាំ ដោយសំអាងថា ស្ថានការណ៍នឹងកាន់តែអាក្រក់នៅសប្តាហ៍ក្រោយ។ លោក Bill de Blasio បានស្នើសុំជំនួយដូចជាគិលានុបដ្ឋាយិកាបន្ថែមចំនួន ១០០០នាក់ អ្នកជំនាញផ្លូវដង្ហើម ៣០០នាក់ និងវេជ្ជបណ្ឌិត១៥០ សម្រាប់ថ្ងៃទី៤ ខែមេសាខាងមុខ។ ប៉ុន្តែមិនទាន់មានចម្លើយពីរដ្ឋការលោកប្រធានាធិបតី ដូណាល់ ត្រាំឡើយ។
«នៅដំណាក់កាលនេះ យើងត្រូវរៀបចំសម្រាប់សប្តាហ៍ក្រោយដែលរំពឹងថានឹងមានករណីឆ្លងច្រើន។ អ្វីដែលខ្ញុំស្នើសុំនៅសប្តាហ៍មុននេះ គឺការបញ្ជូនពេទ្យយោធាមកកាន់ទីនេះ»។ នេះជាការលើកឡ់ើងរបស់លោក Bill de Blasio អភិបាលក្រុង ញ៉ូវយ៉ក។
គួរបញ្ជាក់ផងដែរថា តាំងតែពីមានការផ្ទុះជំងឺនៅអាមេរិកមក ចំនួនអ្នកស្លាប់បានកើនឡើងលើសបួនពាន់នាក់ហើយ ដែលចំនួននេះច្រើនជាងអ្នកស្លាប់ក្នុងអំពើភេរវកម្មនា ខែកញ្ញា ឆ្នាំ ២០០១ ទៅទៀត។ មកទល់ពេលនេះ ចំនួនអ្នកដែលបានឆ្លងជំងឺ COVIC-19 បានកើនពី ១៨៨,០០០ នាក់។
បន្ថែមពីនេះ អ្នកជំនាញសុខាភិបាលនៅសេតវិមាន បានបន្ថែមថាចំនួនអ្នកស្លាប់អាចមានពីចន្លោះ ១សែននាក់ទៅ ២សែននាក់ បើទោះបីជាទីក្រុងធំៗបានឲ្យពលរដ្ឋស្នាក់នៅក្នុងផ្ទះ និងចេញទៅក្រៅសម្រាប់តែករណីចាំបាច់ក៏ដោយ។ មកទល់ពេល នេះរដ្ឋចំនួន៣០ នៅសហរដ្ឋអាមេរិក បានបញ្ញាឲ្យពលរដ្ឋស្នាក់នៅក្នុងផ្ទះដើម្បីទប់ទៅនឹងការឆ្លងជំងឺ បើទោះបីជាវិធានការនេះបណ្តាលឲ្យប៉ះពាល់សេដ្ឋកិច្ច និងមនុស្សគ្មានប្រាក់ចំណូលក្នុងរយៈពេលបណ្តោះអាសន្នក៏ដោយ។
ទៅលើរឿងមន្ទីរពេទ្យវិញ កងវិស្វកម្មទ័ពជើងគោកអាមេរិកបានកំពុងស្វែងរក សណ្ឋាគារ កន្លែងស្នាក់នៅ និងកន្លែងជួបជុំ ដើម្បីបម្លែងទៅជាមន្ទីរពេទ្យបណ្តោះអាសន្នចំនួន ៣៤១ ។ នេះយោងតាមឧត្តមសេនីយ៍ឯក Todd Semonite ប្រាប់សារព័ត័មាន ABC News។
នៅទីក្រុង ញ៉ូវយ៉កកងវិស្វកម្មបានធ្វើការជាមួយមន្ត្រីប្រចាំរដ្ឋក្នុងការបម្លែងកន្លែងជួបជុំមួយទៅជាមន្ទីរពេទ្យដែលមានគ្រែចំនួន ១០០០ ក្នុងរយៈពេលមួយសប្តាហ៍។ ជាមួយគ្នានោះ សភាអាមេរិកកំពុងពិភាក្សាពីកញ្ចប់ថវិកាបន្ថែម បន្ទាប់ពីបានអនុម័តកញ្ចប់ថវិការ២,២ទ្រីលានដុល្លារកាលពីសប្តាហ៍មុន៕