COVID-19
ជាតិ
សេដ្ឋកិច្ច
ក្រសួងសេដ្ឋកិច្ច បានបង្កើតក្រុមការងារចំនួន៤ ដើម្បីជួយដល់ពលរដ្ឋប្រយុទ្ធទល់នឹងCOVID-19
រូបភាពពីក្រសួងសេដ្ឋកិច្ច និងហិរញ្ញវត្ថុ
×![]()
ភ្នំពេញ៖ ក្រសួងសេដ្ឋកិច្ច និងហរិញ្ញវត្ថុ នៅថ្ងៃទី៣ មេសា បានបង្កើតក្រុមការងារចំនួន៤ មានតួនាទីដោយឡែកពីគ្នា ប៉ុន្តែមានគោលដៅរួម គឺជួយប្រជាពលរដ្ឋប្រយុទ្ធតទល់នឹងជំងឺកូវីដ-១៩។ ក្រុមការងារទាំង៤ រួមមាន ក្រុមការងារចំពោះកិច្ចគ្រប់គ្រងការផ្គត់ផ្គង់ និងថ្លៃទំនិញយុទ្ធសាស្ត្រ, ក្រុមការងារចំពោះកិច្ចរៀបចំ និងគ្រប់គ្រងយន្តការជំនួយសង្គម, ក្រុមការងារចំពោះកិច្ចរៀបចំគោលនយោបាយថវិកា ហិរញ្ញប្បទាន និងជំនួយសង្គម និងក្រុមការងារបច្ចេកទេសចម្រុះចំពោះកិច្ច សិក្សា រៀបចំ ដាក់ចេញកញ្ចប់វិធានការខាងរូបិយវត្ថុ និងធនាគារ។
ក្រុមការងារចំនួន៤ ត្រូវបានក្រសួងសេដ្ឋកិច្ចបង្កើតឡើង ក្នុងពេលដែលកម្ពុជាកំពុងប្រឹងប្រែងប្រយុទ្ធប្រឆាំងនឹងជំងឺកូវីដ-១៩។ ដ្បិតមានតួនាទីដោយឡែកពីគ្នា ប៉ុន្តែក្រុមការងារទាំង៤នេះ មានគោលដៅរួម គឺជួយសម្រាលបន្ទុករបស់ប្រជាពលរដ្ឋក្នុងគ្រាលំបាកនេះ។ ក្រុមការងារទាំង៤ រួមមាន ក្រុមការងារចំពោះកិច្ចគ្រប់គ្រងការផ្គត់ផ្គង់ និងថ្លៃទំនិញយុទ្ធសាស្ត្រ, ក្រុមការងារចំពោះកិច្ចរៀបចំ និងគ្រប់គ្រងយន្តការជំនួយសង្គម, ក្រុមការងារចំពោះកិច្ចរៀបចំគោលនយោបាយថវិកា ហិរញ្ញប្បទាន និងជំនួយសង្គម និងក្រុមការងារបច្ចេកទេសចម្រុះចំពោះកិច្ច សិក្សា រៀបចំ ដាក់ចេញកញ្ចប់វិធានការខាងរូបិយវត្ថុ និងធនាគារ។
បើតាមក្រសួងសេដ្ឋកិច្ច ក្រុមការងារចំពោះកិច្ចគ្រប់គ្រងការផ្គត់ផ្គង់ និងថ្លៃទំនិញយុទ្ធសាស្ត្រ រួមមាន អង្ករ បន្លែ ត្រី សាច់ ដែលជាតម្រូវការប្រើប្រាស់ប្រចាំថ្ងៃរបស់ពលរដ្ឋ។ ក្រុមការងារនេះ ក៏មានតួនាទីតាមដាន និងគ្រប់គ្រងបរិមាណផ្គត់ផ្គត់ និងតម្រូវការនៃទំនិញយុទ្ធសាស្ត្រផងដែរ ជាពិសេស ទប់ស្កាត់កុំឲ្យទំនិញយុទ្ធសាស្ត្រឡើងថ្លៃយ៉ាងគំហុក។
ចំណែកក្រុមការងារចំពោះកិច្ចរៀបចំ និងគ្រប់គ្រងយន្តការជំនួយសង្គម មានមុខនាទីផ្តោតលើការកំណត់អត្តសញ្ញាណគ្រួសារក្រីក្រ ក្រុមជនងាយរងគ្រោះ និងក្រុមជនដែលត្រូវការការគាំពារជាចាំបាច់ នៅក្នុងអំឡុងពេលប្រយុទ្ធនឹងជំងឺកូវីដ-១៩។
