COVID-19
អន្តរជាតិ
អូស្ត្រាលី បដិសេធនាវាទេសចរណ៍ជាច្រើនគ្រឿងចូលចតកំពង់ផែរបស់ខ្លួន រូបភាព៖ AFP
× អូស្ត្រាលី នាថ្ងៃទី៣ ខែមេសា នៅតែបន្តបដិសេធមិនឲ្យនាវាទេសចរណ៍ជាច្រើនគ្រឿង ចូលចតនៅកំពង់ផែរបស់ខ្លួន។ ការបដិសេធនេះ ធ្វើឡើងដើម្បីការពារការរីកសាយភាពនៃអ្នកផ្ទុកជំងឺរលាកសួត ដែលបង្កដោយកូរ៉ូណាវីរុស (COVID-19) ពីនាវាចូលទៅក្នុងប្រទេស។ ការណ៍នេះ ត្រូវបានគេមើលឃើញថា គឺជាទង្វើអសីលធម៌ និងមិនគោរពច្បាប់អន្តរជាតិ។
ចាប់តាំងពីផ្ទុះ COVID-19 មក នាវាទេសចរណ៍ជាច្រើនគ្រឿងត្រូវបានគេជឿថា បានចូលមកដល់ដែនទឹកអូស្ត្រាលី ក្នុងនោះមានបុគ្គលិកនាវារហូតដល់ទៅប្រមាណ ១៥០០០នាក់ ហើយនាវាខ្លះទៀត ត្រូវគេគិតថា មានផ្ទុកអ្នកជំងឺ COVID-19។
ពាក់ព័ន្ធនឹងបញ្ហានេះ ស្នងការកងកម្លាំងព្រំដែនអូស្ត្រាលី លោក Michael Outram បានប្រាប់ព័ត៌មានក្នុងស្រុកយ៉ាងដូច្នេះថា៖ « យើងធ្លាប់ជូនដំណឹងដល់នាវាទេសចរណ៍ទាំងអស់រួចហើយថា ឲ្យចាក់ចេញពីដែនទឹកអូស្ត្រាលី។ ប្រសិនជាដល់ពេល នាវាទេសចរណ៍ទាំងនោះ នឹងត្រលប់ទៅប្រទេសចុះបញ្ជីវិញ»។
បើតាមការចុះផ្សាយរបស់ទីភ្នាក់ងារព័ត៌មាន AFP នាវាទេសចរណ៍ទាំងនោះ ភាគច្រើន គឺជានាវាទេសចរណ៍ ដែលចុះបញ្ជីនៅប្រទេសប៉ាណាម៉ា បាហាម៉ា និងលីបេរីយ៉ា ដែលត្រូវបានគេជឿថាបានធ្វើតេស្តរក COVID-19 លើអ្នកដំណើរមិនបានគ្រប់គ្រាន់ ឬអាចមានអ្នកផ្ទុក COVID-19 ជាច្រើននាក់ នៅក្នុងនាវាទាំងនោះ។ ដោយសារតែបារម្ភថាអាចមានអ្នកដំណើរផ្ទុកCOVID-19 បែបនេះ ប្រទេសមួយចំនួនរួមទាំងអូស្ត្រាលីផង បានបដិសេធមិនទទួលនាវាទេសចរណ៍ជាបន្តបន្ទាប់។ ការណ៍នេះ បានបង្កឲ្យនាវាជាច្រើនគ្រឿងគ្មានកន្លែងចូលចត។
បើតាមការអះអាងរបស់អាជ្ញាធរ អូស្ត្រាលីមិនប្រថុយជាមួយបញ្ហានេះទេ ព្រោះវាអាចធ្វើឲ្យអ្នកផ្ទុក COVID-19 នៅអូស្ត្រាលីកាន់តែកាន់ឡើង ខណៈអ្នកជំងឺនៅក្នុងប្រទេសកំពុងតែច្រើនស្រាប់ ពោលគឺរហូតដល់ជាង ៥ពាន់ករណី។ នាពេលកន្លងទៅ អូស្ត្រាលីបានអនុញ្ញាតឲ្យអ្នកដំណើរ នៃនាវាទេសចរណ៍ Ruby Princess ចុះចេញពីនាវាចូលអូស្ត្រាលីម្តងហើយ។ ក្នុងចំណោម ២៧០០នាក់ អ្នកដំណើរនាវាច្រើនជាង ៣០០នាក់មានផ្ទុក COVID-19។ បញ្ហានេះ លោកនាយករដ្ឋមន្ត្រីអូស្ត្រាលី Scott Morrison បានទទួលរងការរិះគន់យ៉ាងខ្លាំង។
តាមការពន្យល់របស់សាស្ត្រាចារ្យច្បាប់នៃសកលវិទ្យាល័យ New South Wales អូស្ត្រាលីអាចធ្វើខុសនឹងអនុសញ្ញាអន្តរជាតិ ប៉ុន្តែរដ្ឋមួយនេះ ក៏អាចដោះសារបានដែរ។ បើតាមលោកស្រី Natalie Klein អូស្ត្រាលី មិនគោរពតាមអនុសញ្ញាការងារលើដែនសមុទ្រ (Maritime Labour Convention) ព្រោះមិនទទួលព្យាបាលកងនាវិករបស់នាវា។ យ៉ាងណាក៏ដោយ អូស្ត្រាលី ក៏បានបដិសេធនាវាទាំងនោះបានដែរ ដោយសារ COVID-19 ជាជំងឺឆ្លងសកល និងប៉ះពាល់ដល់សន្តិសុខប្រទេស៕
Tag:
អូស្ត្រាលី
COVID-19
© រក្សាសិទ្ធិដោយ thmeythmey.com