COVID-19
ពីនេះ ពីនោះ
រូបត្លុក
Covid-19៖ អ្នកហ៊ានស្បែកដាច អ្នកខ្លាចស្បែកគង់
× សុធីរ និងសំណាង នៅតែបារម្ភខ្លាំងអំពីស្ថានភាពជំងឺកូវីដ១៩ នៅស្រុកខ្មែរ ហើយចង់ឃើញប្រជាពលរដ្ឋចូលរួមប្រុងប្រយ័ត្ន និងស្តាប់តាមការណែនាំរបស់រដ្ឋាភិបាល។ ស្ថានភាពនៅអាមេរិក អេស្ប៉ាញ អ៊ីតាលី បារាំង កំពុងតែធ្ងន់ធ្ងរខ្លាំងណាស់ ដោយមានមនុស្សឆ្លងសុទ្ធតែលើសពី១០ម៉ឺននាក់ និងមានអ្នកបាត់បង់ជីវិតដល់ម៉ឺននាក់ហើយ។
សុធីរ៖ អាណាង! អញថា បើមើលស្ថានភាពកូវីដ នៅអឺរ៉ុប គេគួរឈប់និយាយអារឿងប្រៀបធៀបអត្រាស្លាប់នៃជំងឺកូវីដ ទាបទៀតហើយ។ ទាបក៏ដោយ តែចំនួនអ្នកស្លាប់ វាច្រើនពេកកន្លង។ អេស្ប៉ាញ អ៊ីតាលី អាមេរិក សុទ្ធតែស្លាប់ខ្ទង់ម៉ឺននាក់ហើយ។ អាមេរិកឯណោះធ្ងន់ធ្ងរជាងគេហើយ គ្រាន់តែឆ្លង ជាង៣០ម៉ឺននាក់ហើយ។
សំណាង៖ អញកំពុងបារម្ភពីស្រុកយើងដែរ។ បើយើង អានប្រវត្តិនៃការឆ្លងរបស់ប្រទេសអឺរ៉ុប និងអាមេរិកទាំងនោះ គឺដោយសារការប្រមាថ និងផ្គើន។ ពួកគេមិនជឿ ហើយចូលចិត្តនិយាយថា គ្រាន់តែនិយាយថា អាកូវីដហ្នឹង គ្រាន់តែជា ប្រភេទ«ផ្តាសាយធំ»។ តាមពិត នៅពេលដែលពួកគេកំពុងប្រមាថ និងផ្គើននោះ ពួកគេកំពុងឆ្លងមេរោគរួចទៅហើយ ហើយក៏កំពុងចម្លងគ្នាស្ទើរពេញប្រទេសទៅហើយដែរ។ វាយ៉ាប់ត្រង់ អាការជំងឺកូវីដហ្នឹង វាក្រចេញសញ្ញាដែរ។
សុធីរ៖ អ្ហែងនិយាយត្រូវ។ អញបារម្ភស្រុកយើងដែរ។ អ៊ីចឹងហើយ បានអញយល់ថា អញយល់ស្រប នៅពេលរដ្ឋាភិបាលកំពុងប្រកាសវិធានការបន្តបន្ទាប់កន្លងមកនេះ។ អ្នកសេដ្ឋកិច្ច គិតរឿងសេដ្ឋកិច្ចមែន ប៉ុន្តែ បើបើកសេដ្ឋកិច្ច បើពាណិជ្ជកម្ម ហើយចុងក្រោយឆ្លងរាប់ម៉ឺនសែននាក់ ក៏គង់តែរដ្ឋាភិបាលបិទដដែលហ្នឹង។ ប៉ុន្តែបើបិទពេលនោះ អ្វីៗហួសពេលទៅហើយ។ ការចំណាយសម្រាប់ការព្យាបាល នឹងធំជាងការបិទសកម្មភាពមួយចំនួនតាំពីពេលនេះទៅទៀត។
សំណាង៖ ប្រជាជនយើង ដូចជាពុំសូវប្រយ័ត្នប៉ុន្មានទេ។ សំខាន់ត្រង់ថា នៅស្រុកយើង គឺមានរបៀបរស់នៅជាគ្រួសារធំ ជុំគ្នា សិ្នទ្ធស្នាលគ្នា។ ដូចនេះ បើឆ្លងមែន គឺអាសន្នធំហើយ។ តើយើងមានគ្រូពេទ្យគ្រប់គ្រាន់ទេ? យើងត្រូវចំណាយលុយប៉ុណ្ណា លើការធ្វើតេស្ត បើគ្រាន់តែជំងឺម្នាក់ ត្រូវធ្វើតេស្តច្រើនដង? តើមានមន្ទីរពិសោធន៍ គ្រប់គ្រាន់ទេ?
សុធីរ៖ ដូចអញគិតអ៊ីចឹង។ អញសុខចិត្ត ឱ្យអាជ្ញាធររឹតបន្តឹងតាំងពីពេលនេះ និងពីដំបូងឱ្យហើយ ជាជាងចាំដល់ពេលឆ្លងទប់មិនឈ្នះ ចាំរឹតវិធានការនោះ វាគ្មានប្រយោជន៍អីទៀតទេ ដូចនៅអាមេរិក នៅអឺរ៉ុបនោះអ៊ីចឹង។
សំណាង៖ ថ្ងៃទី៧មេសានេះ ជាទិវាសុខភាពពិភពលោកផង។ មិនដឹងពិភពលោករៀបចំទិវានេះយ៉ាងម៉េចទេអ្ហា? ហាហា
© រក្សាសិទ្ធិដោយ thmeythmey.com