COVID-19
កីឡាជាតិ
ជាតិ
ក្រសួងស្នើឲ្យផ្អាកលេងកីឡា ឬហាត់ប្រាណមានលក្ខណៈប្រមូលផ្តុំនៅទីលានសាធារណៈ និងឯកជន
× ក្រសួងអប់រំ យុវជននិងកីឡា ស្នើឲ្យផ្អាកការលេងកីឡា ឬហាត់ប្រាណដែលមានលក្ខណៈប្រមូលផ្តុំ នៅតាមទីលានសាធារណៈ ឬឯកជនជាបណ្តោះអាសន្ន ដោយសារបារម្ភការរីករាលដាលជំងឺកូវីដ-១៩។ នេះបើយោងតាមសេចក្តីប្រកាសព័ត៌មានរបស់ក្រសួង ដែលចេញផ្សាយនៅថ្ងៃទី៧ ខែមេសា ឆ្នាំ២០២០។
«ក្នុងស្មារតីបង្កើនការចូលរួមបង្ការ និងទប់ស្កាត់ការរីករាលដាលនៃកូវីដ-១៩ ក្រសួងអប់រំយុវជន និងកីឡា សូមស្នើផ្អាកលេងកីឡា ឬហាត់ប្រាណគ្រប់ប្រភេទ ដែលមានលក្ខណៈប្រមូលផ្តុំជាបណ្តោះអាសន្ន រហូតដល់ស្ថានភាពនៃការរីករាលដាលត្រូវបានបញ្ចប់»។ នេះជាការបញ្ជាក់ក្នុងសេចក្តីប្រកាសព័ត៌មានរបស់ក្រសួងអប់រំ យុវជន និងកីឡា។
ក្រសួងអប់រំ យុវជន និងកីឡា កាលពីពេលកន្លងទៅ ក៏បានសម្រេចឲ្យផ្អាកដំណើរការអាជីវកម្ម ក្លិបហាត់ប្រាណ និងការលេងកីឡា ឬហាត់ប្រាណ ដែលមានលក្ខណៈប្រមូលផ្តុំលើសពី១០នាក់ នៅពហុកីឡដ្ឋានជាតិ ដោយសារបញ្ហាកូវីដ-១៩ ផងដែរ។ បន្ថែមលើនេះ ក្រសួងបានប្រកាសរំសាយការប្រមូលផ្តុំហ្វឹកហាត់ ក្រុមជម្រើសជាតិថ្នាល និងផ្អាកការរៀបចំព្រឹត្តិការណ៍ផ្សេងៗទៀតផង។
គិតត្រឹមថ្ងៃទី៧ ខែមេសា ឆ្នាំ២០២០ កម្ពុជាមានអ្នកផ្ទុកកូវីដ-១៩ ចំនួន១១៥នាក់ ដោយព្យាបាលជាសះស្បើយចំនួន៣៥នាក់៕
Tag:
ក្រសួងអប់រំយុវជន និងកីឡា
COVID-19
© រក្សាសិទ្ធិដោយ thmeythmey.com