COVID-19
អន្តរជាតិ
កូនភ្លោះមួយគូនៅឥណ្ឌា ត្រូវបានឪពុកម្តាយដាក់ឈ្មោះថា«កូរ៉ូណា»និង«កូវីដ»
× មេរោគកូរ៉ូណាប្រភេទថ្មី ឬកូវីដ-១៩ កំពុងវាយលុកយ៉ាងខ្លាំងក្នុងពិភពលោក រួមទាំងឥណ្ឌាផងដែរ។ ដើម្បីរំលឹកដល់សម័យកាល នៃការរាតត្បាតមេរោគនេះ គ្រួសារមួយនៅឥណ្ឌា បានសម្រេចដាក់ឈ្មោះ កូនភ្លោះប្រុសស្រីរបស់ខ្លួនថា «កូវីដ» និង «កូរ៉ូណា»។
កូនភ្លោះទាំងពីរ បានកើតកាលពីថ្ងៃទី២៧ ខែមីនា នៅមន្ទីរពេទ្យមួយនៅក្រុង Raipur រដ្ឋ Chhattisgarh ភាគកណ្តាលប្រទេសឥណ្ឌា។ អ្នកស្រី Preeti Verma ដែលជាម្តាយ បានរៀបរាប់ប្រាប់ភ្នាក់ងារព័ត៌មាន Press Trust of India ថា៖ «ខ្ញុំពិតជាមានសំណាងណាស់ដែលកើតបានកូនភ្លោះ ប្រុសមួយ និងស្រីមួយ។ យើងសម្រេចដាក់ឈ្មោះពួកគេថា Covid និង Corona»។
អ្នកស្រី Preeti បានរៀបរាប់ថា ស្វាមីរបស់ខ្លួន គឺលោក Vinay Verma បានដឹកនាំទៅមន្ទីរពេទ្យទាំងយប់ថ្ងៃទី២៦ ខែមីនា តាមម៉ូតូក្នុងស្ថានភាពដ៏លំបាក ព្រោះឆ្លងកាត់ការត្រួតពិនិត្យ ដោយសាររដ្ឋាភិបាល បានប្រកាសបិទប្រទេសទាំងមូល ជាពិសេសរឹតត្បិតការដើរហើរ ដើម្បីទប់ស្កាត់ការរាលដាល COVID-19។
អ្នកស្រី បានសម្រាលកូនដោយជោគជ័យ តាមរយៈការវះកាត់ដែលដំណើរការរយៈពេលប្រមាណ៤៥នាទី។ «យើងសម្រេចដាក់ឈ្មោះកូនប្រុសថា កូវីដ និងកូនស្រីថា កូរ៉ូណា ក៏ដោយសារតែបានឮក្រុមគ្រូពេទ្យបាននិយាយយ៉ាងដូច្នោះដែរ។ នេះជាអនុស្សាវរីយ៍ដែលមិនអាចបំភ្លេចបានសម្រាប់ពួកយើង»។
មកពេលនេះ ឥណ្ឌាមានអ្នកឆ្លងជាង៣០០០ករណី ក្នុងនោះស្លាប់ ៨៦នាក់ និងជាសះស្បើយចំនួន២២៩នាក់៕
© រក្សាសិទ្ធិដោយ thmeythmey.com