ជាតិ
សេដ្ឋកិច្ច
អចលនទ្រព្យ
រដ្ឋប្រកាសលើកលែងពន្ធអចលនទ្រព្យ៤ឆ្នាំ ក្នុងសង្កាត់ចំនួន៤ នៅក្រុងតាខ្មៅ
× ក្រសួងសេដ្ឋកិច្ច និងហិរញ្ញវត្ថុ បានសម្រេចលើកលែងពន្ធអចលនទ្រព្យ រយៈពេល៤ឆ្នាំ ចំពោះអចលនទ្រព្យដែលស្ថិតនៅសង្កាត់ស្វាយរលំ កោះអន្លង់ចិន សិត្បូ និងសង្កាត់រកាខ្ពស់ ក្នុងក្រុងតាខ្មៅ ខេត្តកណ្ដាល។ ពីមុនសង្កាត់ទាំង៤ ស្ថិតនៅស្រុកស្អាង និងស្រុកកណ្ដាលស្ទឹង ខេត្តកណ្ដាល។ នេះបើយោងតាមសេចក្តីសម្រេចរបស់ក្រសួងសេដ្ឋកិច្ច និងហិរញ្ញវត្ថុ ចេញផ្សាយនៅថ្ងៃទី២ មេសា។
អ្នកនាំពាក្យក្រសួងសេដ្ឋកិច្ច លោក មាស សុខសេនសាន បានពន្យល់ប្រាប់សារព័ត៌មានថ្មីៗតាមទូរស័ព្ទថា ការលើកលែងពន្ធអលចនទ្រព្យនៅសង្កាត់ទាំង៤នេះ គឺដោយសារសង្កាត់ទាំង៤ ទើបកាត់ចូលក្រុងតាខ្មៅ។ លោក សុខសេនសាន ថ្លែងថា៖«ចាប់ពីឆ្នាំនេះ ដល់ឆ្នាំ២០២៣ គឺមានការលើកលែងពន្ធ។ ការលើកលែងនេះ ដោយកាលពីមុន ស្ថិតនៅក្នុងស្រុកម្ចាស់អចលនទ្រព្យ មិនតម្រូវឱ្យមានការបង់ពន្ធ ហើយពេលកាត់ចូលក្រុងតាខ្មៅ តម្រូវមានការបង់ពន្ធ។ ដូច្នេះ វាអាចនឹងធ្វើឱ្យមានការលំបាកដល់ពលរដ្ឋ ដែលបង់ពន្ធជាលើកដំបូង ក្នុងសង្កាត់ទាំង៤នេះ ទើបក្រសួងលើកលែងពន្ធ រហូតដល់ឆ្នាំ២០២៣»។
តាមសេចក្ដីប្រកាសព័ត៌មានដដែល ម្ចាស់អចលនទ្រព្យដែលស្ថិតនៅក្នុងសង្កាត់ទាំង៤ មានកាតព្វកិច្ចចុះបញ្ជីអចលនទ្រព្យ នៅសាខាពន្ធដារខេត្តកណ្ដាល ឬនៅនាយកដ្ឋានពន្ធលើអចលនទ្រព្យ និងអចលនទ្រព្យ នៃអគ្គនាយកដ្ឋានពន្ធដារ។ ប៉ុន្តែការចុះបញ្ជីអចលនទ្រព្យនេះ ពុំមិនកាតព្វកិច្ចដាក់លិខិតប្រកាស និងបង់ពន្ធលើអចលនទ្រព្យ រហូតដល់ឆ្នាំ២០២៣។
បើសិនម្ចាស់អចលនទ្រព្យទាំង៤សង្កាត់នេះ បានបង់ពន្ធរួច ប្រាក់នោះនឹងត្រូវធ្វើជាឥណទានយោង សម្រាប់យកទៅកាត់កងពន្ធអចលនទ្រព្យ នៅឆ្នាំជាប់ពន្ធបន្តបន្ទាប់។ ប៉ុន្តែម្ចាស់អចលនទ្រព្យ ត្រូវស្នើសុំឥណទានពន្ធលើអចលនទ្រព្យដែលបង់រួច នៅសាខាពន្ធដារខេត្តកណ្ដាល ឬនៅអគ្គនាយកដ្ឋានពន្ធដារ សម្រាប់យកទៅកាត់កងពន្ធអចលនទ្រព្យសម្រាប់ឆ្នាំជាប់ពន្ធបន្តបន្ទាប់៕
© រក្សាសិទ្ធិដោយ thmeythmey.com