រីឯក្រុមការងាររៀបចំគោលនយោបាយថវិកា និងហិរញ្ញប្បទាន និងជំនួយសង្គម មានតួនាទីសិក្សា និងកំណត់ទំហំតម្រូវការថវិកាជាក់ស្ដែង ស្របតាមការចាំបាច់ ដោយឈរលើគោលការណ៍ប្រយុទ្ធនឹងជំងឺកូវីដ-១៩, រក្សាលំនឹងជីវភាពពលរដ្ឋក្រីក្រ និងពលរដ្ឋដែលងាយរងគ្រោះបំផុត ក៏ដូចជាស្រោចស្រង់ និងរក្សាលំនឹងអាជីវកម្ម និងធុរកិច្ច។ ក្រុមការងារនេះ ក៏ត្រូវបន្តពិនិត្យ និងផ្តល់អនុសាស្ត្រពាក់ព័ន្ថនឹងការធ្វើវិចារណកម្មចំណាយថវិកា និងការធ្វើវិភាជន៍ថវិកាឡើងវិញ ដើម្បីបំពេញតម្រូវការថវិកាសម្រាប់ការប្រយុទ្ធនឹងកូវីដ-១៩ផង និងទ្រទ្រង់កំណើនសេដ្ឋកិច្ចផង។ បន្ថែមពីនេះ ក្រុមការងារក៏ត្រូវបន្តការកៀងគរធនធានហិរញ្ញប្បទានពីក្រៅប្រទេស ក្រោមរូបភាពមូលនិធិទ្រទ្រង់ ក៏ដូចជាជំនួយបច្ចេកទេសពីដៃគូអភិវឌ្ឍន៍នានា។ ជាមួយគ្នានេះការសិក្សា រៀបចំ និងពិនិត្យលទ្ធភាពខ្ចីឥណទានពីធនាគារពាណិជ្ជ និងធនាគារជាតិ ក៏ដូចជាកៀងគរហិរញ្ញប្បទានពីវិស័យឯកជនតាមរយៈការបោះផ្សាយសញ្ញាបណ្ណរដ្ឋ ក៏ជាការទទួលខុសត្រូវ ទទួលខុសត្រូវរបស់រចំពោះកិច្ចរៀបចំ និងគ្រប់គ្រងយន្តការជំនួយសង្គមនេះដែរ។
ដោយឡែកក្រុមការងារបច្ចេកទេសចម្រុះចំពោះកិច្ច សិក្សារៀបចំដាក់ចេញនូវកញ្ចប់វិធានការខាងរូបិយវត្ថុ និងធនាគារ ដើម្បីគ្រប់គ្រង និងដោះស្រាយផលប៉ះពាល់ពីការរីករាលដាលនៃជំងឺកូវីដ-១៩ និងការព្យួរប្រព័ន្ធអនុគ្រោះពន្ធលើមុខទំនិញមួយចំនួន ក្នុងក្របខណ្ឌទំនិញគ្រប់យ៉ាងលើកលែងតែសព្វាវុធវិញ មានភារកិច្ចវាយតម្លៃពីសភាពការណ៍នៃវិស័យសេដ្ឋកិច្ច និងកសិកម្ម។ ក្រុមការងារក៏មានតួនាទី រៀបចំកញ្ចប់វិធានការខាងរូបិយវត្ថុ និងធនាគារ ដើម្បីកាត់បន្ថយផលប៉ះពាល់ដោយសារកូវីដ-១៩ និងការព្យួរប្រព័ន្ធអនុគ្រោះពន្ធ(EBA)លើទំនិញមួយចំនួនផងដែរ។ ក្រុមការងារដែលដឹកនាំដោយសហប្រធានមកពីក្រសួងសេដ្ឋកិច្ច និងហិរញ្ញវត្ថុ និងធនាគារជាតិនៃកម្ពុជានេះ ត្រូវជំរុញការអនុវត្ត ត្រួពិនិត្យ និងតាមដានការអនុវត្តវិធានការឆ្លើយតបនឹងវិបត្តិ ក៏ដូចជាពិនិត្យ រៀបចំ និងតាមការអនុវត្តវិធានការម៉ាក្រូប្រុងប្រយ័ត្ន ដើម្បីរក្សាស្ថិរភាពម៉ាក្រូសេដ្ឋកិច្ច។
បើតាមសេចក្ដីសម្រេចរបស់ក្រសួងសេដ្ឋកិច្ច សមាសភាពទាំងអស់មកពីក្រសួងសេដ្ឋកិច្ច និងហិរញ្ញវត្ថុ, ក្រសួងសុខាភិបាល, ក្រសួងកសិកម្ម រុក្ខាប្រមាញ់ និងនេសាទ, ក្រសួងពាណិជ្ជកម្ម, ក្រសួងផែនការ, ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, ក្រសួងសង្គមកិច្ច អតីតយុទ្ធជន និងយុវនីតិសម្បទា, ក្រសួងការងារ និងបណ្ដុះបណ្ដាលវិជ្ជាជីវៈ, ធនាគារជាតិនៃកម្ពុជា, ក្រុមប្រឹក្សាអភិវឌ្ឍន៍កម្ពុជា និងស្ថាប័នពាក់ព័ន្ធមួយចំនួនទៀត៕
© រក្សាសិទ្ធិដោយ thmeythmey.com
