COVID-19
អន្តរជាតិ
COVID-19៖ លោក ត្រាំ សម្រេចប្រើច្បាប់ផលិតកម្មការពារជាតិ ដើម្បីជំរុញការផលិតបរិក្ខារពេទ្យ បរិក្ខាជំនួយដង្ហើម-AFP
× លោក ដូណាល់ ត្រាំ ប្រធានាធិបតីអាមេរិក នៅថ្ងៃទី២ ខែមេសា បានសម្រេចប្រើច្បាប់ផលិតកម្មការពារជាតិ (Defense Production Act) ដើម្បីជួយដល់ក្រុមហ៊ុនដែលផលិតបរិក្ខាជំនួយដង្ហើមសម្រាប់ព្យាបាលអ្នកជំងឺ COVID-19 ឲ្យទទួលបានការផ្គត់ផ្គង់សម្ភារៈផលិតចាំបាច់។ នេះតាមការផ្សាយរបស់ទីភ្នាក់ងារព័ត៍មាន Reuters។
ក្នុងលិខិតដែលផ្សព្វផ្សាយដោយសេតវិមាន ប្រធានាធិបតី ដូណាល់ ត្រាំ បាន បង្គាប់ឲ្យរដ្ឋមន្ត្រីក្រសួងសុខាភិបាល និងសេវាមនុស្ស ប្រើប្រាស់អំណាចដែលមានក្នុងការជួយសម្របសម្រួលការផ្គត់ផ្គង់សម្ភារផលិតទៅកាន់ក្រុមហ៊ុនផលិតបរិក្ខាជំនួយដង្ហើមចំនួន ៦ គឺ General Electric, Hill-Rom Holdings Medtronic Resmed Royal Philips និង Vyaire Medical។
តាំងតែពីដើមមក សមាជិកសភាអាមេរិក បានទាមទារឲ្យប្រធានាធិបតីត្រាំ ប្រើច្បាប់នេះដើម្បី បញ្ចប់ ឫយ៉ាងហោចណាស់ជួយក្នុងបញ្ហាកង្វះខាតបរិក្ខាជំនួយដង្ហើម ព្រោះជំងឺ COVID-19 ជាជំងឺផ្លូវដង្ហើម ដែលឆ្លងយ៉ាងរហ័ស និងទាមទារឲ្យមានបរិក្ខាខាងលើបន្ថែមចំនួនរាប់រយក្នុងមួយថ្ងៃ។ចំណែកឯ មន្ត្រីរដ្ឋាភិបាល និងអ្នកជំនាញសុខាភិបាលប៉ាន់ស្មានថា សហរដ្ឋអាមេរិកត្រូវការបរិក្ខាជំនួយដង្ហើមរាប់ម៉ឺន។
«ខ្ញុំសូមសម្តែងនូវការដឹងគុណ ចំពោះផលិតករក្នុងស្រុកដែលពន្លឿនការផលិតក្នុងគ្រាលំបាកនេះ»។ នេះជាការលើកឡើងបស់លោកប្រធានាធិបតី ត្រាំ ដោយបន្ថែមទៀតថា បញ្ជាថ្ងៃនេះ នឹងជួយជីវិតមនុស្ស ដោយលើកចោលនូវឧបសគ្គទាំងឡាយក្នុងសង្វាក់ផលិតកម្ម ដែលរារាំងការផលិតបរិក្ខាជំនួយដង្ហើមនេះឲ្យបានឆាប់។
គួររំលឹកផងដែរថា កាលពីថ្ងៃទី២៨ ខែមីនា សប្តាហ៍មុន ប្រធានាធិបតី ត្រាំ បានប្រើអំណាចក្នុងគ្រោះអាសន្ន បង្ខំឲ្យក្រុមហ៊ុនផលិតរថយន្ត General Motors ទៅផលិតបរិក្ខាជំនួយដង្ហើមវិញ។
យោងតាមគេហទំព័រ worldometers.info ចំនួនអ្នកឆ្លងនៅសហរដ្ឋអាមរិកមាន២៤៥,០០០ករណី ស្លាប់ចំនួន ៦,៧០៥ករណី និងជាសះស្បើយចំនួន ១០,៤០៣ករណី។ ខណៈកាលពីថ្ងៃទី២ មេសា ចំនួនអ្នកឆ្លងនៅទូទាំងពិភពលោកកើនលើស ១លាននាក់ហើយ នេះតាមតួលេខរបស់សាកលវិទ្យាល័យ Johns Hopkins៕
© រក្សាសិទ្ធិដោយ thmeythmey.com