ភ្នំពេញ៖ រដូវកាលសែនឆេងម៉េង ជាពេលដែលជ្រូកខ្វៃដែលជាសំណែនដ៏សំខាន់ លក់ដាច់ខ្លាំង។ ប៉ុន្តែឆ្នាំនេះ ខុសពីឆ្នាំមុន។ ជ្រូកខ្វៃ ដែលធ្លាប់លក់សឹងមិនទាន់ បែរជាលក់សឹងមិនអស់ ព្រោះពលរដ្ឋបងប្អូនខ្មែរសែស្រឡាយចិនភាគច្រើន មិនបានទៅសែនផ្នូរដោយផ្ទាល់ ដើម្បីចូលរួមទប់ស្កាត់ការរាលដាលជំងឺកូវីដ-១៩។
ជ្រូកខ្វៃ ជាសំណែនដ៏សំខាន់ សម្រាប់រដូវកាលសែនផ្នូរ (ឆេងម៉េង) របស់ខ្មែរសែស្រឡាយចិន។ ក៏ប៉ុន្តែឆ្នាំ២០២០នេះ ជ្រូកខ្វៃបែរជាលក់មិនសូវដាច់។ ជំងឺ Covid-19 ជាមូលហេតុធក្នុងរឿងនេះ។
លោក ឈុន វិសិដ្ឋ ម្ចាស់អាជីវកម្មខ្វៃជ្រូកលក់ នៅខណ្ឌឬស្សីកែវ បានបញ្ជាក់ប្រាប់សារព័ត៌មានថ្មីៗថា ការខ្វៃជ្រូករបស់លោកនៅរដូវសែនឆេងម៉េងឆ្នាំនេះ ថយចុះប្រមាណ៦០ភាគរយ។ លោក ឈុន វិសិដ្ឋ ថាលោកត្រៀមខ្វៃជ្រូកតែប្រមាណ៣០០ក្បាល ខណៈឆ្នាំមុន លោកខ្វៃជ្រូក ដល់ទៅ៧០០ក្បាល។ លោក ឈុន វិសិដ្ឋ បញ្ជាក់ដូច្នេះ៖«ឆ្នាំនេះ មានអ្នកទិញខ្លះ កម្ម៉ង់យើងហើយគេក៏លុបវិញទៅ ដោយសារតែគេអត់ហ៊ានចេញទៅសែននៅខេត្ត ពីព្រោះតែគេខ្លាចជំងឺកូវីដ-១៩ហ្នឹង»។
ពីកញ្ញា ស្រីម៉ៅ អាជីវករលក់ជ្រូកខ្វៃនៅស្រុកមុខកំពូល ខេត្តកណ្តាល
ចំណែក កញ្ញា ស្រីម៉ៅ អ្នកលក់មាន់ ទា ក្រួច និងជ្រូកខ្វៃ នៅស្រុកមុខកំពូល ខេត្តកណ្តាល ក៏ពុំសូវមានការទទួលកម្ម៉ង់ពីភ្ញៀវដែរ នៅថ្ងៃសែនឆេងម៉េងឆ្នាំនេះ។ អាជីវកររូប ក៏យល់ថា ការលក់របស់ខ្លួនធ្លាក់ចុះ គឺដោយសារពលរដ្ឋភាគច្រើន មិនបានទៅសែននៅផ្នូរផ្ទាល់ ដោយខ្លាចកូវីដ-១៩ដែរ។
បើតាម ស្រីម៉ៅ ឆ្នាំនេះនាងទទួលបានការកម្ម៉ង់តែប្រមាណ១០០ក្បាលប៉ុណ្ណោះ ថយចុះខ្លាំង បើប្រៀបធៀបឆ្នាំមុន ដែលមានគេកម្ម៉ង់ដល់ទៅជិត៤០០ក្បាលឯណោះ។ ដ្បិតការលក់ដូររបស់ខ្លួនថយចុះ ប៉ុន្តែអាជីវករូបនេះមិនពិបាកចិត្តខ្លាំងឡើយ ព្រោះស្រីម៉ៅយល់ថា ពលរដ្ឋមានការយល់ដឹងច្រើន ពីការការពារការរាលដាលជំងឺកូវីដ-១៩។ កញ្ញា ស្រីម៉ៅរៀបរាប់ដូច្នេះ៖ «ខ្ញុំលក់ត្រឹមតែបរិមាណដែលយើងអាចធ្វើបាន យើងធ្វើតែទៅតាមការកម្ម៉ង់។ យើងមិនមែនចេះតែធ្វើលក់រាប់ពាន់ក្បាលទេ ហើយយើងក៏អត់សល់ និងខាតដែរ។ សម្រាប់ខ្ញុំ ខ្ញុំគិតថាស្ថានភាពបែបហ្នឹង យើងមិនមានថាអត់យល់ទេ ហើយមិនមែនថាយើងមិនសប្បាយចិត្តដែរ បើពិភពលោកកំពុងតែជួបរឿងអ៊ីចឹងដូចគ្នា»។
រូបភាពពីកញ្ញា ស្រីម៉ៅ អាជីវករលក់ជ្រូកខ្វៃនៅស្រុកមុខកំពូល ខេត្តកណ្តាល
ក្រៅពីជំងឺកូវីដ-១៩ ស្រីម៉ៅ ដែលប្រកបរបរលក់ជ្រូកខ្វៃប្រមាណ១០ឆ្នាំមកហើយនោះ ឲ្យដឹងថា ជ្រូកឆ្នាំនេះ ក៏ថ្លៃជាងឆ្នាំមុនដែរ។ ឆ្នាំមុនមានជ្រូកខ្វៃលក់តម្លៃ៦០ម៉ឺនរៀល តែឆ្នាំនេះ ខ្ទង់៨០ម៉ឺនរៀល ទើបលក់បាន។
ចំពោះតម្លៃជ្រូកខ្វែឡើងថ្លៃនេះ ត្រូវបានលោក ឈុន វិសិដ្ឋ ពន្យល់ថាដោយសារឥទ្ធិពលនៃការផ្ទុះជំងឺប៉េស្តជ្រូកអាហ្វ្រិក ក្នុងឆ្នាំ២០១៩ នៅប្រទេសវៀតណាម ដែលធ្វើឲ្យជ្រូកវៀតណាមមិនអាចចេះតែនាំចូលមកស្រុកខ្មែរ។ «ការនាំចូលជ្រូកពីវៀតណាមបានបិទ ហ្នឹងក៏មូលហេតុដែលធ្វើឲ្យជ្រូកខ្មែរ មានតម្លៃថ្លៃ។ ជ្រូកក្នុងស្រុក ក៏មិនសូវសម្បូរ ហើយក៏ឡើងថ្លៃទៅទៀត និងជំងឺកូវីដ-១៩ កំពុងតែរាតត្បាតផងដែរនោះ ដែលធ្វើឲ្យលោកក៏ដំឡើងថ្លៃទៅតាមហ្នឹងដែរ»។ នេះជាការរៀបរាប់របស់លោក ឈុន វិសិដ្ឋ៕
ទិដ្ឋភាពការសែនឆេងម៉េង