កូវីដ-១៩ បានធ្វើឲ្យអ្នកប្រកបរបររកស៊ីផ្លូវភេទរាប់ម៉ឺននាក់នៅថៃ បាត់បង់ការងារ។ មនុស្សមួយចំនួនបន្តប្រកបរបរនេះ ទាំងប្រថុយប្រថាន ដោយសារតែគ្មានការគាំទ្រហិរញ្ញវត្ថុពីរដ្ឋាភិបាល ខណៈប្រទេសថៃ ក៏ដូចជាពិភពលោកទាំងមូលកំពុងប្រឈមវិបត្តិ។
«ខ្ញុំពិតជាខ្លាចការឆ្លងមេរោគ ប៉ុន្តែខ្ញុំត្រូវការការងារដើម្បីបង់ថ្លៃផ្ទះ និងម្ហូបអាហារផ្ទាល់ខ្លួន»។ អ្នកប្រកបរបរផ្លូវភេទឈ្មោះ Pim បានរៀបរាប់យ៉ាងដូច្នេះប្រាប់ទីភ្នាក់ងារព័ត៌មាន AFP។ ទោះបីជារង្គសាល ក្លិបកម្សាន្ត ខារ៉ាអូខេ ក៏ដូចជាហាងម៉ាស្សា ត្រូវបានបិទក៏ដោយ ប៉ុន្តែបុរសអាយុ៣២ឆ្នាំដែលបានប្តូរភេទទៅជាស្រី រូបនេះ នៅតែលួចប្រកបរបរជាសម្ងាត់នៅក្រុងបាងកក។
រដ្ឋាភិបាលថៃ បានចេញបម្រាមគោចរដោយហាមឃាត់ពលរដ្ឋទូទាំងប្រទេសចាកចេញពីផ្ទះ ចាប់ពីម៉ោង១០យប់ដល់ម៉ោង៤ព្រឹក ដែលចូលជាធរមានចាប់ពីយប់ថ្ងៃទី៣ ខែមេសា ក្នុងគោលដៅទប់ស្កាត់ការរីករាលដាលកូវីដ-១៩។
នៅបាងកក ដែលមានពលរដ្ឋប្រមាណ១០លាននាក់ ប្រែក្លាយជាទីតាំងដែលពិបាករកភ្ញៀវសម្រាប់ Pim ដោយអ្នកប្រកបរបររកស៊ីផ្លូវភេទម្នាក់នេះ ដើរពីផ្លូវមួយទៅផ្លូវមួយដើម្បីស្វែងរកភ្ញៀវទាំងប្រថុយប្រថានបំផុត។
យោងតាម AFP អ្នកប្រកបរបររកស៊ីផ្លូវភេទ ទាំងប្រុស ទាំងស្រី ក៏ដូចជាអ្នកប្តូរភេទ ប្រមាណ៣០ម៉ឺននាក់ ជាពិសេសនៅបាងកក និងតំបន់សមុទ្រ ដូចជា ភូកេត និងប៉ាតាយ៉ា បានបាត់បង់ការងារ។ ភាគច្រើនបំផុតនៃពួកគេ គ្មានរបបសន្តិសុខសង្គម ក៏ដូចជាកិច្ចការពារផ្សេងៗ ហើយក៏ជាក្រុមដែលប្រឈមនឹងការឆ្លងកូវីដ-១៩។
អ្នកខ្លះ បានសម្រេចទៅស្រុកកំណើតរបស់ខ្លួនវិញ រីឯអ្នកខ្លះទៀត បន្តរស់នៅទាំងផ្សងព្រេងនៅក្រុងបាងកក ឬទីតាំងបច្ចុប្បន្នដែលខ្លួនប្រកបរបរ។
អ្នកប្រកបរបរផ្លូវភេទម្នាក់ទៀត បានអះអាងប្រាប់ទីភ្នាក់ងារព័ត៌មានបារាំង ថា៖ «យើងប្រកបរបរនេះ ដោយសារតែយើងក្រ។ កន្លងមក ខ្ញុំរកចំណូលបានពី៣០០ ទៅ៦០០ដុល្លារអាមេរិកក្នុង១សប្តាហ៍ ប៉ុន្តែពេលនេះ រកមិនបានទាល់តែសោះ»។
ថៃជាប្រទេសមួយដែលមានប្រភពចំណូលខ្ពស់ពីវិស័យទេសចរណ៍ ដោយរដ្ឋាភិបាលផ្តល់កិច្ចគាំពារផ្សេងៗចំពោះបុគ្គលិករដ្ឋ និងឯកជននាអំឡុងពេលមានវិបត្តិ ប៉ុន្តែមិនបានលើកឡើងពីករណីអ្នកប្រកបរបររកស៊ីផ្លូវភេទនោះឡើយ ដោយសារតែរបរនេះ ជារបរមិនស្ថិតនៅក្រោមច្បាប់។
អង្គការ Empower Foundation បានសរសេរលិខិតទៅរដ្ឋាភិបាលថៃ ឲ្យរកដំណោះស្រាយសម្រាប់អ្នកប្រកបរបរផ្លូវភេទ ដោយពួកគេមានឪពុកម្តាយ និងក្រុមគ្រួសារដែលត្រូវចិញ្ចឹមរ៉ាប់រង។ អង្គការនេះ លើកឡើងថា ក្រុមអ្នកប្រកបរបរផ្លូវភេទ ក៏បានរួមចំណែកពី៤ ទៅ១០ភាគរយនៃផលិតផលក្នុងស្រុកសរុបផងដែរ៕