COVID-19
អន្តរជាតិ
រួបភាព Xinhua
×![]()
ដោយ: តន ចាន់រិទ្ធារ៉ា
ថៃ នៅថ្ងៃទី៤ ខែមេសា បានរាយការណ៍ការកើនឡើងករណីឆ្លងជំងឺរលាកសួតបង្កដោយកូរ៉ូណាវីរុស (COVID-19) ថែមទៀត។ ទូទាំងប្រទេស ថៃមានករណីឆ្លង២០៦៧នាក់។ ក្នុងនោះ ករណីសះស្បើយ៦១២នាក់ និងស្លាប់២០នាក់។
មួយថ្ងៃទី៤ ខែមេសា ថៃបានប្រកាសពីករណីថ្មីចំនួន៨៩នាក់ ដែលនាំឲ្យចំនួនករណីឆ្លងក្នុងស្រុកឡើងលើសពីរពាន់ករណី។ លោក Taweesin Visanuyothin អ្នកនាំពាក្យមជ្ឈមណ្ឌលរដ្ឋបាល COVID-19 បញ្ជាក់ថា នៅថ្ងៃទី៤ដដែល មានករណីស្លាប់ថែមមួយទៀត ដែលធ្វើឲ្យអ្នកស្លាប់សរុបមាន២០នាក់ ហើយមនុស្ស៦១២នាក់ បានសះស្បើយ ហើយត្រូវបានអនុញ្ញាតឲ្យចេញពីមន្ទីរពេទ្យ។
ដើម្បីទប់ស្កាត់ការរាលដាល រដ្ឋាភិបាលថៃ បានប្រកាសដាក់ប្រទេសក្នុងស្ថានភាពអាសន្ន និងដាក់បម្រាមគោចរថែមទៀត។
នៅថ្ងៃទី៣ ខែមេសា ការប៉ះទង្គិចមួយបានកើតឡើងនៅព្រលានយន្តហោះសុវណ្ណភូមិ ដោយជនជាតិដែលត្រឡប់មកពីជប៉ុន សិង្ហបុរី និងកាតា មិនព្រមទៅកន្លែងដាក់ដោយឡែកដែលរៀបចំដោយរដ្ឋាភិបាល។ សារព័ត៌មានThe Nation ផ្សាយថា មានអ្នកដំណើរខ្លះ បានលួចចាកចេញពីអាកាសយានដ្ឋានស្ងាត់ទៀតផង។
នាយករដ្ឋមន្ត្រីថៃ លោក ប្រាយុទ្ធ ចន្ទអូចា បានបញ្ជាកម្លាំងប្រដាប់អាវុធតាមរកអ្នកដំណើរមួយចំនួនដែលគេចខ្លួន ហើយបញ្ជូនទៅនៅដោយឡែក សំដៅបញ្ចៀសការឆ្លង COVID-19 ក្នុងករណីណាមួយ។ អ្នកដែលគេចខ្លួនទាំងនោះ ក៏ប្រឈមមុខនឹងទោសទណ្ឌផងដែរ ព្រោះបំពានក្រឹត្យដាក់ប្រទេសក្នុងភាពអាសន្ន៕
Tag:
ថៃ
COVID-19
© រក្សាសិទ្ធិដោយ thmeythmey.com
