ប្រធាន FIFA៖ បាល់ទាត់នឹងខុសពីមុនទាំងស្រុង ក្រោយវិបត្តិ COVID-19

COVID-19

កីឡាអន្តរជាតិ

អន្តរជាតិ

ប្រធាន FIFA៖ បាល់ទាត់នឹងខុសពីមុនទាំងស្រុង ក្រោយវិបត្តិ COVID-19

03, Apr 2020 , 2:37 pm

រូបភាព

ដោយ: ទេព ពិទូរ្យ

លោក Gianni Infantino ប្រធានសហព័ន្ធកីឡាបាល់ទាត់អន្តរជាតិ (FIFA) នៅថ្ងៃទី២ ខែមេសា លើកឡើងថា កីឡាបាល់ទាត់នឹងមានភាពខុសប្លែកទាំងស្រុងនៅពេលត្រឡប់ចូលការប្រកួតវិញ បន្ទាប់ពីជំងឺឆ្លង COVID-19 រលត់ពីផែនដីទៅ។

«បាល់ទាត់នឹងត្រឡប់មកវិញ ហើយនៅពេលនោះយើងនឹងអបអរសាទរដែលយើងបានចេញពីសុបិនអាក្រក់ជាមួយគ្នា។ មានមេរៀនមួយដែលអ្នក និងខ្ញុំត្រូវតែយល់ បាល់ទាត់ដែលកើតឡើងវិញបន្ទាប់ពីវិបត្តិជំងឺដ៏កាចសាហាវ នឹងមានភាពខុសគ្នាទាំងស្រុង ... រាប់បញ្ចូលទាំងសង្គម និងការគាំទ្រកាន់តែច្រើន ហើយប្រទេសនីមួយៗជុំវិញពិភពលោកនឹងភ្ជាប់ទំនាក់ទំនងគ្នាកាន់តែល្អ ឯភាព ក្រអឺតក្រទមកាន់តែតិចទៅ ខណៈភាពរាក់ទាក់កាន់តែកើនឡើយ»។ លោក Infantino ប្រាប់ទីភ្នាក់ងារសារព័ត៌មានអ៊ីតាលី ANSA នៅក្នុងបទសម្ភាសមួយ។

ប្រធានគ្រប់គ្រងកីឡាបាល់ទាត់ពិភពលោករូបនេះបន្ថែមថា អ្វីគ្រប់យ៉ាងនឹងកាន់តែល្អប្រសើរ មនុស្សកាន់តែមានការយល់ដឹង និងយកចិត្តទុកដាក់កាន់តែខ្លាំងចំពោះគុណតម្លៃពិត។

កាលពីសប្តាហ៍មុនលោក Infantino ក៏ធ្លាប់បានប្រាប់កាសែត Gazzetta dello Sport ផងដែរថា នេះជាពេលវេលាដ៏ល្អក្នុងការបោះជំហានទៅមុខ និងកែទម្រង់វិស័យកីឡានេះឲ្យកាន់តែប្រសើរឡើង ជាពិសេសបញ្ហាធនធានហិរញ្ញវត្ថុដែលត្រូវបានក្លិបធំៗមួយចំនួនប្រមូលទៅ។

បុរសសញ្ជាតិស្វ៊ីស វ័យ៥០ឆ្នាំរូបនេះ បានស្នើឲ្យមានការប្រកួតតិចប៉ុន្តែនឹងធ្វើឲ្យទាក់ទាញ និងគួរឲ្យចាប់អារម្មណ៍ជាងមុន។ ចំនួនកីឡាករក្នុងក្រុមអាចនឹងតិចជាងមុន ប៉ុន្តែមានតុល្យភាព។ ការប្រកួតនិងចំនួនកីឡាករកាន់តែតិច ប៉ុន្តែនឹងមានការប្រកួតប្រជែងកាន់តែខ្លាំង ដើម្បីការពារសុខភាពរបស់កីឡាករ។

សូមបញ្ជាក់ថា មកទល់ពេលនេះព្រឹត្តិការណ៍កីឡាស្ទើទាំងអស់ជុំវិញពិភពលោក រួមទាំងកីឡាបាល់ទាត់ផងត្រូវបានផ្អាក និងពន្យារការប្រកួត ដោយសារការរីករាលដាលខ្លាំងឡើងៗនៃជំងឺ COVID-19៕