COVID-19
អន្តរជាតិ
WHO៖ ការអនុគ្រោះបំណុលចាំបាច់សម្រាប់ប្រទេសកំពុងអភិវឌ្ឍ ប្រយុទ្ធនឹង COVID-19 ពលករចំណាកស្រុកនៅឥណ្ឌាចាំរថយន្តក្រុងត្រលប់ទៅស្រុកកំណើតវិញ ក្រោយរដ្ឋាភិបាលបិទប្រទេសទាំងមូលកាលពីសប្តាហ៍មុន (Reuters)
× អគ្គនាយកអង្គការសុខភាពពិភពលោក (WHO) បញ្ជាក់នៅថ្ងៃទី១ ខែមេសាថា ភ្នាក់ងារលោក, ធនាគារពិភពលោក និងមូលនិធិរូបិយវត្ថុអន្តរជាតិ (IMF) គាំទ្រលើការអនុគ្រោះបំណុល (Debt relief) ក្នុងគោលដៅជួយបណ្ដាប្រទេសកំពុងអភិវឌ្ឍទប់ទល់នឹងផលវិបាកសេដ្ឋកិច្ចនិងសង្គម ដែលបង្កឡើងដោយជំងឺរាតត្បាតសាកល COVID-19 ។ បន្ថែមពីនេះ ប្រមុខអង្គការអន្តរជាតិរូបនេះ ក៏លើកកង្វល់ជុំវិញការរាលដាលយ៉ាងលឿនរហ័សនៃ COVID-19 នៅទូទាំងសាកលលោក ដែលបច្ចុប្បន្នឈានដល់ប្រទេសនិងដែនអធិបតេយ្យភាពចំនួន២០៥ហើយនោះ។
«បណ្ដាប្រទេសកំពុងអភិវឌ្ឍជាច្រើន នឹងជួបការលំបាកក្នុងការអនុវត្តកម្មវិធីសុខុមាលភាពសង្គមនានា នៅចំពោះមុខការផ្ទុះរាលដាលវីរុសនេះ»។ លោកអគ្គនាយក Tedros Adhanom Ghebreyesus អះអាងបែបនេះនៅសន្និសីទព័ត៌មានតាមអនឡាញមួយនៅទីស្នាក់ការកណ្ដាល WHO នៅក្រុងហ្សឺណែវ។ លោក គូសបញ្ជាក់ដូច្នេះថា៖«សម្រាប់ប្រទេសទាំងនោះ ការអនុគ្រោះបំណុល គឺមានចាំបាច់បំផុតដើម្បីអនុញ្ញាតពួកគេមើលថែប្រជាជន និងបង្ការការដាំក្បាលចុះនៃសេដ្ឋកិច្ច»។
ត្រង់ចំណុចនេះ លោក Tedros សង្កត់ធ្ងន់ថា នេះគឺការស្នើសុំពីសំណាក់អង្គការ WHO, ធនាគារពិភពលោក និងមូលនិធិរូបិយវត្ថុអន្តរជាតិ (IMF) ឲ្យមានការអនុគ្រោះបំណុលផ្ដល់ជូនដល់បណ្ដាប្រទេសកំពុងអភិវឌ្ឍ។ យ៉ាងណាមិញ ប្រមុខអង្គការអន្តរជាតិរូបនេះ លើកឡើងថា ដំណើរការនៃការអនុគ្រោះបំណុល ទាមទារពេលយូរ។
តាមការចុះផ្សាយរបស់ទីភ្នាក់ងារព័ត៌មាន Reuters លោក Tedros លើកសរសើរផែនការផ្ដល់សម្ទុះសេដ្ឋកិច្ចទំហំទឹកប្រាក់២២,៦ពាន់លានដុល្លាររបស់រដ្ឋាភិបាលឥណ្ឌាដែលបានប្រកាស បន្ទាប់ពីសម្រេចបិទប្រទេសទាំងមូលរយៈពេល២១ថ្ងៃកាលពីសប្តាហ៍មុន។ គោលដៅនៃផែនការជំនួយសេដ្ឋកិច្ចនេះ គឺដើម្បីផ្ដល់ចំណីអាហារគ្រប់គ្រាន់សម្រាប់ពលរដ្ឋខ្វះខាតចំនួន៨០០លាននាក់, ប្រគល់ប្រាក់ជំនួយជូនដល់ស្ត្រីក្រីក្រ២០៤លាននាក់ និងផ្ដល់ហ្គាសសម្រាប់ចម្អិនអាហារជូនដល់គ្រួសារឥណ្ឌាខ្វះខាត៨០លានគ្រួសារសម្រាប់រយៈពេល៣ខែខាងមុខ។
ទន្ទឹមនឹងការគាំទ្រលើការដោះបន្ទុកបំណុលសម្រាប់បណ្ដាប្រទេសកំពុងអភិវឌ្ឍ លោកអគ្គនាយក Tedros លើកឡើងថា ក្នុងរយៈពេល៥សប្តាហ៍ចុងក្រោយ វាមានកំណើនយ៉ាងលឿនរហ័សនៃករណីឆ្លង COVID-19 ហើយតួលេខអ្នកស្លាប់ដោយសារ COVID-19 កើនឡើងទ្វេដងក្នុងពេលមួយសប្តាហ៍ចុងក្រោយ។ ដោយផ្អែកលើសម្ទុះបច្ចុប្បន្ន លោកព្យាករថា៖«ក្នុងពេលដ៏ខ្លីខាងមុខ យើងនឹងឈានដល់១លានករណីដែលបានរកឃើញ និងស្លាប់៥ម៉ឺននាក់ទូទាំងពិភពលោក»។
បើតាមវេបសាយ worldometers.info ដែលតាមដានតួលេខ COVID-19 ករណីឆ្លងCOVID-19សរុបនៅទូទាំងពិភពលោក មានចំនួនជាង៩៣ម៉ឺននាក់ ខណៈអ្នកស្លាប់ មាន៤៧២៦៤នាក់ ហើយអ្នកជាសះស្បើយមាន ជិត២០ម៉ឺននាក់ គិតត្រឹមរសៀលថ្ងៃទី២ ខែមេសា ៕
Tag:
WHO
ប្រទេសកំពុងអភិវឌ្ឍ
COVID-19
© រក្សាសិទ្ធិដោយ thmeythmey.com