COVID-19
អន្តរជាតិ
អតីតនាយករដ្ឋមន្ត្រីសូម៉ាលី និងអតីតរដ្ឋមន្ត្រីបរិស្ថានស៊ែប៊ី ស្លាប់ដោយសារកូវីដ-១៩ លោក Nur Hassan Hussein អតីតនាយករដ្ឋមន្ត្រីសូម៉ាលី (ឆ្វេង) និងលោក Branislav Blazic អតីតរដ្ឋមន្ត្រីក្រសួងបរិស្ថានស៊ែប៊ី
× លោក Nur Hassan Hussein អតីតនាយករដ្ឋមន្ត្រីសូម៉ាលី និងលោក Branislav Blazic អតីតរដ្ឋមន្ត្រីក្រសួងបរិស្ថានស៊ែប៊ី ស្ថិតក្នុងចំណោមមនុស្សរាប់ពាន់នាក់លើពិភពលោក ដែលបានទទួលមរណភាពដោយសារ COVID-19 កាលពីថ្ងៃទី១ ខែមេសា។
លោក Nur Hassan Hussein ដែលគេស្គាល់ទូទៅថា Nur-Adde ជានាយករដ្ឋមន្ត្រីទី១២របស់សូម៉ាលី ចន្លោះពីឆ្នាំ២០០៧ ដល់ឆ្នាំ២០០៩។ លោកបានទទួលមរណភាពក្នុងអាយុ៨៣ឆ្នាំ នៅក្រុងឡុងដ៍នារយៈពេល៥ថ្ងៃ ក្រោយតេស្តវិជ្ជមាន COVID-19 ។
លោក Adde ស្ថិតក្នុងចំណោមមនុស្សកំពូលៗនៅអាហ្វ្រិកដែលបានស្លាប់ដោយ COVID-19 បន្ទាប់ពី លោក Rose Marie Compaore អតីតអនុប្រធានទី១រដ្ឋសភាបួគីណាហ្វាសូ លោក Mnu Dibango វីរបុរសតន្ត្រីហ្សាស់កាមេរូន តារាតន្ត្រីកុងហ្គោ លោក Aurlus Mabele និងលោក Pape Diouf ជនជាតិសេណេហ្គាល់ដែលជាអតីតប្រធានក្លិបបាល់ទាត់បារាំង Olympique de Marseille ជាដើម។
អតីតថ្នាក់ដឹកនាំប្រទេសម្នាក់ទៀតដែលបានស្លាប់ដោយសារ COVID-19 ផងដែរនោះ គឺលោក Joachim Yhombi Opango ដែលជាអតីតប្រធានាធិបតី និងជាអតីតនាយករដ្ឋមន្ត្រីសាធារណរដ្ឋប្រជាធិបតេយ្យកុងហ្គោ។
កាលពីថ្ងៃទី១ ខែមេសា ផងដែរ លោក Branislav Blazic អតីតរដ្ឋមន្ត្រីការពារបរិស្ថានស៊ែប៊ី ពីឆ្នាំ១៩៩៨ ដល់ឆ្នាំ២០០០ ក៏បានទទួលមរណភាពដោយសាររោគរាតត្បាតនេះនៅក្រុង Belgrade។
លោក Blazic ដែលរៀនចប់ជំនាញផ្នែកវេជ្ជសាស្ត្រ បានស្លាប់នៅចំថ្ងៃប្រារព្ធខួបកំណើតអាយុ៦៣ឆ្នាំរបស់ខ្លួន៕
© រក្សាសិទ្ធិដោយ thmeythmey.com