ក្រោយក្រសួងអប់រំ យុវជន និងកីឡា ប្រកាសរំសាយការប្រមូលផ្តុំហ្វឹកហាត់ របស់ក្រុមជម្រើសជាតិថ្នាល ដើម្បីទប់ស្កាត់ការរាលដាលនៃកូវីដ-១៩ សហព័ន្ធខ្លះ បានដាក់កម្មវិធីឲ្យកីឡាករហ្វឹកហាត់តាមផ្ទះ ឯខ្លះទៀតបន្តហ្វឹកហាត់ជាក្រុមតូចៗ នៅកន្លែងមានសុវត្ថិភាព។ ជាក់ស្តែង ក្រុមកីឡាករយុវជនថ្នាលចំបាប់ បានជ្រើសរើសយកវាលស្រែ ធ្វើជាកន្លែងហ្វឹកហាត់ដើម្បីបញ្ចៀសហានិភ័យផ្សេងៗ ។
វាលលំហ ឬវាលស្រែ ជាកន្លែងដ៏ស័ក្តិសម សម្រាប់កីឡាករក្នុងការហ្វឹកហាត់ពង្រឹងកម្លាំងកាយ ក្នុងកាលៈទេសៈបច្ចុប្បន្ន ដែលកម្ពុជាកំពុងប្រឈមនឹងការរីករាលដាល នៃជំងឺរលាកផ្លូវដង្ហើមបង្កឡើងដោយវីរុសកូរ៉ូណាប្រភេទថ្មី(កូវីដ-១៩)។ មិនត្រឹមតែមានខ្យល់អាកាសបរិសុទ្ធប៉ុណ្ណោះទេ តែវាអាចជួយរក្សាគម្លាតរបស់កីឡាករ ក្នុងការបញ្ចៀសហានិភ័យពាក់ព័ន្ធការឆ្លងកូវីដ-១៩ទៀតផង។
ជាក់ស្តែងក្រុមយុវជនជម្រើសជាតិថ្នាលកីឡាចំបាប់ បានផ្លាស់ប្តូរទីតាំងហ្វឹកហាត់ ពីក្នុងសាលទៅហ្វឹកហាត់តាមវាលស្រែ ដើម្បីបង្ការ និងទប់ស្កាត់ការឆ្លងរីករាលដាលនៃកូវីដ-១៩។ នេះបើតាមការបញ្ជាក់របស់លោក ឌន សៅ គ្រូជំនួយក្រុមជម្រើសជាតិថ្នាលចំបាប់ ដែលបានបន្ថែមថា ការធ្វើដូច្នេះដោយសារសហព័ន្ធកីឡាចំបាប់កម្ពុជា មិនចង់ឲ្យកីឡាករនៅកៀកគ្នាពេក ដែលប្រភពនៃការឆ្លងកូវីដ-១៩។
ក្នុងបទសម្ភាសជាមួយសារព័ត៌មានថ្មីៗតាមទូរសព្ទ នៅព្រឹកថ្ងៃទី៣ ខែមេសា លោក ឌន សៅ បាននិយាយដូច្នេះថា៖«យើងមានសាលហ្វឹកហាត់ដែរ ក្នុងវិទ្យាល័យវិហារសួគ៌ ប៉ុន្តែយើងមិនចង់ឲ្យពួកគាត់បែកញើសប្រឡូកប្រឡាក់ជាមួយគ្នា ព្រោះខ្លាចមានបញ្ហាកើតឡើង។ មួយវិញទៀត យើងមិនចង់ឲ្យពួកគាត់នៅកៀកគ្នាពេក ទោះបីយើងបានលាងដៃជាមួយអាល់កុល តែយើងនៅតែមិនទុកចិត្ត»។
សកម្មភាពហ្វឹកហ្វាត់របស់ក្រុមកីឡាករជម្រសើជាតិថ្នាលកីឡាចំបាប់នៅវាលស្រែមួយកន្លែងក្នុងឃុំវិហារសួគ៌ខេត្តកណ្តាល
គ្រូជំនួយរូបនេះ បានបន្ថែមទៀតថា ការហ្វឹកហាត់របស់ក្រុមជម្រើសជាតិថ្នាលចំបាប់ មិនផ្តោតខ្លាំងលើការពង្រឹងបច្ចេកទេសនោះទេ ពោលគឺផ្តោតតែលើការពង្រឹងកម្លាំងកាយតែប៉ុណ្ណោះ។ សម្រាប់លោក ឌន សៅ ការហ្វឹកហាត់បែបនេះ វាអាចជះឥទិ្ធពលមិនល្អ និងធ្វើឲ្យប៉ះពាល់ដល់បច្ចេកទេស និងការពង្រឹងសមត្ថភាពកីឡាករ។
តែយ៉ាងណា ម្ចាស់មេដាយមាសស៊ីហ្គេមឆ្នាំ២០១៣រូបនេះ អះអាងថា សហព័ន្ធគ្មានជម្រើសអ្វីផ្សេងឡើយ ក្នុងកាលៈទេសៈដែលកម្ពុជា ក៏ដូចជាពិភពលោក កំពុងប្រឈមនាពេលបច្ចុប្បន្ន។ លោកបានបង្ហាញក្តីកង្វល់យ៉ាងដូច្នេះថា៖«វាប៉ះពាល់ បើនិយាយរឿងប៉ះពាល់បច្ចេកទេស គឺប៉ះពាល់ធ្ងន់មែនទែន។ ប៉ុន្តែយើងធ្វើម៉េច បើកាលៈទេសៈតម្រូវ អ៊ីចឹងមានតែឲ្យពួកគាត់ ហាត់រក្សាកម្លាំងកាយ ធ្វើម៉េចកុំឲ្យតែធ្លាក់កម្លាំងកាយ»។
បើតាមលោក ឌន សៅ ក្រុមជម្រើសជាតិថ្នាលកីឡាចំបាប់មាន១៥រូប ហើយការហ្វឹកហាត់បែងចែកជាពីរក្រុម ដោយក្រុម១មានគ្នា១១នាក់ ហាត់នៅវិហារសួគ៌ខេត្តកណ្តាល និងមួយក្រុមទៀត មានគ្នា៤នាក់ ហាត់នៅខេត្តកំពង់ឆ្នាំង។ សម្រាប់ការហ្វឹកហាត់នេះដែរ មួយសប្តាហ៍ហាត់៦ថ្ងៃ ដោយមួយថ្ងៃហាត់៣ម៉ោង។
ក្រសួងអប់រំ យុវជន និងកីឡាកាលពីថ្ងៃទី១៨ ខែមីនា ឆ្នាំ២០២០ បានចេញសេចក្តីប្រកាសព័ត៌មានមួយ ដោយសម្រេចផ្អាកការប្រមូលផ្តុំ ហ្វឹកហាត់ក្រុមជម្រើសជាតិថ្នាល ជាបណ្តោះអាសន្ន ដោយសារបារម្ភពីការរីករាលដាល នៃជំងឺកូវីដ-១៩។ ក្រសួង នឹងប្រកាសពីការប្រមូលផ្តុំឡើងវិញ ក្រោយស្ថានភាពនៃការរីករាលដាលមានភាពធូរស្រាលឡើងវិញ។
គិតត្រឹមថ្ងៃទី៣ មេសា ឆ្នាំ២០២០ កម្ពុជា មានអ្នកផ្ទុកមេរោគកូវីដ-១៩ ចំនួន១១៤នាក់ និងព្យាបាលជាសះស្បើយចំនួន៣៥នាក់៕