ជាតិ
កសិករ២០គ្រួសារ ឈប់ប្រកបរបរនេសាទ ងាកមកចិញ្ចឹមត្រីដោយខ្លួនឯង
× ភ្នំពេញ៖ កសិករចំនួន ២០គ្រួសារ នៅខេត្តក្រចេះ និងខេត្តស្ទឹងត្រែង ដែលមានមុខរបរចំបងជាអ្នកនេសាទ បានចាប់ផ្តើមអនុវត្តគម្រោងចិញ្ចឹមត្រីអណ្តែង បន្ទាប់ពីទទួលបានការបណ្តុះបណ្តាលស្តីពីបច្ចេកទេសចិញ្ចឹមត្រីនិងដាំបន្លែ ពីអង្គការក្រុមអភិវឌ្ឍន៍ជនបទកម្ពុជា (CRDT) សហការជាមួយអង្គការ WCS ។ នេះបើតាមទំព័រហ្វេសប៊ុកអង្គការ WCS។
ក្រោមការគាំទ្រថវិកាពីសហភាពអឺរ៉ុបតាមរយៈអង្គការ WCS អង្គការ CRDT បានជ្រើសរើសកសិករចំនួន ៩គ្រួសារនៅក្នុងភូមិវឌ្ឍនៈ ស្រុកសំបូរ ខេត្តក្រចេះ និង១១គ្រួសារទៀតនៅភូមិកោះព្រះ កោះក្រូច និងស្រែក្រសាំង ស្រុកសៀមបូក ខេត្តស្ទឹងត្រែង ដើម្បីចូលរួមក្នុងការអនុវត្តគម្រោងនេះ។
គម្រោងចិញ្ចឹមត្រីអណ្ដែង តាមរយៈការបណ្តុះបណ្តាលស្តីពីបច្ចេកទេសចិញ្ចឹមត្រីនិងដាំបន្លែ មានគោលបំណងផ្តល់នូវជម្រើសផ្សេងទៀត ក្រៅពីការជួញដូរអណ្តើក និងនេសាទខុសច្បាប់។ គម្រោងនេះ ផ្តោតសំខាន់ជួយដល់ប្រជាសហគមន៍ ដើម្បីបង្កើតនូវប្រាក់ចំណូលសម្រាប់ទ្រទ្រង់ជីវភាពក្នុងក្រុមគ្រួសារ។
ប្រជាកសិករដែលចូលរួមក្នុងគម្រោងនេះ ទទួលបានពូជកូនត្រីអណ្តែងប្រមាណ ៣០០ក្បាលនិងចំណីត្រីមួយ, ថង់ប្លាស្ទិកសម្រាប់ធ្វើស្រះចិញ្ចឹមត្រី និងគ្រាប់ពូជបន្លែមួយចំនួន សម្រាប់ដាំនៅជុំវិញស្រះចិញ្ចឹមត្រី។
បើតាមអង្គការ WCS គ្រួសារកសិករទាំងអស់ បានប្តេជ្ញាការពារកន្ធាយក្បាលកង្កែប ឬល្មិច និងធនធានជលផលដទៃទៀត ដែលកំពុងទទួលរងការគំរាមកំហែង។ កសិករទាំង ២០គ្រួសារនេះ នឹងដើរតួជាកសិករគំរូរបស់គម្រោងនៅក្នុងសហគមន៍ និងស្ម័គ្រចិត្តបណ្តុះបណ្តាលដល់កសិករដទៃដែលមានបំណងចង់ចូលរួមក្នុងគម្រោងនេះដែរ៕
© រក្សាសិទ្ធិដោយ thmeythmey.com