COVID-19
ជាតិ
លោក ពេជ្រ ស្រស់ ៖មន្ត្រីរដ្ឋាភិបាល ត្រូវយកគំរូសម្ដេច ហ៊ុន សែន ដែលលះបង់ប្រាក់ខែរដ្ឋ ដើម្បីដោះស្រាយ COVID-19 លោក ពេជ្រ ស្រស់ ប្រធានគណបក្សយុវជនកម្ពុជា (នៅខាងឆ្វេងដៃ សម្ដេចនាយករដ្ឋមន្រ្តី ហ៊ុន សែន)
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បានប្រកាសមិនយកប្រាក់បៀវត្ស ចំនួន៧ខែ ដើម្បីទុកថវិកានោះ ជូនរដ្ឋ សម្រាប់យកប្រើប្រាស់ដោះស្រាយបញ្ហាជំងឺCOVID-19។ ទង្វើរបស់សម្ដេច ហ៊ុន សែន គឺជាគំរូដល់មន្ត្រីរដ្ឋាភិបាលដទៃទៀត ដែលត្រូវអនុវត្តតាម។
លោក ពេជ្រ ស្រស់ ប្រធានគណបក្សយុវជនកម្ពុជា យល់ឃើញថា មន្ត្រីរដ្ឋាភិបាលទាំងអស់ គួរតែអនុវត្តតាមនាយករដ្ឋមន្ត្រី ហ៊ុន សែន ដែលប្រកាសមិនយកប្រាក់បៀវត្សនេះ ព្រោះវាជាចំណែកមួយ ក្នុងការដោះស្រាយបញ្ហាប្រជាពលរដ្ឋ ដែលកំពុងប្រឈមមុខនៃការរាតត្បាតនៃជំងឺCOVID-19។
សមាជិកក្រុមប្រឹក្សាពិគ្រោះ និងផ្ដល់យោបល់រូបនេះ បានវាយតម្លៃចំពោះទង្វើរបស់សម្ដេច ហ៊ុន សែន ដូច្នេះថា៖«វាជាការពិតណាស់ក្នុងភាពជាគំរូដល់មន្ត្រីដទៃ ដើម្បីជួយពលរដ្ឋក្នុងគ្រាមានអាសន្ន ហើយក៏ជាសញ្ញាដាស់តឿនដល់គ្រប់មន្ត្រីរាជការឲ្យគិតពីសុខទុក្ខរបស់រាស្ត្រនៅពេលរាស្ត្រមានទុក្ខ កុំសម្ងំសុខយកតែខ្លួនឯង»។
សម្រាប់លោក ពេជ្រ ស្រស់ ខ្លួនឯងផ្ទាល់ ក៏បានស្នើឱ្យរដ្ឋាភិបាលកាត់ប្រាក់ខែលោក នៅក្នុងសមាជិកក្រុមប្រឹក្សាពិគ្រោះ និងផ្ដល់យោបល់ចំនួន៣ខែដែរ គឺចាប់ពីខែមេសាដល់មិថុនា ដើម្បីទុកថវិកាជូនរដ្ឋ យកប្រើប្រាស់ដោះស្រាយបញ្ហាពលរដ្ឋ ដែលកំពុងរងគ្រោះដោយសារវីរុសCOVID-19។ មិនតែប៉ុណ្ណោះលោក ក៏បានប្រមូលវិភាគទានពីសប្បុរសធម៌ យកទៅទិញសម្ភារៈ និងគ្រឿងបរិភោគជូនពលរដ្ឋខ្វះខាត ក្នុងបរិបទនេះដែរ។
ក្រោយពីសម្ដេចនាយករដ្ឋមន្ត្រី ហ៊ុន សែន បានប្រកាសមិនយកប្រាក់បៀវត្ស៧ខែមក គេក៏សង្កេតឃើញរដ្ឋមន្ត្រីកម្ពុជា មួយចំនួនប្រកាសកាត់ប្រាក់ខែជាបន្តបន្ទាប់ ក្នុងនោះរួមមាន៖ លោក ជា សុផារ៉ា រដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់ (៧ខែ) លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម (៧ខែ) លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវីជ្ជាជីវៈ (៦ខែ) លោក អ៊ុក រ៉ាប៊ុន រដ្ឋមន្ត្រីអភិវឌ្ឍន៍ជនបទ (៦ខែ) លោក ម៉ម ប៊ុនហេង រដ្ឋមន្ត្រីក្រសួងសុខភិបាល (៦ខែ) លោក សាយ សំអាល់ រដ្ឋមន្ត្រីក្រសួងបរិស្ថាន (៦ខែ) លោក ជា វ៉ានដេត រដ្ឋមន្ត្រីថ្មី នៃក្រសួងប្រៃសនីយ និងទូរគមនាគមន៍ (៦ខែ) លោក កើត រិទ្ធ រដ្ឋមន្ត្រីថ្មី នៃក្រសួងយុត្តិធម៌ (៦ខែ) លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល(៦ខែ) និងលោក សុខ សុក្រីត្យា ទីប្រឹក្សាសម្តេច ហ៊ុន សែន និងជារដ្ឋលេខាធិការក្រសួងទេសចរណ៍(៦ខែ)ជាដើម។ នេះបើតាមការចុះផ្សាយរបស់Fresh News៕
Tag:
COVID-19
ពេជ្រ ស្រស់
© រក្សាសិទ្ធិដោយ thmeythmey.com