COVID-19
អន្តរជាតិ
Covid-19៖ មីយ៉ាន់ម៉ា អំពាវនាវរកជំនួយផ្នែកវេជ្ជសាស្ត្រពីសហគមន៍អន្តរជាតិ
×![]()
រដ្ឋាភិបាលមីយ៉ាន់ម៉ា កំពុងអំពាវនាវរកជំនួយសម្ភារផ្នែកវេជ្ជសាស្ត្រពីសហគមន៍អន្តរជាតិ ដើម្បីរដ្ឋាភិបាលអាចមានលទ្ធភាពគ្រប់គ្រាន់ក្នុងការការពារ និងទប់ស្កាត់ការរីករាលដាលការឆ្លងវីរុស Covid-19។ សេចក្តីអំពាវនាវរបស់មីយ៉ាន់ម៉ា ធ្វើឡើង ស្របពេលដែលប្រទេស មានករណីឆ្លងវីរុសប្រភេទរាតត្បាតនេះរហូតដល់ស្លាប់ផងដែរនោះ។ 
ក្រសួងការបរទេសមីយ៉ាន់ម៉ា តាមរយៈសេចក្តីថ្លែងការណ៍ចុះថ្ងៃ៣ មេសា បានអំពាវដល់ស្ថានទូតបរទេស អង្គការអន្តរជាតិ និងបណ្តាដៃគូបរទេស ដោយបានបញ្ជាក់ពីតម្រូវការចាំបាច់របស់ក្រសួងសុខភិបាលមីយ៉ាន់ម៉ាដើម្បីបង្កើនសមត្ថភាពការងារពិនិត្យ និងវិនិច្ឆ័យលើវីរុស Covid-19 រួមមានសម្ភារវេជ្ជសាស្ត្រ ជាពិសេសនោះ ឧបករណ៍ធ្វើតេស្ត។ នេះបើយោងតាមការចុះផ្សាយរបស់សារព័ត៌មាន Myanmar Times។
តាមសេចក្តីថ្លែងការណ៍ដដែលនោះ មីយ៉ាន់ម៉ា នឹងមិនភ្លេចគុណឡើយចំពោះបេសកកម្មការទូត និងដៃគូអន្តរជាតិ ដែលបានផ្គត់ផ្គង់សម្ភារវេជ្ជសាស្ត្រដ៏ចាំបាច់នេះដល់មីយ៉ាន់ម៉ា ក្នុងដំណាក់កាលលំបាកនេះ។ នេះបើយោងតាមប្រភពព័ត៌មានដដែល។
ជាមួយនឹងសេចក្តីអំពាវនេះ រដ្ឋាភិបាលមីយ៉ាន់ម៉ា បានអះអាង រដ្ឋាភិបាល កំពុងតែអនុវត្ត និងប្រើប្រាស់គ្រប់វិធានការដើម្បីទប់ស្កាប់វីរុសនេះ រាប់បញ្ចូលទាំងការទប់ស្កាត់ចលនាប្រជាជនក្នុងការធ្វើដំណើរចេញក្រៅអំឡុងពេលថ្ងៃឈប់សម្រាកប្រពៃណីជាតិរយៈពេល១០ថ្ងៃខាងមុខ។
គិតត្រឹមថ្ងៃ៤ មេសា មីយ៉ាន់ម៉ា មានករណីអ្នកឆ្លងវីរុស Covid-19 ចំនួន២០ករណី ក្នុងនោះ មានករណីស្លាប់មួយករណី។ បច្ចុប្បន្ន មីយ៉ាន់ម៉ា ក៏បានដាក់ប្រជាជន ដែលជាប់ពាក់ព័ន្ធការឆ្លង ក៏ដូចជាអ្នកទើបតែត្រលប់ចូលប្រទេសវិញ រាប់ពាន់នាក់ឲ្យស្នាក់នៅដាច់ដោយឡែកតាមបែបបទវេជ្ជសាស្ត្រផងដែរ៕
Tag:
មីយ៉ាន់ម៉ា
Covid19
© រក្សាសិទ្ធិដោយ thmeythmey.com
